Turǵyn úı-kommýnaldyq damýdyń 2020 – 2025 jyldarǵa arnalǵan "Nurly jer" memlekettik baǵdarlamasy boıynsha Shymkent qalasynda 70 kóp qabatty úıde kúrdeli jóndeý jumystary júrgiziledi. Búgingi tańda 18 úıde jóndeý jumystary aıaqtaldy.
Al 37 turǵyn úıde jumystar jalǵasý ústinde. 1 úıde jumystar endi bastalatyn bolsa, qalǵan 14 úıdiń turǵyndary jóndeý jumystaryn ózderi jasaǵandyqtan bastartqan.
Aıaqtalǵan jumystardyń sapasyn tekserý maqsatynda qala ákimi Murat Áıtenov Saıram shaǵyn aýdanynda ornalasqan kópqabatty úılerge bardy.Erimbetov kóshesindegi №34a, 30, 33, 9 turǵyn úılerdiń shatyrlary aýystyrylyp, kireberiske jóndeý jumystary júrgizilgen.
Keıbiriniń qasbeti jańa keıipke ense, endi biriniń lıftteri jóndelgen. Odan ózge jertóle, káriz júıesi, elektrotehnıkalyq jáne montaj jumystary atqarylǵan. Modernızasııalaý jumystaryna jaýapty - "Turǵyn úı - Shymkent" JShS-i merdiger mekemesi.
Murat Áıtenov turǵyn úı tóraıymdarymen kezdesip, atqarylǵan jumystardy kórdi. Sondaı-aq, sala basshysyna jumysy aıaqtalmaǵan nysandardy merziminde sapaly aıaqtaýdy júktedi.
