Teatr mereıtoıyna oraı, Qazaqstannyń eńbek sińirgen qaıratkeri, oblystyq qazaq drama teatrynyń jetekshi akteri Qonysbek Bekaıdarovty tól merekesimen quttyqtap, óńirlik teatrdyń búgingi aıaq alysy jaıly suradyq.
– Búginde bizdiń teatr ujymy tyń izdenis ústinde. Nátıjesin halyq, teatrymyzdyń turaqty kórermenderi kórip, bilip otyr. Teatr sahnasy – kıeli oryn. Keıde sol kıeli sahnaǵa kásibı akterler jetispeı jatady. Qazir elordadaǵy О́ner ýnıversıteti, Almatydaǵy T.Júrgenov atyndaǵy óner ýnıversıtetinen bitirgen balalardyń kóbi oblys ortalyqtaryna kele qoımaıdy. Shalǵaı deıdi, deni Almaty men Nur-Sultanda qalǵysy keledi. Bizdiń kezimizde tájirıbe alý úshin oblys ortalyqtaryna barýǵa qulshynyp turatynbyz. Degenmen qazir oblystyq qazaq drama teatrynda eńbek etip júrgen jastardyń betalysy jaman emes. Tyń izdenisteri kóp. Jetpeı jatqan jerleri bolsa, aqyl-keńesimizdi berip otyramyz» – dedi teatr sańlaǵy.
Mereke barysynda sahna óneriniń damýyna úles qosyp júrgen teatr qyzmetkerleri marapattaldy. Kıeli teatr tórinde talaı taǵdyrly rólderdi somdap, kópshilik súıispenshiligine bólenip júrgen sahna sańlaqtarymen qosa, ádette kórermen baıqaı bermeıtin teatr qyzmetkerleri – kostıýmer, grımer, ınjenerler oblys ákiminiń, mádenıet basqarmasynyń, Nur Otan partııasy men Qazaqstan halyq assambleıasynyń madaq dıplomdarymen, alǵys hattarymen marapattalyp, qushaqtary gúlge toldy.
Bıyl pandemııaǵa baılanysty mádenıet ordasynyń qanshama jospary iske aspaı jatyr. Biraq soǵan qaramastan, ártister jazǵy ýaqytta tabıǵat aıasyna shyǵyp, onlaın formatta Abaı óleńderin, qara sózderin, spektaklderdiń úzindilerin sahnalady.
Jıyrma jyldyq mereıtoıǵa oraı teatr óz murajaıyn, shaıhana zalyn ashyp otyr. Murajaı tórinde Ilııas Omarovtyń portreti, qaıratkerdiń jumys ornynan bastap, óner ujymynda irgesi qalanǵannan bergi eńbek etken azamattardyń jeke zattary, sýretter, belgili tulǵalar syıǵa tartqan dúnıeler, etnografııalyq zattar jáne basqa da kóz tartar dúnıeler qoıylǵan. Bul mýzeı qarashańyraqtyń shejiresinen syr shertip turatyn tarıhı múıiske aınalmaq.
Qostanaı oblysy
