Búgingi tańda «Taldyqorǵan – Qalbataý – О́skemen» avtojolynyń 287-615 shaqyrymyn qalpyna keltirýge 905 tehnıka men 1847 jumysshy kúsh jumyldyrylǵan. Joldyń jalpy uzyndyǵy 313,5 shaqyrym. Jol qurylysyn qaıta jóndeý jumysy 115 mıllıard teńgeni quraıdy. Qurylys jumystary bastalǵannan beri 9 897 myń m3 jer jumystary aıaqtalǵan. 150,7 shaqyrym astyndaǵy qabat, 135,8 shaqyrym tómengi negizgi qabat, 126 shaqyrym joǵarǵy bazalyq qabat bolsa tómengi qabattyń uzyndyǵy 117,8 shaqyrym.
Úsharal – Dostyq jolyn qalpyna keltirýdiń jalpy quny 12,6 mıllıard teńgeni quraıdy. Qazirgi tańda nysanǵa 265 adam men 144 tehnıka jumyldyrylǵan. Bıyl 30 shaqyrym jol paıdalanýǵa beriledi dep josparlanýda (ýchaskesi 30-60 shaqyrym). Eki nysandy da 2021 jyly paıdalanýǵa berý josparlanǵan.
Vıse-Premer Roman Sklıar Taldyqorǵanǵa jumys sapary kezinde 200 oryndy modýldi aýrýhana qurylysynyń jumysymen tanysty. Joba dırektory Arman Kabulqastyń aıtýynsha, nysannyń jalpy aýdany 6760 sharshy metrdi quraıdy. Aýrýhanada qabyldaý bólmesi, bosaný, zerthana, jansaqtaý bólimderi jáne kishigirim ota jasaıtyn bólme bar. Qazirgi kezeńde aýrýhananyń qurylysy josparǵa sáıkes júrgizilýde. Nysandaǵy tamaqtaný, kir jýý bólimderi jaıly máseleler pysyqtaldy. Qurylys kezinde medısına qyzmetkerleriniń tilekteri eskerilip, basty nazarǵa alynǵan. Búgingi kúnge nysannyń qańqasy, qabyrǵalary turǵyzylyp, shatyry jabylyp, ınjenerlik jelilerdiń shamamen 85%-y ornatylyp, ishki árleý jumystary júrgizilýde. Qajetti medısınalyq jabdyqtardyń 80% jetkizilgen.
Jańa aýrýhanada kópshilikke sapaly qyzmet kórsetetin kadr máselesi de basty nazarda. Oblystyq densaýlyq saqtaý basqarmasy ókilderiniń aıtýynsha, 82 rezıdent bar. Olardyń ishinde ınfeksıonıstter, pýlmonologtar, reanımatologtar, anestezıologtar bar. Rezıdentter jergilikti bıýdjet esebinen oqıdy. Amandyq Batalov qala ákimi Ǵalymjan Ábdiraıymovqa keler jyly kem degende 60 páterli kóppáterli úı salý úshin alǵashqy jumystardy bıyl bastaýdy tapsyrdy. Esterińizge sala keteıik, buǵan deıin qalada medısına qyzmetkerlerine arnalǵan 60 páterli baspana salynyp, paıdalanýǵa berilgen bolatyn.
Oblys ortalyǵyndaǵy álemdik deńgeıdegi júzý basseıniniń qurylysy vıse-premerdiń nazarynan tys qalmady. Merdiger «Bazıs Konstrakshn» kompanııasynyń basqarýshy dırektory Mustafa Afraılovtyń aıtýynsha, jumystyń birinshi kezeńi tolyǵymen aıaqtalǵan. 10-15% ıntererdiń syrlaný jumysy ǵana qalǵan. Ǵımarattyń jaryqtandyrylýy pysyqtalyp, jumystyń ekinshi kezeńi bastalyp, 3 gektar aýmaqty abattandyrý jumystary qolǵa alynǵan.
Oblys ákimi Amandyq Batalov atap ótkendeı, basseın aýmaǵyn jaqsartý «Jastar» saıabaǵynyń abattandyrylǵan aýmaǵymen birtutas úılesimdi kompozısııany qura alady.
Jumys sapardyń kelesi nysany kottedj qalashyǵy boldy. Kezekte turýǵa arnalǵan taǵy 71 saıajaı paıdalanýǵa berýge daıyn. Barlyq úı ortalyqtandyrylǵan gazben jylytýǵa qosylǵan. Jyl sońyna deıin 349 úı salynady dep josparlanýda.
Vıse-premerdiń Roman Sklıar Qaratal ózeniniń jaǵalaýynda bolyp, aǵymdaǵy jyldyń 2 qyrkúıeginde paıdalanýǵa berilgen 280 oryndyq stýdentter jataqhanasynyń ishki ornalasýymen jáne ortalyq qalalyq alańnyń abattandyrylý jumysymen tanysty.
