Taıaýda ǵana Qazaqstan halqyna arnaǵan Joldaýynda Memleket basshysy: "Beınebaqylaý júıesin damytý jóninde kóp aıtylady. Biraq soǵan qaramastan quqyq qorǵaý organdary kóbinese ózderiniń ǵımarattarynda qurylǵysyz otyrady. Túzeý mekemelerine jáne polısııanyń qyzmettik ǵımarattaryna jappaı beınebaqylaý ornatýdy tapsyramyn", degen edi.
Qostanaılyq polıseıler kóp uzamaı-aq osy talap údesinen shyǵyp, "Qaýipsiz aýla" jobasyn júzege asyrýdy qolǵa aldy. Máselen, jańa ashylǵan polısııa pýnkti qyzmet etetin eki shaǵyn aýdandaǵy turǵyn úı aýlalaryna 20 beınebaqylaý kamerasy ornatyldy. Osylaısha, ýchaskelik ınspektorlar ózderine mindettelgen aýmaqtyń qaýipsizdigin óz qyzmet oryndarynda otyryp-aq baqylaıtyn múmkindikke ıe bolyp otyr.
Polısııa pýnkti bıznes ókilderiniń qoldaýymen ashylyp otyrǵanyn aıta ketý kerek. Qostanaıdaǵy "BK-Stroı" qurylys kompanııasynyń basshysy Igor Kım ózi salǵan turǵyn úıdiń birinshi qabatynan ýchaskelik polıseılerge aýdany 60 sharshy metrlik eki bólmeli páter berip otyr. Al osy ǵımaratta ornalasqan ýchaskelik polısııa pýnktine kiretin jeke dáliz salynyp, úsh jumys kabınetine ınspektorlarǵa qajetti kompıýterlik tehnıka qoıylypty.
Pýnkttiń ashylý rásimine QR IIM Ákimshilik polısııa komıtetiniń tóraǵasy Murat Baımuqashev qatysyp, áleýmettik jaýapkershiliktiń jarqyn úlgisin kórsete bilgen demeýshi kompanııanyń basshysyna mınıstrdiń alǵys hat tabys etti.
- Prezıdent Joldaýynda ishki ister organdary júıesin reformalaýdaǵy basty ról ýchaskelik polısııa qyzmetkerlerine júktelgeni atap ótildi. Eń bastysy, polısııa qol jetimdi bolýy kerek jáne halyqtyń qaýipsizdigin tıimdi qamtamasyz etýi kerek. Qostanaıda ishki ister organdaryn reformalaý aıasynda elimizde alǵash ret osyndaı zamanaýı ýchaskelik polısııa pýnkti ashyldy, dedi QR IIM ÁPK tóraǵasy M.Baımuqashev.
Jańa ashylaǵan polısııa pýnktinde eki ýchaske ınspektory men bir ıývenaldy polısııa ókili qyzmet atqarady.
- Bul jańa boı kótergen 2 shaǵyn aýdandy mekendegen 14 myńnan astam turǵynnyń qaýipsizdigin qorǵaýǵa múmkindik beredi, - dedi jergilikti polısııa qyzmetiniń bastyǵy Qurmet Májikenov.
Qostanaı oblysy PD bastyǵy Beket Aımaǵambetovtiń aıtýynsha, bıyl oblysta ýchaskelik polısııa ınspektorynyń kómekshisi mindetin atqaratyn 22 qosymsha shtat ashylǵan. Sondaı-aq, ýchaskelik polısııa ınspektorlary "JAC S3" markaly 12 avtokólikpen qamtamasyz etilipe otyr.
- 222 ýchaskelik ınspektor "Altel" mobıldi baılanysy bar telefon aldy. Bul turǵyndardyń ýchaskelik polısııa ınspektoryna tikeleı tegin qońyraý shalýyna múmkindik beredi, dedi PD basshysy.
Jalpy, jyl basynan beri oblystyń ýchaskelik polısııa ınspektorlary 1164 qylmystyń betin ashyp, 40 myńnan astam ákimshilik quqyq buzýshylyqty anyqtaǵan.
Qostanaı oblysy
