Mańǵystaýdaǵy eriktiler týraly sóz qozǵaǵanda aldymen aýyzǵa iligetinderdiń biri – Mańǵystaý oblysynyń volonterler korpýsy. Jastardy qoǵamdyq jumystarǵa tartýǵa jáne óńirdegi volonterlerdiń bilimi men daǵdylaryn damytýǵa atsalysyp júrgen uıymdar quramynda qazir 350-ge jýyq volonter bar.
– Qurylǵanyna 3 jyl bolǵan bastamashyl top 1000-ǵa jýyq volonterdi ómirlik mańyzy bar daǵdylardy qalyptastyrý boıynsha oqytýdan ótkizip, 2 tonna gýmanıtarlyq júk jınalǵan «Shyǵysqa kómek», 4 tonna gýmanıtarlyq júk jınaǵan «Arysqa kómek» jáne 3 tonna gýmanıtarlyq júk jınaǵan «Maqtaaralǵa kómek» aksııasynyń uıymdastyrýshysy boldy. Mańǵystaý oblysynyń volonterler korpýsy Aqtaý qalasyndaǵy 382 otbasyǵa áleýmettik kómek usyndy. Sonymen qatar qaladaǵy múmkindigi shekteýli jáne jalǵyzbasty azamattardyń ótinishterine shuǵyl áleýmettik kómek kórsetý maqsatynda operatıvti shtab jasaqtalyp, nátıjesinde atalǵan kómekke muqtaj 89 azamat turaqty túrde adrestik kómek alýda, deıdi jas ta bolsa bas bolyp, talaı izgi sharalardyń uıytqysy bolyp júrgen Mańǵystaý oblysynyń volonterler korpýsynyń jetekshisi Muqash Oralbaı.
El aýzynda «Bizdiń Muqash» atanǵan jigittiń erikti joldastary óńirdegi qandaı jaǵdaılarda da aldyńǵy qatardan tabylady. Naýryz aıynan bastalǵan indet saldarynan engizilgen tótenshe jaǵdaı kezinde atalǵan korpýsta operatıvti qyzmet kórsetetin quramynda 15 volonter bar volonterlik shtab qurylyp negizgi úsh baǵytta jumys atqardy.
Azamattardy tótenshe jaǵdaı kezindegi qaýipsizdik erejeleri men is-qımyldary, koronavırýstan qorǵaný týraly aqparattandyryp, qala turǵyndaryna arnalǵan aqparattyq ınfografıka ázirleý jáne ony taratý, sondaı-aq maska tigýshiler týraly, jetkizý qyzmeti bar meıramhanalar men dárihanalar týraly aqparattarmen qulaqtandyrý jumystarymen aınalysty. Aqparattyq jumys baǵytynda qala turǵyndaryna 1000-nan asa jadynama taratyp, aıaldamalar men aqparattyq týmbalarǵa, turǵyndar kóp shoǵyrlanǵan oryndarda 300-ge jýyq aqparattyq betshe japsyrdy. Turǵyndarǵa adrestik kómek berýdi nazarda ustaǵan olar elimizde tótenshe jaǵdaı rejimi engizilgennen 3 sáýirge deıin 17 azamatqa adrestik kómek kórsetti.
Erikti jastar óńirde arnaıy shekteýler qoıylyp, keıin karantınge jabylǵannan bastap, úı karantıninde jatqan azamattarmen baılanys ornatty. Respýblıkalyq koronavırýsqa qatysty saýaldar boıynsha baılanys ortalyǵynyń operatorlaryna baılanys nómirleri berilip, baılanysqan azamattardy máselelerdiń ózektiligine baılanysty aýdan jáne qala call-ortalyqtarymen baılanystyrýdy jolǵa qoıyp otyrdy. Volonterler Nur Otan partııasynyń «Birgemiz» aksııasynda kórsetilip jatqan áleýmettik kómekti azamattarǵa jetkizý jumystaryna jumyldyrylǵan, Mańǵystaý oblysynyń volonterler korpýsy volonterleriniń kómegimen 104 azamatqa áleýmettik kómek kórsetildi.
Sondaı-aq M.Oralbaı jetekshilik etetin korpýs eriktileri Mańǵystaý oblysynda júzege asyrylatyn «Birgemiz: Bilim» jobasyna volonterlik qoldaý kórsetýden qalys qalǵan joq. Aımaqta sáýir aıynan bastap Ahmet Baıtursynuly bilim akademııasynyń uıymdastyrýymen «Birgemiz: Bilim» jobasy baǵyttarynyń biri – aýyldyq jerdegi áleýmettik jaǵynan osal topqa jatatyn mektep bitirýshi túlekterge arnalǵan UBT-ǵa daıarlyq kýrsy bastaý alǵan bolatyn. Atalǵan kýrsqa oblys kóleminde 200 oqýshy iriktelip alyndy. Jobany júzege asyrýǵa volonterler korpýsynyń 20 volonteri belsendi atsalysyp, olar oqýshylardyń úı tapsyrmasyn ýaqtyly oryndaýyn qadaǵalady, mentorlyq qoldaý kórsetip, ári bos ýaqytyn tıimdi ótkizýge baǵyttalǵan jumystardy atqardy.
– Mańǵystaý oblysynyń volonterler korpýsynyń pandemııa kezindegi eren eńbegi – volonterlerdiń maýsym-shilde aıy aralyǵynda Aqtaý qalasyndaǵy provızorlyq stansıonarda erikti túrde qyzmet atqarýy. Mańǵystaý oblysynyń volonterler korpýsy volonterleri bir aı kóleminde otbasylarynan jyraqta indetpen betpe-bet kúresýge atsalysty. Olar provızorlyq stansıonardaǵy medısına mamandarynyń senimdi serigi, naýqastardyń kómekshisi bola bildi. Men muny maqtanyshpen aıta alamyn. Jastardyń elge paıdaly jumys istep, belsendi kúshke aınalǵanyna ózimiz de qýanamyz, óńirimizdegi aǵa býyn ókilderi de rızashylyqpen alǵys aıtýda. О́zgege qol ushyn sozyp, múmkindiginshe qolǵabys jasaǵanǵa ne jetsin?! Bul – eki jaqty, ıaǵnı kómek alýshyny da, kómek berýshini de qanattandyryp, mereılendiretin is dep sanaımyn. Bizdiń jigitter men qyzdar áli talaı isti josparlap otyrmyz, qandaı kezde de el ortasynan tabyla beremiz, bastysy – elimiz aman bolsyn, tynyshtyq bolsyn, – deıdi Muqash Oralbaı.
«Jas kelse – iske» deıdi halqymyz. Halyqtyń osy bir ádemi de taǵylymdy naqyl sóziniń aqıqatyn tanytyp júrgendeı kúrdeli isterdiń bel ortasynda júretin óndirdeı uldar men qyzdarǵa qarap rıza bolasyń.
Mańǵystaý oblysy
