Aımaqtar • 18 Qyrkúıek, 2020

Aýyrmaýdyń joly – saqtyqta

95 ret kórsetildi

«Aýyryp em izdegenshe, aýyrmaıtyn jol izde». Degenmen jahan elderin shyrmaýyqtaı shyrmaǵan qaýipti indettiń álegi atyraýlyqtarǵa da ońaıǵa soqpady. О́ńirde dári de, dem de jetpeı, tatar dámi taýsylǵandar joq emes. Desek te qıyndyq artta qaldy.

Qazir epıdemııalyq ahýal turaqtandy deýge bolady. Soǵan qaramastan qaıtalanýy múmkin koronavırýs ınfeksııasynyń ekinshi tolqynyna daıyndyq jumysy kúsheıtilip otyr. Bul másele oblys ákimi Maham­bet Dosmuhambetov ótkiz­gen se­lek­­torlyq keńeste taǵy bir már­te talqyǵa tústi.

Oblystyq densaýlyq saqtaý basqarmasynyń basshysy Nur­lybek Qabdyqaparovtyń málim etýinshe, koronavırýstyń ekin­shi tolqynyna jan-jaqty daıyn­dyq júrgizilýde. Medı­sına­lyq mekemeler men dáriha­nalar­da dári-dármektiń jetkilikti qory jasaqtaldy. Buǵan qosa kúzde ór­shıtin tumaýǵa qarsy qolda­ny­latyn 60 myń doza vaksına satyp alynyp, ekpe júrgizý bastaldy.

– Birinshiden, medısınalyq mekemelerde naýqastarǵa shuǵyl kómek kórsetý isine basa nazar aýdarylyp otyr. Osy maqsatta aýrýhanalar ókpeni jasandy jeldetetin 224 apparatpen, 27 rentgen, 10 kompıýterlik tomografııa, 977 ottegi generatorymen, sondaı-aq 1100 pýlsoksımetrmen qamtamasyz etildi. Koronavırýstyń ekinshi tolqyny oryn alǵan jaǵdaıda 2080 ınfeksııalyq kereýet jasaqtaý josparlandy. Onyń ishinde 120 reanımasııalyq oryn bolady. Al medısına qyzmetkerleriniń qaýipti indetti juqtyrmaýy úshin jeke qorǵanysh quraldarynyń eki aılyq qorymen qamtyldy, – deıdi basqarma basshysy N.Qabdyqaparov.

Onyń aqparatyna qaraǵanda, ekinshiden, shalǵaı eldi mekenderde ornalasqan turǵyndardy medısınalyq kómekpen qamta­masyz etý de udaıy nazardan tys qalmaıdy. Osy maqsatta jaqyn­da 7 jyljymaly medısınalyq pýnkt keledi dep kútilip otyr. Sonymen qatar demeýshilik kó­mek arqyly alynǵan 8 avtokó­lik oblystyń medısınalyq uıym­daryna taratyldy. Endi aldaǵy qazan-qarasha aılarynda lızıng arqyly 40 sanıtarlyq avtokólik jetkiziledi.

Úshinshiden, óńirdegi 8 medı­sınalyq mekemege ortalyq­tan­dyrylǵan ottegi stansasyn ornatý josparlanǵan eken. Búgin­de 6 stansanyń qurylys-mon­taj jumystary júrgizilýde. Tórtin­shiden, oblystyq taýarlar men kórsetiletin qyzmetterdiń sapasy men qaýipsizdigin baqylaý departamentiniń basshysy – bas memlekettik sanıtarlyq dáriger Asylbek Sharovtyń málimetinshe, PTR ádisimen COVID-19 ınfeksııasyna testileý jasaıtyn zerthanalar qorynda 161 682 test synamasy bar. Endi taǵy 126 700 test synamasyn alý josparlanyp otyr. Qazir Atyraý oblysynda PTR ádisi arqyly zertteý júrgizetin 2 memlekettik, 4 jekemenshik zerthana, sondaı-aq Teńiz kenishinde eki zerthananyń fılıaly jumys isteıdi.

– Oblys kóleminde COVID-19 ınfeksııasyn anyqtaý úshin 233 319 PTR-test jasaldy. Test qorytyndysymen 16 qyrkúıekte 11 023 jaǵdaı rastaldy. Atyraý – test ótkizýden elimizdegi al­dyńǵy oryndaǵy óńirlerdiń biri. Sondyqtan statıstıkaǵa súıener bolsaq, oblystyń árbir úshinshi turǵyny test tapsyrdy deýge bolady. Atyraýda jumys babymen júrgen ózge óńirlerdiń azamattary da bar. Olar da bizdiń oblystyń statıstıkasyna endi, – deıdi A.Sharov.

Oblys ákimi M.Dosmuham­betov­tiń pikirinshe, epıdemııa­lyq ahýal turaqtanǵanyna baıla­nys­ty baqylaýdy bosańsytýǵa bolmaıdy. О́ıtkeni koronavırýs ınfeksııasyn jeńýdiń basty joly – kúresti áli de jalǵastyrý. Osy oraıda ásirese turǵyndar ara­syn­da aqparattyq nasıhatty odan ári kúsheıtý qajet.

– Koronavırýs indetiniń birin­shi tolqyny kezinde naýqas adamdardy emdeýge arnalǵan tósek oryndarynyń tapshy­lyǵy anyq baıqaldy. Osy máseleni sheshý baǵytynda Atyraý qalasynda 200 oryndyq, al Jylyoı aýdanynda 275 oryndyq aýrýhana­nyń qurylysy júrgizilip jatyr. Qurylys jumystary jýyq arada aıaqtalýy tıis, – deıdi oblys ákimi M.Dosmuhambetov. – Atyraý qalasynda salynyp jatqan modýldi tıptegi juqpaly aýrýlar aýrýhanasynyń qurylysyn júr­gizý kesteden keshikpegeni jón. О́ńirdegi epıdemııalyq jaǵ­daıdy baqylaýda ustap, sanı­tarlyq normalardyń qatań saq­talýy qadaǵalanyp otyr. Degen­men koronavırýstyq ınfek­sııa­nyń taralýy qaýpi men aýrý kórsetkishiniń ósimi baıqalsa, jedel sharalardy qabyldap, bar­lyq sanattaǵy medısınalyq qyz­metkerlerdiń qaýipsizdigin qam­tamasyz etýimiz kerek.

 

Atyraý oblysy

 

Sońǵy jańalyqtar

Vırýs mýtasııaǵa ushyrady

Koronavırýs • Búgin, 17:27

Málik Ǵabdýllın: Zaman, tulǵa, jad

Rýhanııat • Búgin, 12:00

Atyraýdan 100 jigit áskerge attandy

Aımaqtar • Búgin, 10:35

Elimizde koronavırýstan 123 adam aıyqty

Qazaqstan • Búgin, 09:51

Uqsas jańalyqtar