Oblystyq veterınarlyq baqylaý jáne qadaǵalaý komıtetiniń aýmaqtyq ınspeksııasynyń basshysy Bolat Ábdirahmanovtyń málimetine qaraǵanda, búginge deıin 500-ge jýyq qus ólgen. Bul esepke engeni ǵana, orman-toǵaıdaǵy, kisi kózinen jyraqtaǵy qus ólimi oqıǵalarynyń qanshalyqty ekendigin dóp basyp eshkim aıta almas.
Astrahan, Atbasar, Zerendi, Egindikól, Bulandy, Jarqaıyń aýdandarynda osyndaı oqıǵalar tirkelýde. Jarqaıyń aýdanynyń Shoıyndykól eldi mekeninde indettiń sebebi laboratorııalyq zertteýler arqyly saraptalyp, qus tumaýy ekendigi belgili bolyp otyr. Aýdannyń bas veterınarlyq-sanıtarlyq ınspektory aýyldyq okrýg ákiminiń atyna karantın engizý týraly uıǵarym joldapty. Ákimniń sheshimi shyǵarylyp, ádilet organynda tirkeýden ótýde. Tirkelgen soń karantın jarııalanbaq. Aýrý juqtyrǵan qustardy jınap, respýblıkalyq epızootıkaǵa qarsy otrıadtyń mamandary órteıdi. Karantın jarııalanǵan aýdandarda tumaý belgisi bar qus bitken tolyǵymen joıylady. Joıý barysynda qustardyń jasy, túri kórsetilgen hattamalar toltyrylady. Bul qujat kelgen shyǵyndy zańdy túrde óteýge negiz bolmaq. Al saý qustarǵa vaksına egilip, mamandardyń baqylaýyna alynbaq. Karantın aımaǵy arnaıy blok-bekettermen qorshalyp, saqtandyrý sharalary júrgiziledi.
Mamandardyń aıtýyna qaraǵanda, qus tumaýy jyl qustarynan juqqan. Saqtyq sharalary úshin qus fabrıkalarynyń mańaıynda jabaıy qus qonatyn buta, tal bolmaýy qajet eken.
– Alty aýdanda 7 qus fabrıkasy bar, – deıdi ınspeksııa basshysy Manat Ábdirahmanov, – úı qustarymen qosa eseptegende oblysta 7,2 mln qus bar. Qazir qus tumaýynyń aldyn alý úshin vaksına qoldanýda. Býrabaı, Arshaly, Selınograd aýdandaryndaǵy 4 qus fabrıkasy reseılik vaksınalardy satyp alyp, 1,8 mln qusqa egildi. О́zge aýdandarda da osyndaı jumystar júrgizilýde.
Aqmola oblysy
