Maıdan dalasynda opat bolǵan jaýynger 1942 jylǵy 19 sáýirde Birjan sal aýdandyq áskerı komıssarıatynan áskerge shaqyrylǵan, Aqmola oblysynyń 1897 jylǵy týmasy Áziken Nuǵymanov bolyp shyqty.
Aqmola oblysynyń ákimdigi bul oqıǵaǵa baılanysty arnaıy sheshim qabyldap, respýblıkalyq «Atamnyń amanaty» qoǵamdyq birlestigimen birge jerles jaýyngerdiń súıegin Otanynymyzǵa ákelýge qatysty jumys júrgizdi. Ushaqpen elge jetkizilgen jaýynger máıitine Qazaqstan Qarýly kúshteri mınıstrliginde áskerı qurmet kórsetildi. Bul ıgi istiń basy-qasynda aýdan ákimi Ermek Nuǵymanov ta júrgenin atap ótkimiz keledi.
Osynaý aıtýly oqıǵa baılanysty búgin oblys ortalyǵy Kókshetaý qalasyndaǵy Dańq memorıalynda «Erlikke taǵzym» sharasy ótkizildi.
Oblys ákimi Ermek Marjyqpaev, Reseı elshiliginiń ókilderi men qala jurtshylyǵy Dańq memorıalyna gúl shoqtaryn qoıyp, áskerı qurmetti eskord jaýynger súıegi salynǵan tabytty alyp shyqty.
Taǵylymdy sharada Aqmola oblysynyń ákimi Ermek Marjyqpaev sóz sóıledi.
- Bıyl Uly Jeńistiń 75 jyldyǵyn atap ótýdemiz, – dedi Ermek Boranbaıuly, – bul biz úshin qasterli kúnder sanalady. Qazaqstan Prezıdenti Qasym-Jomart Toqaev atap ótkendeı: «Bizdiń halqymyz Jeńiske óziniń sheksiz úlesin qosty. Babalarymyzdyń erligi jer betindegi beıbitshilikti saqtap qaldy. Oblysymyzdan surapyl soǵysqa attanǵan 90 myń jerlesimizdiń 37 myńy ǵana elge oraldy. Olardyń 33-i ǵana aramyzda. Ýaqyt ótken saıyn adamzat tarıhynyń osy qaıǵyly betterin barynsha tereń túsine túsesiń. Endigi negizgi maqsatymyz ardagerlerge qamqorlyq jasap, olardy erekshe nazarda ustaý. Biz sol qasiretti soǵys jyldarynda qaza tapqan, habarsyz ketken atalarymyz ben ákelerimizdiń, beıbit kúnderde eldi kóterýge atsalysqan barlyq azamattardyń jarqyn beınelerin qurmetpen eske alamyz.
Budan keıin Reseı Federasııasynyń Qazaqstandaǵy elshiliginiń aǵa keńesshisi Iýrıı Melnık, oblystyq ardagerler keńesiniń tóraǵasy Ǵosman Tóleǵul, «Atamnyń amanaty» respýblıkalyq qoǵamdyq keńesiniń tóraǵasy Murat Moldaǵalıev búgingi sharanyń mán-mańyzy týraly tolǵanysty lebizderin bildirdi.
Jaýynger Áziken Nuǵymanov rýhyna arnalǵan «Erlikke taǵzym» sharasynda bir mınýttyq eske alý jarııalanyp, úsh dúrkin salıýt berildi.
Erjúrek jaýyngerdiń súıekteri ózi týǵan Stepnıak qalasynda jerlendi.
