Qoǵam • 25 Qyrkúıek, 2020

15,3 mln adam MÁMS júıesinde saqtandyryldy

11 ret kórsetildi

Indet qaýpi tóngen tótenshe jaǵdaı kezinde tabysynan aıyrylǵandardyń saqtandyrý mártebesin qalpyna keltirý úshin birqatar usynys qarastyryldy. Búginde elimizde 15 mln-nan asa adam mindetti áleýmettik medısınalyq saqtandyrý júıesinde saqtandyryldy.

Sýretti túsirgen Erlan Omarov, EQ

Ortalyq kommýnıkasııalar qyzmeti alańynda Áleýmettik medısınalyq saqtandyrý qorynyń basqarma tóraǵasy Bolat Tókejanov halyqtyń mindetti áleýmettik medısınalyq saqtandyrý júıesine qatysýy týraly jan-jaqty málimet berdi.

Onyń aıtýynsha, indet órshi­gen qysyltaıań kezeńde halyq­tyń bir bóligi tabysynan aıy­rylyp, olardyń saqtandyrý mártebesin qalpyna keltirý úshin qor Úkimetke usynystar jasady. Qabyldanǵan sharalar medısınalyq saqtandyrý júıesine 740 myńǵa jýyq adamdy qaıtardy. Qazirgi kezde MÁMS-te 15,3 mln adam saqtandyrylǵan. 1 qyrkúıektegi jaǵdaı boıynsha medısınalyq saqtandyrý júıesinen 3,4 mln adam tys qalyp otyr. Bul – jalpy halyqtyń shamamen 18 paıyzy. Onyń ishinde 2 mln-nan astamy – biryńǵaı jıyntyq tólemdi tóleýshiler, derbes tóleýshiler, jaldamaly jumysshylar, jeke kásipkerler, jeke tájirıbemen aınalysatyndar. Olar turaqsyz aýdarym sebebinen júıeden tys qaldy.

«2020 jyldyń qańtar aıynan bastap 1,3 mln adam MÁMS júıesine birde-bir ret jarna men aýdarym jasamaǵan, sondyqtan bul azamattar medısınalyq saqtandyrý mártebesine ıe emes. Osy oraıda MÁMS-ten tys qalǵan adamdardy júıege qatysýǵa shaqyramyn. Saqtandyrylǵan azamattar úshin medısınalyq qyzmetterdiń kólemi men qunyna qatysty shekteý joq. MÁMS-ke jylyna 25 myń teńge kóleminde eń tómengi tólem jasaǵan pasıent medısınalyq kómekti tegin alady, al aýdarǵan jarnasynyń somasy mańyzdy emes. Eger adam saqtandyrylmaǵan bolsa da, Tegin medısınalyq kómektiń kepildik berilgen kólemi (TMKKK) paketi boıynsha tegin medısınalyq kómek alýǵa quqyly. Odan eshbir medısınalyq uıym bas tartpaýy kerek. Biz azamattardyń qorǵa jazǵan shaǵymdaryn óte muqııat qaraımyz. Azamattyń sozylmaly aýrýy bolsa, áleýmettik máni bar dertter jáne dınamıkalyq baqylaýǵa jatatyn sozylmaly aýrýlar boıynsha esepte tursa, onda beıindi mamannyń qabyldaýy TMKKK paketi bo­ıynsha júzege asyrylady», dedi B.Tókejanov.

Qor basshysy keıingi kezde Qoldau 24/7 qosymshasy jáne áleýmettik jeliler arqyly emhanalarda kepildendirilgen kómek kórsetýden bas tartý týraly shaǵymdar jıilep ketkenin, alaıda TMKKK paketine kiretin kómekten bas tartýǵa bolmaıtynyn basa aıtty.

MÁMS paketinde medısına­lyq kórsetkishter boıynsha ınfarkt, ınsýlt, túrli jaraqattar men operasııalardan keıin, sondaı-aq balalardyń sozylmaly aýrýlary kezinde pasıentter úshin medısınalyq ońaltý qoljetimdi. Bıyl densaýlyq saqtaý júıesi úshin úlken synaq boldy. Pandemııa medısınalyq saq­tandyrý esebinen usyny­la­­tyn konsýltasııalarǵa, dıag­nostıkaǵa, ońaltýǵa qol­je­­tim­di­likti arttyrý boıynsha jos­parlardy ózgertti. Al endi emhanalar men aýrýhanalar qalypty rejimge oralyp, ha­lyq­qa jos­parly túrde kómek kórsetip jatyr.

Sonymen qatar Bolat Tóke­janov indettiń ekinshi tolqynyna daıyndyq týraly sóz qozǵady. Ol koronavırýs ınfeksııasyn emdeýge baılanysty TMKKK jáne MÁMS paketterine ózge­ris­ter engizilgenin, COVID-19-ǵa shaldyqqan pasıentterge jáne COVID-19 indetine kúdikti jaǵ­daıda mobıldi brıgada men stasıonarlyq qyzmet úıde kórsetiletinin, bul qyzmetter saq­tandyrý mártebesine qaramas­tan qamtylatynyn atap ótti.

Qazir qor tarapynan koronavırýs pen pnevmonııaǵa qarsy kúres boıynsha is-sharalar úshin 159 mlrd teńgeden asa qarjy qarastyrylǵan. Onyń ishinde koronavırýspen aýyratyn naýqastardy emdeýge – 50,5 mlrd teńge, epıdemııaǵa qarsy sharalarǵa tartylǵan medısına qyzmetkerlerine ústemeaqyǵa – 91,9 mlrd teńge, stasıonarlyq deńgeıdegi PTR-zertteýge – 4,2 mlrd teńge, úıde stasıonar qyzmetin kórsetýge – 0,4 mlrd teńge, ambýlatorııalyq deń­geı­de­gi PTR-ǵa – 10 mlrd teńge, mobıldi brıgadalardyń ju­­my­syna 2,4 mlrd teńge beri­ledi.

Buǵan qosa qor epıdemııaǵa qarsy is-sharalarǵa tartylǵan medısına qyzmetkerleri men mamandarǵa ústemeaqy tóleýdi jalǵastyrýda. Naýryz-tamyz aılarynda 73,7 mlrd teńge ústemeaqy tólendi. Sonyń ishinde tamyz aıynyń qorytyndysy boıynsha COVID-19, vırýsty pnevmonııamen kúreske tartylǵan 66 myń medısına qyzmetkerine 17 mlrd teńgege jýyq ústemeaqy tólem júrgizilip jatyr.

 

Sońǵy jańalyqtar

Atyraýda 9 balany ıt talady

Aımaqtar • Keshe

Taraz qalasynda gaz qubyry jaryldy

Aımaqtar • 23 Qazan, 2020

Syrda kúrishten rekordtyq ónim jınaldy

Aımaqtar • 23 Qazan, 2020

Qazaqstanda sýdıalardyń jalaqysy qansha?

Qazaqstan • 23 Qazan, 2020

Elimizde jańbyr jaýyp, sońy qarǵa ulasady

Aýa raıy • 23 Qazan, 2020

Shyǵysta eki azamat zańsyz balyq aýlaǵan

Aımaqtar • 23 Qazan, 2020

Uqsas jańalyqtar