Nysannyń bıiktigi 30 metr bolady. Monýment qurylysyn "Temir-Baılyq" jaýapkershiligi shekteýli seriktestigi júrgizgen. Oǵan 158 mıllıon teńge jumsalǵan. Monýmentte qazaq jerinde turatyn túrli ult pen ulystyń elge degen alǵysy men rızashylyǵynyń sımvolıkalyq kórinisi beınelengen. Atalǵan nysannyń ashylý saltanatyna Jambyl oblysynyń ákimi Berdibek Saparbaev qatysty.
"Táýelsizdiktiń alǵashqy jyldarynan bastap elimizdiń Tuńǵysh Prezıdenti – Elbasy Nursultan Nazarbaevtyń sarabdal saıasatynyń nátıjesinde kópultty elimizde halyqtar dostyǵy, birlik, tatýlyq pen turaqtylyq saltanat qurýda. Árıne 29 jyl tarıh úshin qas-qaǵym sát. Degenmen, elimiz osy ýaqyt aralyǵynda tolaıym tabystarǵa, úlken jetistikterge jetti. Elimizdiń eń mańyzdy jetistikteriniń biri – kópultty qoǵamda beıbitshilik pen kelisimdi saqtaý bolyp tabylady. Bizdiń basty baılyǵymyz – eldegi tynyshtyq pen turaqtylyq. Elimiz egemendik alǵaly beıbit ómir súrýdiń ónegesin kórsetip keledi. Tatýlyq pen beıbitshilikti, qoǵamdyq turaqtylyqty nyǵaıtý maqsatynda qyrýar jumystar atqarylýda. Ashylyp otyrǵan "Qazaq eline myń alǵys" monýmenti de osy sózimizdiń aıǵaǵy. Osydan eki jyl buryn Nursultan Ábishuly elimizdegi barlyq oblys ortalyqtarynda "Qazaq eline myń alǵys" monýmentin salý týraly tapsyrma bergen bolatyn. Monýment – barlyq ult ókilderiniń qazaq halqyna degen rızashylyǵynyń belgisi", dedi ol.
Saltanatty jıynda "Dnepro" ýkraın etnomádenı birlestiginiń tóraǵasy Fedor Klımenko, M.H.Dýlatı atyndaǵy Taraz óńirlik ýnıversıteti "Qazaqstan halqy Assambleıasy" kafedrasynyń meńgerýshisi Parıda Mamedova sóz sóılep, qazaq halqyna degen alǵysyn bildirdi.
Sondaı-aq Taraz qalasynda "Arbat-1" demalys orny da el ıgiligine berildi. Arbat qurylysyn júrgizgen "Temir-Baılyq" seriktestiginiń brıgadıri Erkin Sedelhannyń aıtýynsha, jumys úsh aıǵa sozylyp, 200-ge jýyq qala turǵyny jumyspen qamtylǵan. Demalys ornynda qurǵaq jáne uzyndyǵy 20 metrge deıin jetetin túrli-tústi sýburqaqtar ornalasqan. Odan bólek, munda qala turǵyndarynyń tynyǵyp, bos ýaqytyn tıimdi ótkizýine, alańsyz demalýyna barlyq jaǵdaı jasalǵan. Berdibek Saparbaev atalǵan demalys ornyn aralap kórip, qurylys jumysyna oń baǵasyn berdi.
