Oǵy oqpannan shyǵarylmaı tastaı salǵan myltyq janǵan ottyń janynda jatsa ózdiginen atylyp, bireýdi mert qylmasa da jaralaýy ábden múmkin. Al ańshylardyń kóbi myltyqtyń qatań saqtalýyna mán bere qoımaıdy.
Mine, osyndaı ańshylarmen ýchaskelik ınspektorlar jáne tabıǵatty qorǵaý polısııasy ańshylyq sharýashylyǵyndaǵy qoryqshylarymen birlese otyryp, áńgime ótkizip, myltyqty qaýipsiz saqtaýdyń erejelerin esterine salyp otyrady.
Oblystyq PD Ákimshilik polısııa basqarmasy azamattyq jáne qyzmettik qarý aınalymyn baqylaý tobynyń aǵa ınspektory, polısııa maıory Qurman Mýsın qarýdy satyp alý, saqtaý nemese tasymaldaý qaǵıdalaryn buzǵany úshin jyl basynan beri 429 hattama toltyrylǵanyn aıtty. Ákimshilik kodekstiń osy buzýshylyqtyń jazalaıtyn babyna sáıkes jeke tulǵalarǵa on aılyq eseptik kórsetkish mólsherinde aıyppul salynǵan.
Ańshylar qajetti qujattardyń tizimin bilýi, sondaı-aq kásipshilik nemese sporttyq ań aýlaý kezinde 2015 jylǵy 27 aqpandaǵy Aýyl sharýashylyǵy mınıstriniń buıryǵymen bekitilgen «Ań aýlaý qaǵıdalaryna» sáıkes qarýdy tasymaldaý talaptaryn múltiksiz saqtaýlary qajet. Joldamanyń qoldanylý aýmaǵynan tys jerde ańshy atys qarýyn oǵy alynǵan jáne bólshektengen kúıde ustaýy kerek. Sonymen qatar ań aýlaý kezinde ishimdik ishýge tyıym salynady. Alaıda osy talapty saqtaıtyn ańshylar az.
Tirkelmegen qarýdy ustap júretin ańshylar da kezdesedi. Ondaı qarý birden tárkilenedi. «Eger siz tirkelmegen qarý taýyp alsańyz nemese ol qaıtys bolǵan týystaryńyzdan qalǵan jáne taǵy basqa jaǵdaıda tabylǵan bolsa – bul jaıynda «102» nómiri boıynsha shuǵyl polısııaǵa habarlaý qajettigin esterińizge salamyz», – deıdi Qurman Mýsın. – «Mekenjaıǵa jedel-tergeý toby baryp, qarý belgilengen tártip boıynsha alynatyn bolady. Qarýdy erikti túrde tapsyrý, eger adamnyń is-áreketinde ózge qylmys quramy bolmaǵan jaǵdaıda qylmystyq nemese ákimshilik jaýapkershilikten bosatylady».
Jalpy, jyl basynan beri oblys aýmaǵynda otty qarýǵa baılanysty 661 quqyq ákimshilik buzýshylyq anyqtalǵan.
Soltústik Qazaqstan oblysy
