Aımaqtar • 23 Qyrkúıek, 2020

Tutastyqtyń tuǵyr dińi

10 ret kórsetildi

Adam janyn gúldetetin qaıyrymdylyq – shýaqty da shyraıly asyl qasıet. Elimizde óris alǵan qaıyrymdylyq sharasy aıasynda óńirde segizinshi adam baspanaly bolyp otyr. Ánsheıinde kóńil aýdara bermegenimizben, osy bir janashyrlyq istiń aıasynda kómek qolyn sozǵan kópshiliktiń boıyndaǵy kisilik pen kishiliktiń, ajarly azamattyqtyń meılinshe mol ekendigin kórgende, baıandy bolashaqqa degen el senimi de nyǵaıa túsedi, dep habarlaıdy Egemen.kz.

"Qareket" qaıyrymdylyq qory taıaýda kókshetaýlyq kópbalaly otbasyna jyly da jaryq, jaıly páterdiń kiltin syılady. Jańa páterdiń jyly bolǵany janǵa jaıly. Al, tóńiregindegi adamdardyń júrek jylýy odan da ystyq. Kóńilińdi demdeıdi ári qysylyp-qymtyrylsań taıanysh bolar el-jurtyń bar ekenin eske salady. Qala turǵyny Naýryzgúl Tursynova kópbalaly ana. Osydan eki jyl buryn taǵdyrdyń jazýymen jarynan aırylyp, qazaqtyń jalpaq tilimen aıtqanda, otyz omyrtqasy opyrylyp, qyryq qabyrǵasy qaýsap qalǵan bolatyn. Shıetteı tórt balasyn jetektep qalanyń ár buryshynan arzanqoldaý páter izdep, talaı úıdiń tabaldyryǵyn tozdyrdy. Basyńa tartqan kórpe aıaǵyńa jetpegen soń kisige kúniń túsedi emes pe? 

Ilkidegi jurt jetimi men jesirin jylatpaǵan. San ǵasyr boıy el birligine ózek bolyp kele jatqan osy bir qaıyrymdylyq qaǵıda áli de bar. Bar bolǵanda qandaı?! Qarapaıym jurt óz aýzynan jyryp degendeı, qaıyrymdylyq qoryna qoldan kelgeninshe aqsha aýdaryp jatyr. Aqsha emes, jan jylýyn tógip jatyr. Ilkimdi kómektiń arqasynda bul joly baspananyń taqsyretin tartyp kelgen kópbalaly anaǵa aýmaǵy 43 sharshy metrdi quraıtyn eki bólmeli páter syıǵa tartyldy. Qolyna baspana kiltin ustaǵan sátte ananyń júzin jas jýyp ketti. Qatal taǵdyrdyń qatygezdigin kóp kórgen, jany júdegen ananyń osy bir kóńil tolqynysy kóp jaıdy ańǵartyp turǵandaı. О́kinishtiń jasy emes, halqynyń qamqorlyǵyna degen qýanyshtyń jasyndaı.

–Halqymnan aınalaıyn, – deıdi kópbalaly ana Naýryzgúl Tursynova, – bir baspanaǵa qolymyz jetse degen armanymyz oryndalmastaı bolyp edi. О́z basym tózer edim ǵoı, balalarymnyń qýanǵanyn kórseńiz. Aq nıetińnen aınalaıyn, aq júrekti jurt!

Sóz arasynda qordyń elimizde 288, al, bizdiń oblysta 8 páter tabystap otyrǵanyn aıtatuǵyn bolsaq, kópkórim tamasha kórsetkish.

–Qor osydan úsh jyl buryn qurylǵan, – deıdi qor ókili Meıirbek Nurmahan, – osy baspanany alýǵa nebary 15 kún ýaqyt jumsadyq. Mereıli eldiń meıiri mol ǵoı, aldymen otbasynyń jaıyn bilgen bolatynbyz. Endi mine, ana men bala qýanǵan aqjarylqap kún týdy.

Qaıyrymy mol qoǵamda ónege de az emes qoı. Baspanaly bolǵan anaǵa eriktiler tobynyń bir jyl boıy úzbeı kómektesip, joq-jitigin bútindeýge tyrysyp kelgendigin aıta ketsek te bolar. Atyn aıtqysy kelmegen jomart jandar páter aqysyn da tólep bergen. Osy bir jaıdyń ózi el ishinde eshkimniń taǵdyrdyń tálkegimen jekpe-jek qalmaıtynyǵyn kórsetedi emes pe? Ertedegi esti qarııalar "el ishi – altyn besik"  dep táýbe etip otyrýshy edi. Alash jurtynyń boıynda dál osyndaı júregińdi tebirenter jaqsy dástúr barda, máńgilik eldiń etek-jeńi qymtalyp, birturtas bola túsedi. Tutastyqtyń tuǵyr dińi – qaıyrymdylyq.

 

Aqmola oblysy

Sońǵy jańalyqtar

Atyraýda 9 balany ıt talady

Aımaqtar • Keshe

Taraz qalasynda gaz qubyry jaryldy

Aımaqtar • 23 Qazan, 2020

Syrda kúrishten rekordtyq ónim jınaldy

Aımaqtar • 23 Qazan, 2020

Qazaqstanda sýdıalardyń jalaqysy qansha?

Qazaqstan • 23 Qazan, 2020

Elimizde jańbyr jaýyp, sońy qarǵa ulasady

Aýa raıy • 23 Qazan, 2020

Shyǵysta eki azamat zańsyz balyq aýlaǵan

Aımaqtar • 23 Qazan, 2020

Uqsas jańalyqtar