Talant – Alladan berilgen erekshe syı desek, kez kelgen adam ol tartýdy enshileı bermesi anyq. Enshilegen jaǵdaıda da ataq pen tanymaldylyqtyń býynan týma tabıǵatyn saqtap, qarapaıym adamı bolmysyna qylaý túsirmeı ótetinderi sırek. Erjan Serikbaevty sol qarapaıymdylyǵyna ómiriniń sońyna deıin noqattaı da daq túsirmeı ótken jan deıdi kózkórgen zamandastary. 50-ge tolýyna úsh aı qalǵanda peshenesine buıyrtqan dám-tuzy taýsylǵan kompozıtordyń baqılyq bolǵanyna qyrkúıek aıynyń 25-inde toǵyz jyl tolady eken. Sazgerdiń úıindegi jeńgemiz Kámılá Serikbaeva jaryna degen saǵynyshymen bólisti:
– Ekeýimiz bir synypta oqyp, keıin bir jerde jumys istedik. Bizdiń Erjan tabıǵatynan óte qarapaıym, uıań bolatyn. Bala kúninen sportpen aınalysty. Sabaǵyn jaqsy oqyp, mýzykany janyna serik etti. Mektepte oqyǵan kezinde ándi kóp aıtpaıtyn. Keıin áskerge baryp ashyldy ǵoı deımin, kelgennen soń án jaza bastady. Shyny kerek, men Erjanǵa emes, eń birinshi ánine ǵashyq bolǵanmyn. Áýelde sábı, mahabbat týraly ándermen bastalǵan ińkárlik keıin úlken týyndylarǵa qaraı aýysty. Eń alǵashqy ánderiniń biri – «Ádemi», odan keıin meniń týǵan kúnime arnalǵan «Injý-marjan» edi. Biraq bastapqyda Erjanǵa kompozıtor retinde qaramadyq. Áýesqoılyqpen týǵan ánderiniń biri ǵoı dep júre berdik. Keıinirek baıqadyq, Erjannyń júreginen mahabbat, saǵynysh sezimi býyrqana tógilip, janymyzdy baýrap aldy, – deıdi kompozıtordyń jary.
Iá, sábıge, jarǵa degen mahabbattan týǵan ánder keıin ata-ana, týǵan jer, Otanǵa degen uly sezimderge ulasty. Erjan Serikbaev án álemine ózgeshe baǵyt, aıryqsha betalyspen keldi. Sazgerdiń bir áni ekinshisine uqsamaıdy. Anaǵa degen mahabbaty bólek bolsa, týǵan jer, otbasy, dosqa degen sezimderi múldem basqa qyrynan jarqyraı ashylyp, shynaıy jetkizilgendiginen bolsa kerek, kez kelgen áni qysqa ǵana ýaqyt ishinde ár júrekten óz ornyn alyp úlgeretin. Án arqyly halqyn qýantatyn da, jylata da alatyn. Tipti el arasynda «Erjannyń ánderi qazaqtyń toı dástúrine dendep enip alǵan ózbek áýenin keıin syrǵytty» deıtin qurmet lebizi de áli kúnge deıin kóp aıtylady. Ásirese sazgerdiń sońǵy jazylǵan týyndylarynyń biri sanalatyn ánshi Dáýren Seıitjanovtyń oryndaýynda halyqqa keńinen tanylǵan «Tańǵy qala» áni óziniń janrlyq ereksheligimen de, áýen qunarymen de tyńdarman júregine myqtap bekidi. «Alǵa, qazaq jigitteri!», «Qazaqstan», «Almaty tańy», «Netken ómir», «Alystaǵy arman», «Aýylym, ańsadym», «Arysym», «Jan áke», «Sen qasymda bolmasań» ánderi qazaqy boıaýymen daralansa, «Seka», «Aı-aı-aı», «Shymkenttiń salqyn syrasy» syndy ázil-qaljyńǵa qurylǵan ánderi jurtshylyq tarapynan jyly qabyldandy. Tipti sońǵy áni Shymkent halqynyń boıtumaryna da aınalyp úlgerdi. Júrekten shyqqan ánniń júrekke jetýi degen osy shyǵar.
Topyraq tartty ma eken, ómirinen qaıtarynan bir kún buryn týǵan jeri Arysqa asyǵys attanypty. Erteńgi kúni qaıǵyly qazaǵa sebepshi bolǵan apatqa ushyraıdy. Jarynyń aıtýynsha, kompozıtor qaı jerde júrse de: «Almatyda, Shymkentte júrip ólip qalmasam eken, meniń armanym – sońǵy demimniń Arysymnyń topyraǵynda úzilgeni», – dep sóz arasynda jıi aıtady eken. Sol tilegi taǵdyrynda oryndaldy.
– Ańsary aýylǵa aýatyn da turatyn. Qalada eń kóp degende eki apta ǵana júredi de, «elimdi, dostarymdy saǵyndym» dep aýylǵa ketip qalatyn. Arystyń jaǵasynda sý keship, jańa ánge shabyt alatyn. «Men ádemi kıinip júrýden de sharshaımyn, jalań aıaq, jalań bas aýyldyń topyraǵyn taptaǵym keledi» deıtin. Ánderiniń deni sol aýyldyń shańyna aýnap-qýnap kelgennen keıin týatyn. Adamnyń ishinde bir názik sezimder bolady ǵoı. «О́ziniń ómirden erte ketetinin sezip júrdi me?», dep oılaımyn keıde. «Taǵdyr joly», «Baıqamaımyz» syndy ánderi arqyly ómirge degen qımastyq sezimin bildirgendeı. Oryndalmaı ketken armandar da ánderiniń negizgi arqaýy bolatyn. 40 jasynan shyǵarmashylyǵyn muń «meńdeı» bastady. Únemi júreginde bir saǵynysh júretin. Shymkent pen Arystyń jaǵasy bir-aq saǵattyq jol ǵoı. Biraq soǵan saǵyna án shyǵaratyn. Almatyda bolsa, shetelde júrgendeı kóńili órekpip, saǵynyshyna erik beretin. Erjan bir orynda otyra almaıtyn, «baratyn jerim, isteıtin sharýam kóp» dep únemi asyǵys júretin. О́mirden de osylaı asyǵys attandy. Jalǵyz-aq kóńilge jubanysh – peshenesine jazylǵan kelte ǵumyrynda Erjanymnyń osynsha dúnıe jasap, halqynyń ulyna aınala alǵany. Aınalasyndaǵy adamdarǵa jasaǵan jaqsylyǵy odan da kóp. Kishipeıil bolatyn, qolynan kelgen kómegin irkip qalǵan emes. Ony kúni búginge deıin barlyǵy aıtyp ta júr. Sońynan qalǵan jalǵyz tuıaǵy – balam Beıbarys ekeýmiz osyǵan shúkirshilik etemiz, – dep jary Kámılá Serikbaeva kóz jasyna erik berdi. Ýaqyt – ózi emshi. Biz jubatýǵa tyryspadyq.
Ýaqyt-aǵzamnyń sazger peshenesine buıyrtqan ǵumyry nebári jarty ǵasyrmen tuıyqtalypty. Osydan týra toǵyz jyl buryn ajal jastyǵyna bas qoıǵan talanttyń beınesi búginde saǵynyshqa aınalyp úlgergenimen, jazyp ketken ánderi sulýlyqqa jany qushtar ár tyńdarmannyń júregin syrly sazymen terbetýde. Demek, sazgerdiń ózi ótkenimen, án-ǵumyr máńgi jasaıdy, jyr-júrek úzdiksiz soǵa beredi...
