Máselen, TarMÝ stýdenti Baqtybaı Kúmekbaev Taraz qalasynyń oń ımıdjiniń qalyptasýyna, onyń básekege qabilettiligin arttyrýǵa jáne týrıstik qyzmetterdiń naryǵyndaǵy bedelin kóterýge, sondaı̆-aq, yqtımaldy perspektıvalyq ishki týrızmniń damýyna qolaı̆ly jaǵdaı̆ jasaý maqsatynda sheberligin shyńdaýda. Ol Taraz qalasyndaǵy mádenı-tarıhı murany, tabıǵı erekshelikterdi jáne jańa damý úrdisterin tolyǵymen eskeretin logotıpin jasap, dızaıner-sáýletshiler arasynan oza shyqqan bolatyn.
Atalǵan "Sáýlettik bıýro" mekemesi 2018 jyly Jambyl oblysynyń sol kezdegi ákimi Asqar Myrzahmetovtyń bastamasymen qurylǵan. Sodan beri qaladaǵy kóptegen saıabaqtar, skverler men tarıhı oryndar jónge keltirilip, qurylys jumystary júrgizildi.
Bul kúnde B.Momyshuly atyndaǵy "Jeńis" saıabaǵy, T.Rysqulov atyndaǵy, Q.Rysqulbekov atyndaǵy saıabaqtar men "Jeltoqsan tolqyny" saıabaǵy, "Jastar" alleıasy el ıgiligi úshin qyzmet atqarýda. Sonymen qatar, temirjol vokzalynyń aýmaǵyn abattandyrý jumystary júrgizilip, «Úshbulaq jaǵajaıy», «Tekturmas» etno-tarıhı kesheni jáne "Shahrıstan" etno-mádenı kesheni boı kóterdi. Taraz qalasynda alǵash ret "Arbat" jaıaý júrginshiler joly salyndy.
"Qazirgi tańda bul bastamany oblys ákimi Berdibek Saparbaev qoldap, jalǵastyrýda. Aǵymdaǵy jyldyń birinshi jartyjyldyǵynda oblys ákiminiń bastamasymen Taraz qalasy men aýdandar aýmaǵyn damytý, abattandyrý jumystary qolǵa alyndy. Máselen, oblys ortalyǵy Taraz qalasyn damytý, kórkeıtý maqsatynda "Tekturmas" etno-tarıhı kesheniniń ekinshi kezeńi jalǵasýda. "Kóne Taraz" kesheni men Qarahan baba kesenesin baılanystyratyn Arbat-1 jolynyń, Áıteke bı kóshesiniń boıynan "Anaǵa taǵzym" ortalyǵynyń, qalamyzdaǵy kópqabatty turǵyn úılerdiń qasbetterin jańartý jáne sáýlettik kelbetin ashatyn mýral sýretteriniń eskızdik jobalary ázirlenip, qazirgi tańda qurylys-montaj, árleý jumystary júrgizilýde", deıdi oblystyq sáýlet jáne qala qurylysy basqarmasynyń basshysy Arman Ábdeshov.
Sonymen qatar, elimizdiń birligi men tatýlyǵyn nasıhattaıtyn «Biz birgemiz!» monýmenti koronovırýspen kúresken azamattarǵa arnap ornatylýda. Basqarmanyń málimetinshe, ǵımarattardyń syrtqy qasbetterin zamanaýı talapqa sáıkestendirý maqsatynda, aýdandardaǵy mektep, balabaqsha, emhana, mádenıet jáne sport sııaqty áleýmettik nysandardyń syrtqy qasbetterine usynystar berilip, aýdan ákimdikterimen tyǵyz jumys júrgizilýde eken.
Sol sııaqty, Taraz qalasy, Tóle bı kóshesinde ornalasqan mekteptiń jáne "Oqýshylar saraıynyń", sondaı-aq, Taraz qalasynyń sáýlettik kelbetin damytý, kóriktendirý maqsatynda 15-móltekaýdanynan jańadan boı kóteretin kópqabatty turǵyn úılerdiń, saıabaqtyń jáne jaǵajaıdyń eskızdik jobalary jasalýda. Al, Táýke han kóshesi men "Áýlıe Ata" halyqaralyq áýejaıy qıylysynan bastap "Taraz-Arena" sport kesheni mańyna deıin qala turǵyndary men qonaqtaryna arnalǵan sporttyq oıyn-saýyq kesheniniń jobasy júzege asady. Atap aıtqanda, gúlzarlar, halyqaralyq standarttaǵy muz aıdyny, jeńil atletıka maneji, "Tennıs" ortalyǵy, qonaqúı, akvapark, motobaık, baggı, "Rallı" park jáne taǵy da basqa saýyqtyrý keshenderiniń eskızdik jobalary "Sáýlettik bıýro" mekemesimen ázirlengen.
"Búginde Aqqozıev jáne Sypataı batyr kósheleriniń aralyǵynda Arbat-3 keshenderi men jaıaý júrginshiler jolaqtary, "Dos-Nar" saýda ortalyǵynyń mańynan "Qazaq halqyna myń alǵys" monýmenti el ıgiligine berilýde. Bul jerde qalamyzda buryn-sońdy bolmaǵan qurǵaq sýburqaqtar, qalanyń túngi kórkin ashatyn qus beınesindegi gırlıandylar ornatyldy.
Osy atalǵan jumystar "Sáýlettik bıýro" mekemesindegi dızaıner-sáýletshilerdiń eńbekteriniń jemisi. Osyǵan oraı, oblystyń kórkeıýine úles qosýǵa nıetti nemese bilimin shyńdaýǵa talaptanǵan jas sáýletshi túlekter men stýdentterge "Sáýlettik bıýro" mekemesinen tájirbıeden ótýge múmkindik bar», deıdi basqarma basshysy.
Jambyl oblysy
