Pikir • 24 Qyrkúıek, 2020

Dana Nurjigit balalarǵa qarsy qastandyq úshin jazany qatańdatýdy surady

188 ret kórsetildi

Senator Dana Nurjigit Senattyń jalpy otyrysynda QR Bas prokýroryna depýtattyq saýal joldady, dep habarlaıdy Egemen.kz

"Halyqaralyq tájirıbıeni saralap, qylmystyq zańnama qoldanysyn taldap, balalarǵa qarsy jynystyq sıpatta jasalǵan qylmystyń barlyq túrilerine qatysty jazany qaıta qarap, qatańdatý boıynsha usynystar ázirleýdi suraımyz", dedi senator óz saýalynda.

Sondaı-aq depýtat Memleket basshysynyń osy másele boıynsha bergen tapsyrmasynyń oryndalý barysy týraly aqparat berýdi surap, bul saladaǵy halyqaralyq konvensııalarǵa qosylý jáne ımplementasııalaý boıynsha zańnamalyq usynystar engizý qajettigin atap ótti.

Depýtat keltirgen statıstıka boıynsha, Qazaqstanda sońǵy 4 jylda osyndaı qylmystar úshin 1868 adam kináli dep tanylǵan. Olardyń 539-y ǵana 10 jylǵa deıingi merzimge bas bostandyǵynan aıyrylǵan. Bıyldyń ózinde ǵana kámeletke tolmaǵan balalarǵa qarsy jasalǵan qylmys 8 paıyzǵa ósken.

"Muny toqtatý úshin qatań jaza qylmysty jasaǵan adamǵa ǵana emes, sol qylmysqa jol bergen, faktilerdi jasyrǵan, qylmyskerdiń jaltarýyna múmkindik bergen azamattarǵa da qoldanylýy kerek dep oılaımyz", deıdi Senat depýtaty.

Sonymen birge D.Nurjigit Qazaqstan Halyqaralyq deńgeıde balalardy qorǵaıtyn eki mańyzdy qujatqa áli qol qoımaǵanyna nazar aýdardy. Olar: "Birinshi, Balalar quqyqtary týraly konvensııanyń úshinshi fakýltatıvtik hattamasy. Ekinshi, Eýropa Odaǵynyń balalardy seksýaldy eksplýatasııadan jáne seksýaldy zorlyq zombylyqtan qorǵaý konvensııasy. Bul konvensııaǵa qosylǵan memleketter balany jezókshelikke tartý, májbúrleý nemese seks-taýar retinde kórip, paıdalaný, balalar pornografııasyn óndirý, usyný, taratý, satyp alý, saqtaý úshin qylmystyq jaza qarastyrýǵa mindetti", delingen Senat depýtatynyń saýalynda.

Sońǵy jańalyqtar

Namysyn tý etken

Rýhanııat • Keshe

Uqsas jańalyqtar