Serik Ybyraı, Valerıı Stepanenko, Talǵat Rahmetov, Sergeı Mırolıýbov syndy jergilikti kásipkerler sapasy joǵary qat qurylǵyny tabýdyń joldaryn izdestirip, aqyry AQSh-qa tapsyrys jiberipti. Kóp keshikpeı Qostanaıǵa muhıt asyp pýlsoksımetr jetti. Kásipkerler shaǵyn qurylǵylardy birden oblystyq balalar aýrýhanasyna jetkizip, bas dáriger Ulyqbek Asylbekovtyń qolyna tabys etti.
– Bul qurylǵylar pandemııa jaǵdaıynda qos ókpesi qabynǵan naýqastarǵa asa qajet. Bıylǵy bıýdjette pýlsoksımetr alýǵa qarjy qarastyrylmaǵan. Onyń ústine qazir munyń baǵasy da sharyqtap ketti. Buryn bireýin 5 myń-7 myń teńgege satyp alýǵa bolatyn. Al qazir ár qurylǵy úshin 150 myń teńge suraıdy. Emdeý mekemelerinde qajet nárseni satyp alýdyń ózi baıaý júredi ǵoı. Bul úshin memlekettik satyp alýdyń satylarynan ótý kerek. Osylaısha ýaqyttan utylýǵa týra keledi. Sizder naǵyz saýapty isti qolǵa alypsyzdar, búgingideı syndarly kezeńde qol ushyn sozyp, qoldaý kórsetip jatqandaryńyz úshin rahmet! Bul ólshegish quraldardy aýrýhana bólimderine taratyp beremiz, – dedi U.Asylbekov.
Bas dárigerdiń aıtýynsha, pandemııa bastalǵaly balalar aýrýhanasyna irili-usaqty kásiporyndar men jeke kásipkerlerden kóptep kómek túse bastapty. Mysaly, jergilikti «Olja-Agro» seriktestigi aýrýhananyń beıimdeý bólimine eki gıdromassaj djakýzıin alyp bergen.
– Kóp kásipkerler ózderi qońyraý shalyp, bizge qol ushyn sozǵysy keletinin aıtyp, túrli usynys bildirip jatyr. Bul bıznes ókilderiniń áleýmettik jaýapkershiliginiń joǵary ekenin kórsetedi, – deıdi bas dáriger.
Qostanaı oblysy
