Qoǵam • 25 Qyrkúıek, 2020

"Shubarkól" jylyna 1000 tonna belsendendirilgen kómir óndirýdi josparlap otyr

21 ret kórsetildi

"Shubarkól kómir" AQ-da  tájirıbelik-ónerkásiptik qondyrǵysynda iske qosý men jóndeý jumystaryn júrgizý barysynda belsendirilgen kómirdiń alǵashqy baıqaý partııasy óndirildi. Kásiporynnyń ónerkásiptik alańyndaǵy hımııalyq zerthanada ónimge taldaýlar jasalyp, onyń sapasy óte jaqsy ekeni rastaldy, dep habarlaıdy Egemen.kz IIDM baspasóz qyzmetine silteme jasap.

«Shubarkól kómir» – Qazaqstandaǵy eń iri energetıkalyq kómir óndirýshilerdiń biri. Shubarkól kómiri joǵary qunarlyǵy jáne tómen kúldiliginiń arqasynda shynymen ekologııalyq jaǵynan taza energııa tasymaldaýshyǵa jatady. «Shubarkól kómir» AQ koks-hımııalyq sehy negizinde usaq speskokstan tájirıbelik-ónerkásiptik belsendirilgen kómirdi óndirý jobasy Qazaqstan Respýblıkasynyń ǵalym-tehnologtary ázirlegen tehnologııany engizýdi qarastyrady. Onyń kásiporyn ǵana emes TMD elderi aýmaǵynda teńdesi joq. Jobany kásiporyn «ERG ǵylymı-zertteý ınjırıng ortalyǵy» JShS birlesip júzege asyryp jatyr. Nysannyń óndiristik qýaty – jylyna 1 myń tonna belsendirilgen kómir.

Jobanyń basty maqsaty – ımportty almastyrý máselesin sheshý bolyp tabylady. Belsendirilgen kómirdi qoldaný salasy óte keń: gıdrometallýrgııalyq, altyn qazý, fosfat ónerkásibi, sý tazartý. Búgingi tańda atalǵan ónimge suranys joǵary bolǵanyna qaramastan, (jylyna 7 myń tonnadan artyq) barlyq belsendirilgen kómir Qazaqstanǵa shetelden jetkizilip keledi.

– Shubarkóldik belsendirilgen kómirdiń basty artyqshylyǵy shıkizat retinde arzan koks usaǵyn jáne energııa tasymaldaýshy retinde, qazirgi ýaqytta jaǵylatyn koks gazyn paıdalanǵanynan, onyń ózindik quny tómen. Bul jaǵdaı óndiris qaldyqtaryn kádege jaratý degen óte mańyzdy máseleni sheshýge septigin tıgizedi, – dedi «Shubarkól kómir» AQ operasııalyq tıimdilik bóliminiń basshysy Aleksandr Lapshın. Sonymen qatar, osy tehnologııa boıynsha alynǵan belsendirilgen kómir naryqta bar ónimnen esh kem túspeıdi. Biraq ózindik qun boıynsha ol negizgi básekelesterden 1,5 – 3 ese tómen bolady.

Iske qosý men jóndeý jumystaryna «Shubarkól kómir» AQ mamandarynan bólek, jobany ǵylymı-tehnıkalyq turǵydan «ERG ǴZIO» JShS  jáne «AımLab» JShS mamandary súıemeldedi. Qashyqtyqtan qosylý arqyly jabdyqty jasap shyqqan  óndirýshi-zaýyttyń «Splaın – M» JShQ (Reseı Federasııasy) mamandary da jumysqa jumyldyrylǵan.

Kásiporyn standartyn alý úshin belsendirilgen kómirdiń tájirıbelik úlgileri táýelsiz zerthanaǵa tapsyryldy. Kelesi kezeń – «Shubarkól kómir» AQ-da belsendirilgen kómirdi óndirýdi men ótkizýdi bastaýǵa múmkindik beretin sapa sertıfıkatyn alý.

Shubarkól mamandary ázirlegen jobany sátti paıdaǵa jaratý kásiporynda jańa jumys oryndaryn ashýǵa múmkindik beredi. Qazaqstandyq óndirýshiler shyǵaratyn ónim úlesin kóbeıtedi.

Sońǵy jańalyqtar

Namysyn tý etken

Rýhanııat • Keshe

Uqsas jańalyqtar