"Qala kúni" aıasynda uıymdastyrylatyn merekelik sharalar sanıtarlyq normalardy saqtaı otyryp, qabyldanǵan shekteýlerge baılanysty úılestiriletin bolady. Halyqtyń jappaı jınalýyna jol bermeý úshin 60 jýyq merekelik is-shara onlaın formatta Iýtýb kanaly men Feısbýk, Instagram taǵy basqa da áleýmettik jelileri arqyly kórsetiledi. Negizgi merekelik sharalar 25 qyrkúıekte jańadan jáne qaıta jańǵyrtýdan ótken áleýmettik nysandardy paıdalanýǵa berý saltanatymen ushtasady.
Atap aıtqanda, túske deıin oblys jáne qala ákimderiniń qatysýymen "Densaýlyq" saıabaǵy ashylyp, qaıta jańǵyrtýdan ótken "Syr ana" alańy tanystyrylady. Jappasbaı batyr kóshesi boıyndaǵy jańa №282 mektep-lıseıi osy kúni paıdalanýǵa beriledi, oblystyq medısına ortalyǵy aldynda "Dárigerler" alleıasy, jańadan salynǵan balalar oıyn alańy, memleket jáne qoǵam qaıratkeri Ydyrys Qalıevtiń eskertkish bıýsti ashylady. Osy kúni sol jaǵalaýdan salynǵan kópqabatty turǵyn úılerdiń páter kiltin tabystaý rásimderi júzege asyrylady.
26 qyrkúıek kúni merekege tartý retinde Qyzylorda qalasy jáne barlyq aýdandardyń qatysýymen bıylǵy jyldyń alǵashqy aýylsharýashylyǵy ónimderiniń jármeńkesi arnaıy belgilengen oryndarda ótedi.
Májilis sońynda qala ákimi sala basshylaryna júktelgen tapsyrmalardy tııanaqty oryndap, júıeli ári qarqyndy jumys isteýdi jáne qala kúnin toılaýda saqtyq sharalarynyń qatań saqtalýyn tapsyryp, barlyǵy tikeleı óz baqylaýynda bolatyndyǵyn jetkizdi.
