Búgin depýtattar "2014 jylǵy 29 mamyrdaǵy Eýrazııalyq ekonomıkalyq odaq týraly shartqa Qyrǵyz Respýblıkasynyń qosylýyna baılanysty Qyrǵyz Respýblıkasynyń 2014 jylǵy 29 mamyrdaǵy Eýrazııalyq ekonomıkalyq odaq týraly shartty, Eýrazııalyq ekonomıkalyq odaqtyń quqyǵyna kiretin jekelegen halyqaralyq sharttardy jáne Eýrazııalyq ekonomıkalyq odaq organdarynyń aktilerin qoldanýy jónindegi jaǵdaılar men ótpeli erejeler týraly 2015 jylǵy 8 mamyrda qol qoıylǵan hattamaǵa ózgeris engizý týraly hattamany ratıfıkasııalaý týraly" zańdy qabyldady.
Zańǵa sáıkes, 2021 jylǵy 15 tamyzǵa deıin Qyrǵyzstan Eýrazııalyq ekonomıkalyq odaqtyń talaptaryna sáıkes EAEO kedendik shekarasyndaǵy ótkizý pýnkterin jańǵyrtýǵa tıis. Veterınarııalyq, sanıtarııalyq, fıtosanıtarııalyq, radıasııalyq baqylaý júrgizýge arnalǵan jabdyqty jáne kedendik baqylaý júrgizýge arnalǵan tasymaldanatyn jabdyqty, onyń ishinde tekserip qaraýǵa arnalǵan rentgen tehnıkasyn ornatýy qajet.
"Qyrǵyzstannyń keden beketterinde zamanaýı jabdyqtar ornatylýda, onyń kómegimen laýazymdy tulǵanyń qatysýynsyz skanerleý arqyly taýarlardy baqylaý júzege asyrylatyn bolady. Barlyǵy avtomattandyrylǵan: aqparat skanerlenip, ortalyq keden organyna beriletin bolady, onda qajetti monıtorıng júrgiziledi. О́tkizý pýnkterinde taýardy sáıkes emes ataýmen deklarasııalaý jaǵdaılaryn anyqtaýǵa kómektesetin táýekelderdi basqarý júıesin qoldaný josparlanýda", dedi depýtat Sergeı Karplıýk.
Sondaı-aq senat depýtattary "Qazaqstan Respýblıkasy men Birikken Arab Ámirlikteri arasyndaǵy sottalǵan adamdardy berý týraly shartty ratıfıkasııalaý týraly" zań qabyldady. Shart bas bostandyǵynan aıyrý túrindegi jazany óz otanynda odan ári óteý úshin sottalǵan adamdardy eki memleket arasynda aýystyrý múmkindigine baılanysty máselelerdi retteıdi.
"Qazir Birikken Arab Ámirlikterinde, ókinishke oraı, bizdiń 6 azamatymyz, onyń ishinde 5 er adam jáne bir áıel adam qamaýda otyr. Tıisinshe, osy zańǵa el Prezıdenti qol qoıǵan kezde Qazaqstan Respýblıkasynyń Bas prokýratýrasy ýákiletti organ retinde olardy otanyna qaıtarý sharalaryn qabyldaıtyn bolady", dedi depýtat Sáýle Aıtpaeva.
Sonymen qatar, Senattyń jalpy otyrysynda depýtattar birqatar saýaldar joldady. Senator Olga Perepechınanyń úndeýi 4 deńgeıdegi bıýdjetti jáne jergilikti ózin-ózi basqarýdyń qarjylyq táýelsizdigin engizýge qatysty boldy. Narıman Tóreǵalıev ınternette balalardy qorlaýdan qorǵaý qajettiligi týraly málimdedi. Álimjan Qurtaev UOS tutqyndaryn ońaltý týraly usynysyn jetkizdi. Depýtat Andreı Lýkın otandyq taýarlardy akkredıtteýge jáne sertıfıkattaýǵa baılanysty máselelerdi qozǵady. Al senator Dana Nurjigitova balalardyń quqyqtaryn qorǵaý boıynsha sharalar qabyldaý qajettigi týraly saýal joldady. Elimizdiń batysyndaǵy respýblıkalyq joldardyń qurylysyna baılanysty problemalar depýtat Ǵumar Dúısembaevtyń saýalynda aıtyldy.
