Budan bólek, jeke ınvestısııalardyń esebinen sanıtarlyq-gıgıenalyq toraby bar 128 janarmaı quıý beketin salý josparlanyp otyr. Memleket basshysy Joldaýda koronavırýs indetine qarsy kúreske barlyq kúsh-jigerdi jumyldyrý qajettigin aıtqan bolatyn. Sonymen qatar «Jol boıyndaǵy servısti damytý máselesine» erekshe toqtalyp, Úkimetke tıisti tapsyrmalar júktegeni belgili. 5 jyl ishinde atqarylatyn joǵaryda aıtylǵan jumystar Joldaý júktegen mindetterdiń údesinen shyǵýǵa baǵyttalǵan.
«QazAvtoJol» UK» AQ baspasóz qyzmeti:
– Bıyl qaıta jańartý jumystarynyń aıasynda Shortańdy – Zerendi, Qaraǵandy qalasynyń aınalma joly, Nur-Sultan – Pavlodar, Jetibaı – Jańaózen, «Nur-Sultan qalasynyń aınalma joly, Uzynaǵash – Otar, О́skemen – Rahman qaınary men Petropavl – Qorǵan avtojoldarynda 22 sanıtarlyq torap qoıylady. 2021 jyly 40 sanıtarlyq-gıgıenalyq torap, 2022 jyly – 50, 2023 jyly – 55, 2024 jyly – 65, 2025 jyly 87 sanıtarlyq-gıgıenalyq torap ornatylady, – dep habarlady.
Sonymen qatar 2025 jyldyń sońyna deıin halyqaralyq jáne respýblıkalyq mańyzy bar joldardyń boıynda jeke ınvestısııalardyń esebinen sanıtarlyq-gıgıenalyq toraby bar Compass, QazMunaıGaz, Helios, Sinooil jáne Kaztransgas sııaqty kompanııalardyń 128 janarmaı quıý beketi boı kóteredi.
Búgingi tańda Almaty – Qorǵas, Almaty – Tashkent, Samara – Shymkent, Aqtóbe – Martyq, Nur-Sultan – Temirtaý, Almaty – О́skemen, Ekaterınbýrg – Almaty men Dossor – Aqtaý teńiz porty avtomobıl joldarynda 18 janarmaı quıý beketi salynýda. Jol boıyndaǵy servısti damytý máselesi Indýstrııa jáne ınfraqurylymdyq damý mınıstrligi Avtomobıl joldary komıtetiniń basty nazarynda.
