«Nazarbaev zııatkerlik mektepteri» derbes bilim berý uıymynyń bilim berý baǵdarlamalary ortalyǵy elimizdiń qazaq tili muǵalimderi úshin respýblıkalyq forým uıymdastyrdy.
«Nazarbaev zııatkerlik mektepteri» derbes bilim berý uıymynyń bilim berý baǵdarlamalary ortalyǵy elimizdiń qazaq tili muǵalimderi úshin respýblıkalyq forým uıymdastyrdy.
Qazaq tilin oqytýdaǵy Nazarbaev zııatkerlik mektepteriniń tájirıbesin jalpy bilim beretin mektepter arasynda taratý, qazaq tilin oqytýdaǵy jańa tásilder men ádistemelerdi bólisý, úshtuǵyrly til saıasatynyń sheńberinde qazaq tiliniń mártebesin ósirip, qoldanylý aıasyn keńeıtý joldaryn qarastyrý maqsatynda ótkizilgen shara bilim berý salasyndaǵy 300-ge tarta mamannyń basyn qosty. Atap aıtsaq, Bilim jáne ǵylym mınıstrliginiń, Y. Altynsarın atyndaǵy Ulttyq bilim berý akademııasynyń, Zııatkerlik mektepterdiń, olarmen áriptestik júrgizetin bazalyq mektepter men elimizdiń ár óńirindegi jalpy bilim beretin orta mektepterdiń ókilderi keldi, bul forýmǵa.
Forýmdy qysqasha sóz sóılep ashqan «Nazarbaev zııatkerlik mektepteri» derbes bilim berý uıymynyń basqarma tóraıymy Kúlásh Shamshıdınova memlekettik tildiń damýyna erekshe úlesin qosyp júrgen áriptesteriniń eńbegin joǵary baǵalaı kelip, zamanynda básekelestikke qabiletti jas urpaqty tárbıelep, ósirýde jalǵyz ǵana qazaq tiliniń azdyq etetinin, Elbasymyzdyń bastamasymen qolǵa alynǵan úshtuǵyrly til saıasatynyń alǵa qoıyp otyrǵan maqsattaryna qol jetkizý úshin áli de aıanbaı ter tógý qajet ekendigin atap kórsetti.
– Biz ózge tilderdi jan-jaqty damý úshin úırenemiz. Árıne, qazaq tili únemi birinshi orynda turýy kerek, – dedi K.Shamshıdınova.
Forýmnyń plenarlyq bóliminde bilim berý baǵdarlamalary ortalyǵynyń aǵa menedjerleri Janabaı Abýov pen Leıla Nuraqaeva jınalǵandardy Zııatkerlik mektepterde qoldanylatyn kiriktirilgen bilim berý baǵdarlamalarymen tanystyrdy. Bul baǵdarlamalar bilim berý prosesiniń negizin quraıdy, olar otandyq jáne halyqaralyq tájirıbeniń ozyq úlgilerin kiriktiredi. Atalǵan qujattardy ázirleýge Zııatkerlik mektepterdiń praktık muǵalimderi men Kembrıdj halyqaralyq emtıhan keńesiniń mamandary atsalysty.
Qazaq tilin oqytýda basty nazar oqýshylardyń sóıleý, tyńdaý, aıtý jáne estý daǵdylaryn damytýǵa aýdarylady. Bul daǵdylardy damytý oqýshylardyń aqparatty ózdiginen izdep, taýyp, zerttep, zerdelep, keregin iriktep ala alatyn, óz pikirin dálelmen, dáıekpen óre biletin tulǵa bolyp qalyptasýyna septigin tıgizbek.
Forýmǵa qatysyp, baıandama jasaǵan halyqaralyq sarapshy – qostildi oqytýdy ázirlep, basqarý jónindegi keńesshi, PhD Pıter Mehısto pánniń mazmunyna negizdelgen tildi oqytý mańyzyna toqtalyp ótti. Zııatkerlik mektepterdiń qazirgi qoldanyp otyrǵan ádisi de pán men tildi kiriktirip, til sabaqtarynda pán mazmunyn, al pán sabaqtarynda tildi qosa úıretýge kóńil bólýge negizdeledi. Úshtuǵyrly til saıasatyn qoldaıtyn Zııatkerlik mektepterde oqýshylardyń oqý tiline qaramastan, birqatar pánderdiń qazaq, birqatarynyń orys, al taǵy birazynyń taza aǵylshyn tilinde oqytylýy qazirgi tańnyń ózinde jemisin berip keledi. Ana tili emes, ózge tilde pándi oqı bastaǵanda, áýeli biraz qınalatyn oqýshylar kezdesse de, ýaqyt óte kele pán boıynsha tıisti bilimdi de, tildi de erkin meńgerip, oqyp otyrǵan tilinde ana tilinen kem sóılemeıtinine kóz jetkizilýde.
Forým aıasynda Zııatkerlik mektepterdiń muǵalimderi óz tájirıbesinde qoldanatyn oqytýdaǵy ınnovasııalyq ádisteri boıynsha sheberlik saǵattaryn ótkizdi. Jalpy, bilim beretin mektepterdiń muǵalimderi óz tájirıbelerinde qoldanýǵa bolatyn birqatar jańa ádis-tásilderdi, sabaq úlgilerin kórip, suraq-jaýap almasty. Sondaı-aq, forým barysynda Zııatkerlik mektep muǵalimderi daıyndaǵan ádistemelik quraldardyń kórmesi ótkizildi. Forým qatysýshylary Ortalyq mamandary ázirlegen Pán men tildi kiriktirip oqytý ádisi boıynsha ádistemelikti, Kókshetaý qalasynyń fızıka-matematıka baǵytyndaǵy Zııatkerlik mektebi muǵalimderi daıyndaǵan qazaq tili boıynsha ozyq tájirıbeler, úlgiler jınaqtalǵan quraldy enshilep, oljaly qaıtty.
Forým sońynda qatysýshylar dıalog alańyna jınalyp, alǵan áserlerimen bólisti. «Qazaq tiliniń qoldanylý aıasyn keńeıtýdegi ınnovasııalyq ádisterdiń mańyzy», «Pándik-tildik kiriktirilgen bilim berý ádisiniń ekinshi tildi oqytýdaǵy múmkindikteri» jáne «Oqýshylardyń kommýnıkatıvtik daǵdylaryn damytý – ýaqyt talaby» taqyryptarynda ótkizilgen talqylaýlarda muǵalimder qaýymy óz oı-pikirlerin aıtty. Olar bul sharany uıymdastyrýshylarǵa rızashylyqtaryn bildirip, qazaq tiliniń qoldanylý aıasyn keńeıtýde jınaqtalǵan tájirıbeni el aýmaǵynda taratý qajettigi týraly tilekterin bildirdi.
Botagóz QAZBEK,
Bilim berý baǵdarlamalary ortalyǵy redaksııalyq
bóliminiń aǵa menedjer-redaktory.
