Medısına • 23 Qyrkúıek, 2020

MÁMS arqyly qandaı medısınalyq kómekke júginýge bolady?

9 ret kórsetildi

Emhanalardaǵy qabyldaýdan bastap, kúrdeli operasııalarǵa deıin mindetti medısınalyq saqtandyrý júıesi boıynsha júrgiziledi, dep habarlaıdy Egemen.kz elorda ákimdigine silteme jasap.

Qazaqstanda medısınalyq kómek mindetti áleýmettik medısınalyq saqtandyrý júıesi jáne tegin medısınalyq kómektiń kepildik berilgen kólemi sheńberinde kórsetiledi.

Saqtandyrylǵan qazaqstandyqtarǵa emhanalarda emdelý, dárigerler qabyldaýy, zerthanalyq qyzmetter, dıagnostıka, sondaı-aq dári-dármekter qoljetimdi. MÁMS esebinen pasıentter aýrýhanalarda josparly túrde de, kúndizgi stasıonarlar rejıminde de emdele alady.

"Budan basqa, mindetti medısınalyq saqtandyrý júıesine qatysýshylar úshin joǵary tehnologııalyq medısınalyq qyzmetter, ıaǵnı kúrdeli biregeı operasııalar qoljetimdi. Sondaı – aq pallıatıvtik kómek kórsetiledi. Emdelmeıtin, ómirge qaýip tóndiretin jáne aýyr ótetin aýrýlary bar pasıentterdiń ómir súrý sapasyn barynsha qolaıly deńgeıde ustaý", dedi № 4 qalalyq emhananyń meıirbıke isiniń menedjeri Janar Nazarova.

Budan basqa, medısınalyq saqtandyrý júıesi boıynsha syrqatynan keıin turaqty bógde adamnyń kútimine nemese qaraýyna muqtaj naýqastrǵa meıirgerlik kútim kórsetiledi.

Áleýmettik medısınalyq saqtandyrý júıesine qatysý úshin mindetti medısınalyq saqtandyrý qoryna (MÁSQ) aýdarymdar túsip turýy qajet. Ony ne jumys berýshi, ne derbes tóleýshiler tóleıdi. Osylaısha, 2020 jylǵy 1 qańtardan bastap jumys berýshiler árbir qyzmetkerdiń tabysynan 2%-yn, JK-1,4 ETJ-nyń 5%-yn, azamattyq-quqyqtyq sharttar boıynsha jumys isteıtin adamdar - tabysynyń 1% -yn, qyzmetkerler-tabysynyń 1%-yn, derbes tóleýshiler-1 ETJ-nyń 5%-yn MÁS-ke aýdarýy tıis.

Saqtandyrý aýdarymdary men jarnalary tabystyń mynadaı túrlerinen tólenbeıdi: qyzmettik issaparlar jáne jumystyń júrip-turý sıpaty kezindegi ótemaqylar; qyzmetkerlerdiń dalalyq jabdyqtalymy; bıýdjet qarajatynan qyzmetkerlerdi oqytýǵa aqy tóleýge, járdemaqylar men ótemaqylarǵa jetkizýge baılanysty shyǵystar; saýyqtyrýǵa arnalǵan demalysqa arnalǵan járdemaqy, medısınalyq qyzmetterge aqy tóleý úshin, bala týǵan kezde, jerleýge arnalǵan tólemder 8 eń tómengi jalaqy (ETJ) sheginde; Stıpendııalar; saqtandyrý syılyqaqylary.

"Jumys berýshi sondaı-aq azamattardyń áleýmettik osal toptaryna jatatyn jumyskerler úshin, áskerı qyzmetshiler, arnaýly memlekettik organdardyń qyzmetkerleri jáne quqyq qorǵaý organdarynyń qyzmetkerleri úshin tólemderden bosatylady", dep tolyqtyrdy Janar Nazarova.

Memleket tarapynan MÁSQ-qa jarna tóleıtin azamattar sanaty bar. Atap aıtqanda, olarǵa: jumyspen qamtý ortalyqtarynda tirkelgen jumyssyz balalar, jumys istemeıtin júkti áıelder; bala (balalar) úsh jasqa tolǵanǵa deıin ony (olardy) tárbıelep otyrǵan jumys istemeıtin adam; júktilikke jáne bosanýǵa, jańa týǵan balany (balalardy) asyrap alýǵa baılanysty, bala (balalar) úsh jasqa tolǵanǵa deıin onyń (olardyń) kútimine baılanysty demalysta júrgen adamdar; múgedek balany (balalardy) kútip-baǵýdy júzege asyratyn jumys istemeıtin adamdar jatady; bala kezinen birinshi toptaǵy múgedekke kútimdi júzege asyratyn jumys istemeıtin adamdar; zeınetaqy tólemderin alýshylar, onyń ishinde Uly Otan soǵysynyń qatysýshylary men múgedekteri; qylmystyq-atqarý (penıtensıarlyq) júıesi mekemelerinde (qaýipsizdigi barynsha tómen mekemelerdi qospaǵanda) sot úkimi boıynsha jazasyn ótep júrgen adamdar; tergeý ızolıatorlaryndaǵy adamdar; jumys istemeıtin oralmandar; "Altyn alqa", "Kúmis alqa" alqalarymen nagradtalǵan nemese buryn "Batyr Ana" ataǵyn alǵan, sondaı-aq I jáne II dárejeli "Ana dańqy" ordenderimen nagradtalǵan kóp balaly analar; orta, tehnıkalyq jáne kásiptik, orta bilimnen keıingi, joǵary bilim berý, sondaı-aq joǵary oqý ornynan keıingi bilim berý uıymdarynda kúndizgi oqý nysanynda bilim alyp jatqan adamdar; memlekettik ataýly áleýmettik kómekti jumys istemeı alýshylar.

MÁMS aıasynda qyzmet kórsetý boıynsha barlyq suraqtar men shaǵymdardy 1406 tegin nómiri boıynsha áleýmettik medısınalyq saqtandyrý qorynyń call-ortalyǵyna jiberýge bolady. Sondaı-aq ótinishti Qoldau 24/7 qosymshasynda jáne https://t.me/SaqtandyryBot telegram-botta qaldyrýǵa bolady.

Sońǵy jańalyqtar

Namysyn tý etken

Rýhanııat • Keshe

Uqsas jańalyqtar