Qoǵam • 24 Qyrkúıek, 2020

Balalardy kıberbýllıngten qorǵaý mańyzdy - senator

48 ret kórsetildi

Narıman Tóreǵalıev vıse-spıker N.Ábdirov jáne ózge de senatorlar bastaǵan depýtattyq toptyń atynan Premer-Mınıstrge saýal joldady. Onda jasóspirimderdi kıberbýllıngten qorǵaý sharalarynyń qajet ekeni aıtylǵan. Bul taqyryp sońǵy ýaqytta BAQ-ta qyzý talqylanýda. Sonymen qatar Memleket basshysy Qazaqstan halqyna arnaǵan Joldaýynda kıberbýllıng máselesine aıryqsha nazar aýdarǵan bolatyn, dep habarlaıdy Egemen.kz.

Depýtattyń aıtýynsha álemdik statıstıka boıynsha adam kúnine 6-7 saǵat ınternette otyrady. Sondyqtan kıberbýllıngtiń qurbany kez kelgen adam bolýy múmkin. Alaıda, zardap shekkender men olardyń qýdalaýshylarynyń negizgi jasy 11-16 jas aralyǵyndaǵy jasóspirimder, demek elimizdegi jasóspirimderdiń 12%-ǵa jýyǵy osy kıberbýllıngten zardap shegip otyrǵanyn jetkizdi.

Depýtat "Áleýmettik jeliler arqyly taralǵan oıyndar "Kók kıt", "Tynysh úı", "Qyzyl japalaq", "Meni saǵat 04:20-da oıat" t.b. dúnıe júzin dúrliktip qana qoımaı endi osyndaı oıyndar qazaq tilinde paıda bola bastaǵany qoǵamdy alańdatýda. Ishki ister mınıstrliginiń málimetine sáıkes Arys qalasynyń  turǵyny "Vkontakte" áleýmettik jelisi jáne "Telegram" messendjeri arqyly balalardy sýısıdtik sıpattaǵy oıyndarǵa tartqany  anyqtaldy. Sondyqtan dál qazirgi qoǵam úshin adamnyń quqyqtaryn, sonyń ishinde balalardyń quqyqtaryn qorǵaý, olardy býllıng pen kıberbýllıngten saqtaý mańyzdy", - dedi.

Depýtat balalardy ınternette qorlaýdan qorǵaýǵa qatysty álemdik tájirıbelerden mysal keltirdi. "Álemde kóptegen elder, ınternet-platformalardyń qaýipsizdik deńgeıin arttyrý, zańnama boıynsha jumys isteý jáne balalardy, olardyń ata-analaryn kıberbýllıngten qorǵaý maqsatynda tıisti zańdardy qabyldaýda. Germanııada kıberbýllıng uıymdastyrǵan azamattar  10 jylǵa deıin bas bostandyǵynan aıyrylýy múmkin bolsa, Reseıde Qylmystyq Kodeks pen Ákimshilik Kodekske túzetýler engizý qoldaý tapty", - dedi Narıman Tóreǵalıev.

Depýtat kıberbýllıngtiń aldyn alý úshin birqatar naqty sharany qabyldaý qajet ekenin aıtty.

"Birinshiden, býllıng pen kıberbýllıngke tosqaýyl qoıý úshin ınternettegi paraqshalar men messendjerlerdegi toptarǵa monıtorıngti kúsheıtý, mektepter men oqý oryndarynda "Kıberbýllıngtiń zardaptary" taqyrybyndaǵy tárbıe saǵattaryn ótkizý, arnaıy mamandardy daıyndaý,  muǵalimder men ata-analarǵa túsindirme jumystaryn júrgizý, ınformatıka pánine kıberbýllıngke qarsy qosymsha sabaqtar engizý kerek; ekinshiden, balalardyń ınternettegi qaýipsizdigi men qorǵalýyn qamtamasyz etetin Ulttyq joba ázirleý qajet; úshinshiden, jekelegen memleketterde kıberbýllıngti qylmystyq áreket retinde qarastyratyn zańdar qoldanylatynyn eskere otyryp, osy elderdiń zańnamasyn zerdeleý, sondaı-aq Qazaqstanda bar praktıkany taldaý qajet", - dedi senator.

Sońǵy jańalyqtar

Namysyn tý etken

Rýhanııat • Keshe

Koronavırýstan qalaı qorǵanamyz?

Koronavırýs • Keshe

Uqsas jańalyqtar