Samatáli men Sanatáli Tóltaevtar 1999 jyly 11 qarashada dúnıege kelgen. Almaty qalasynda sport álemine qadam basyp, qazirde el ishindegi jarystarda Mańǵystaý oblysynyń, halyqaralyq dodada el namysyn abyroımen qorǵap júrgen bylǵary qolǵap sheberleri.
Qos boksshy jasósprimder men jastar arasynda baq synaǵan barlyq dúbirli dodada top jaryp, eresekter arasynda da úmitti aqtap júr. Qazaqstan chempıonaty men Qazaqstan spartakıadasynda da jeńis tuǵyryna kóterilip úlgergen qos baýyr búginde Qazaqstannyń halyqaralyq dárejedegi sport sheberi ataǵyn alǵan. Bizdiń búgingi keıipkerlerimizdiń jan-dúnıesi sportqa jat bolmaǵan. Tipti egiz uldy ákesiniń ózi sportqa jetektep alyp kelgen.
«Biz áýletimizdiń, ata jolyn jalǵastyrýshylarmyz. Sebebi atamyz da, ákemiz de, aǵalarymyz da kezinde bokspen shuǵyldanǵan bylǵary qolǵap sheberleri. Sportqa kelýimizge de ákemiz sebepshi boldy. Kishkentaı kezimizden tynymsyz, buzyq, kóp tóbelesetin bolǵandyqtan ákemiz kúshterińdi balalarǵa emes, zalda shyǵaryńdar dep, boks zalyna ákeldi. Sóıtip 9 jasymyzda boks mektebiniń esigin ashtyq», dep esine aldy Samatáli.
«Otbasymyz sportpen etene tanys bolǵandyqtan, kishkentaı kezimizden bizdi jaqyndarymyz qoldap otyrdy. Otbasymyzdyń árbir múshesi shyn jankúıerimiz atanyp, tileýimizdi tilep júredi. Sondyqtan bir úıden eki balanyń birdeı bir sportpen shuǵyldanyp júrgeni eshqandaı másele týyndatpady. Kerisinshe, ata jolyn jalǵastyrýshy bolǵandyqtan bizge jyly shyraı tanytty. Bir úıden baýyrlardyń, egizderdiń bir sport túrimen shuǵyldanǵanynyń kemshiligi joq sııaqty. Ekeýmiz de bir sportqa qyzyqqandyqtan birge talqylap, jattyǵýdy birge jasaımyz. Bir-birimizben tájirıbe almasyp otyramyz», deıdi Sanatáli.
Osydan úsh jyl buryn, ıaǵnı 2017 jyly Taıland astanasy Bangkok qalasynda ótken bokstan jastar arasyndaǵy Azııa chempıonatynda aǵaıyndy Tóltaevtar sary qurlyqtyń myqtysy atandy. Bir qyzyǵy, bul qazaq boksynyń tarıhynda aǵaıyndy boksshylardyń bir chempıonatta tuńǵysh ret top jarýy edi. Sol jyly Ǵalym Kenjebekov baptaǵan Qazaqstan jastar ulttyq quramasy Azııa birinshiligine tolyq quramda qatysyp, jalpy sany jeti medal oljalady. 60 kılodaǵy Samatáli fınalda jergilikti taı boksshysy Sakda Rýamtamdy utsa, Sanatáli (64 kg) ózbekstandyq bylǵary qolǵap sheberi Bılolbek Mırzaraҳımovti jeńdi.
Eń alǵashqy jarysyna 10 jastarynda qatysqan egizderdiń á degende joldary bola qoımapty. Qala ishilik jarysta baq synǵan aǵaıyndylardyń ekeýi de júldege qol sozym jerde súrinip, týrnırdi ekinshi orynmen aıaqtaǵan. «Jarysta jeńilis tapqanymyzǵa qaramastan eńsemizdi túsirmeı, ekinshi oryndy qanaǵat tuttyq. Kerisinshe, bizdiń altynǵa qol sozym jerden toqtaǵanymyz kelesi jarysta jeńimpaz atanýǵa túrtki boldy. Nátıjesinde, qatemen jumys istep, olqylyqtyń ornyn toltyrdyq. Utylyp qalǵan jarysymyzdan keıin birden kelesi dodada jeńimpaz atanyp, top jaryp shyqtyq», deıdi Sanatáli. «Jarys barysynda bir-birlerińdi almastyryp, rıngke shyqqan kezderiń boldy ma?», degen suraǵymyzǵa «Kishkentaı kezimizde de, es jıyp eresek bolǵaly da ondaı alaıaqtyq jasap kórmeppiz», dep jaýap berdi.
Aǵaly-inili Tóltaevtar sporttaǵy jolyn aǵaıyndy-boksshy Klıchkolar syndy sátti jalǵastyrǵandy qalaıdy. Sharshy alańda ekeýi birdeı qarsylas shaq keltirmeı, úzdikter kóshin bastaǵylary keledi. Bolashaqta el maqtanyshy Gennadıı Golovkınge uqsaǵysy keletiniderin de jasyrmaıdy.
