Reseıdiń Sankt-Peterbýrg qalasyndaǵy Vaganov atyndaǵy orys balet akademııasynyń kórkemdik jetekshisi ári oqý ornynyń prorektory Altynaı Asylmuratova laýazymyn saqtap qaldy. Bul týraly RF Mádenıet mınıstrliginiń mánbesine súıengen ITAR-TASS habarlady.
Vedomstvoda akademııaǵa jaqynda rektordyń mindetin atqarýshy bolyp taǵaıyndalǵan Nıkolaı Sıskarıdzeniń: «Meniń eń birinshi kelisim-shartqa qol qoıǵan adamym Altynaı Asylmuratova boldy. Akademııaǵa kelgen birinshi jumys kúnimnen jıi estigenim de onyń oqytýshylar quramynda Altynaı Asylmuratovany qaldyrý týraly ótinish boldy. Men sol ótinishterdi tyńdadym», - degen sózderi keltiriledi.
Degenmen, Almaty qalasynyń týmasy bolyp tabylatyn qazaq qyzy Altynaı Ábdiýahımqyzy Asylmuratovanyń ornyna qaıta taǵaıyndalýynyń basty sebebi, Vaganka rektory mindetin atqarýshynyń aıtýynsha, «oqý prosesiniń úzilissizdigi men sabaqtastyǵyn saqtap qalý» bolǵan kórinedi. «Qalǵan prorektorlar da jumystaryn jalǵastyra beredi», - dedi ol sosyn.
Al jeksenbi kúni Vaganovka professor-oqytýshylar quramynyń júzge jýyq adam qol qoıǵan ashyq haty jarııalandy. Onda ustazdar qaýymy Nıkolaı Sıskarıdzeni akademııa rektorynyń mindetin atqarýshy jáne Ýlıana Lopatkınany kórkemdik jetekshi etip taǵaıyndaý týraly kadrlyq sheshimdi qaıta qaraýdy talap etedi. Atalmysh sheshim Vaganovka ujymynyń barynsha keri reaksııasyn týǵyzypty.
Reseı halyq ártisi Nıkolaı Sıskarıdze Vaganovkanyń rektory mindetin atqarýshy bolyp bıylǵy jylǵy 28 qazanda belgilendi. Memlekettik akademııalyq úlken teatrda jıyrma jyldan astam ýaqyt eńbek etken bıshi 30 maýsymda ol jerden balet solısi retindegi de, pedagog-repetıtor retindegi de qysqa merzimdi kelisim-sharttarynyń merzimi bitýine baılanysty ketýge májbúr bolǵan edi. Biraq ol eshqashan da jeke mekeme basqaryp kórmegen. Úlken teatrda da sońǵy kezderi janjaldyń ortasynda júrdi.
Murat Aıtqoja.
