"Mýzeı ashý ıdeıasy alǵash ret 2018 jyly aýdandyq balalar-jasóspirimder sport mektebiniń 50 jyldyq mereıtoıyn ótkizgen ýaqytta týǵan bolatyn. Sodan beri qolda bar aqparatpen qatar, sport ardagerleri, sala mamandarymen aqyldasyp, qundy jádiger, qujattar jınaqtaı bastadyq. Sport mýzeıi ashylmas buryn Bórli aýdandyq ólketaný murajaıynda 2 apta boıy sport aptalyǵy ótti. Jas sportshylar úshin sport salasyn qamtıtyn mýzeıdiń qajet ekendigin sol kezde túsingen edik", - deıdi Bórli aýdandyq dene shynyqtyrý jáne sport bóliminiń basshysy Armat Isanov.
Qarashyǵanaq sport kesheninde ornalasqan mýzeı bólmesinde qazirdiń ózinde 7 ekspozısııa bar. Munda erekshe qundy jádigerler arasynda áıelder kúresinen Rıo olımpıadasynyń qola júldegeri, aqsaılyq Ekaterına Larıonovanyń kúres kostıýmy, sambodan azııa chempıony Temirlan Kólbaevtyń "sambovkasy", para-taekvondodan Evropa chempıony, Azııanyń 3 dúrkin qola júldegeri Málik Muqashevtyń kımonosy, t.b. zattar qoıylǵan. Bir qyzyǵy, "Aqsaıda sport mýzeıi ashyldy" degen habardy estigeli alys-jaqynnan habarlasyp, aýdannyń sport tarıhyna qatysty qyzyqty aqparatpen bóliskender, kóne jádigerlerdi tabys etkisi keletinder kóbeıipti.
Iá, aýdannyń sport salasyndaǵy jetistikteri az emes. Mýzeıde jergilikti sportshylarynyń jetistikteri, osy óńirde dúnıege kelip, sport jolyn osy jerde bastaǵan, keıin ózge jaqqa, tipti shetelge qonys aýdaryp ketken sportshylar týraly, sport salasynda eńbek etken sala mamandary, sport ardagerleri men sport salasyndaǵy eleýli oqıǵalary qamtylǵan. 1968 jyly ashylǵan sport mektebiniń alǵashqy jattyqtyrýshylary, sportshylardyń jetistikteri, aýdanda ótken iri sporttyq jarystar, aýdan qurama komandasynyń jetistikteri, aýdanǵa kelgen olımpıada jeńimpazdary týraly jáne sport bóliminiń, sport mektebiniń basshylary týraly aqparattar kóz tartady.
"Sport – balalar men jasóspirimderdi patrıottyq tárbıege, salaýatty ómirge shaqyratyn erekshe álem ǵoı. Sondyqtan osy mýzeıdiń áleýetin biz aýdandaǵy balalar tárbıesinde, bilim júıesinde tolyq paıdalanǵymyz keledi. Karantın joıylyp, dástúrli bilim júıesi qalypqa kelse, aýdan mektepteriniń oqýshylary úshin mýzeıge turaqty ekskýrsııa uıymdastyrǵymyz keledi", - deıdi Armat Isanov.
