Dırıjerlik tuǵyrda – álemniń kóptegen elge áıgili maestro, teatrdyń bas dırıjeri, Qazaqstannyń eńbek sińirgen qaıratkeri, QR Memlekettik syılyǵynyń laýreaty Alan Bóribaev.
Konsert aldynda ol teatrdyń tartymdy da qyzyqty baǵdarlama ázirlegenin jáne oǵan negizgi repertýardaǵy "Abaı", "Don Karlos", "Toska", "Madam Batterflıaı", "Sevıldik shashtaraz" syndy operalardan kórinister men arııalar engizilgenin aıtqan bolatyn. Eki kún ótken konsertke teatrdyń túgel derlik solısteri, hor ártisteri, orkestr mýzykanttary men mımans qatysty.
"Barlyǵy asqan qulshynyspen, zor qýanyshpen jumysqa kirise ketti, bári de jumysyn saǵynǵan. О́nerimizdi kórermen qaýymǵa syılaǵymyz keledi. Uly Abaıdyń 175 jyldyǵynda baǵdarlamaǵa A.Jubanov, L.Hamıdıdiń "Abaı" operasynan kórinisterdi engizdik", dep atap ótti maestro.
Foıeniń barlyq jerinde sanıtaızerler ornatylǵan, zaldaǵy kreslolar shahmat tártibinde ornalasqan. 
О́zgerister orkestr mýzykanttarynyń otyrý retine de áser etken, sanıtarlyq normalarǵa sáıkes aspapshylar bir-birinen bir jarym metr qashyqtyqta jaıǵasqan. Mundaı araqashyqtyqta mýzykanttardyń minsiz ansamblin jasaý qıyn, degenmen ártister bul tapsyrmany keremet oryndap shyqty.
18-19 qyrkúıek kúnderi sahna tórinde jarqyraǵan teatrdyń opera solısteri – Maıra Muhamedqyzy, Jupar Ǵabdýllına, Dına Hamzına, Aıgúl Nııazova, Alfııa Karımova, Aızada Qaponova, Azamat Jyltyrkózov, Medet Chotabaev, Jan Tapın, Talǵat Musabaev, Janat Shybyqbaev, Meır Baınesh, Erjan Saıpov, Elena Ganja, Tatıana Vısınskaıa, Jamılıa Djarkımbaeva, Gúljanat Sapaqova, Bıbigúl Januzaq, Mádına Islamova, Saltanat Muratbekova, Nazym Saǵyntaı, Erulan Kámel, Beıimbet Tańaryqov jáne t.b. Bas hormeıster – Qazaqstannyń eńbek sińirgen qaıratkeri Erjan Dáýitov. Konsert rejısseri – Erenbaq Toıkenov.
Kórermender oryndarynan tik turyp, qoshemet kórsetti, oryndaýshylardyń asqan sheberligi úshin "Bravo" dep ystyq yqylastaryn bildirdi. Gala-konsert aıaqtalǵan soń QR mádenıet jáne sport mınıstri Aqtoty Raıymqulova sahna syrtyna kelip, ártisterdi keremet óner kórsetýlerimen quttyqtady. Al foıedegi kórermender alǵan áserlerimen bólisti.
"Teatrlarǵa shekteýli kórermen sanymen óz qyzmetin jalǵastyrýǵa ruqsat bergenin estigen kezde, birden bılet satyp alýǵa keldik. Klassıkalyq ónerdi, teatrdy, onyń ártisterin saǵyndyq. Bolyp jatqan jaıttyń ahýalyn jetkizý qıyn, biraq eń basty emosııa, bálkim, qýanysh shyǵar. О́mirimizdiń qaıtadan óz qalpyna kelip jatqanynan, asqaq ónermen qaıta qaýyshýǵa múmkindiktiń paıda bolǵanynan týyndaǵan qýanysh dep bilemin. Jumystaǵy osynshama kóp úziliske qaramastan, barlyq solıster, hor ártisteri keremet vokaldyq qalyptaryn saqtaǵan. Búgin orkestr tamasha óner kórsetti, opera jaýharlarynyń týyndylaryn myń qubyltqan Alan Bóribaevtyń ǵajaıyp ınterpretasııasyn tyńdaýdyń ózi bir ǵanıbet", dep pikirimen bólisti teatrdyń turaqty kórermeni Aıda Mahpırova.
