Vıdeo • 25 Qyrkúıek, 2020

Or ózenin ortaıtyp otyrǵan kimder?

1041 ret kórsetildi

Aqtóbe oblysy Hromtaý aýdanyna qarasty Qopa aýylynyń týmasy Damır Iskakov habarlasty. Oqyrmannyń sózine qaraǵanda, bıyl tamyz aıynyń sońynda irgedegi Or ózenin meken etken balyqtar belgisiz sebeppen qyryla bastaǵan. Sońǵy ýaqytta ózenniń de aıasy tarylyp, tartylyp bara jatqan kórinedi.

Sózine dálel retinde birneshe vıdeo derekterin usyndy. Beınejazbanyń barlyǵy 2020 jyldyń tamyz jáne qyrkúıek aılarynda túsirilgen. Birinshi vıdeoda ólgen balyqtar ózen jıegine shyǵyp qalǵan. Damırdyń aıtýynsha, aýyl azamattary osy jaǵdaıǵa baılanysty ekologııa mamandaryna dabyl qaqqan. Al balyqtardyń qyrylýyna aǵystyń bolmaýynan keıin oryn alǵan ottegi jetispeýshiligi sebep bolýy múmkin.

О́zen jaǵalap kórgen aýyldyqtar Or ózeniniń orta belden bógelgenin kórip tań-tamasha bolǵan. Másele osy jerden bastaldy. Turǵyndar mundaı bóget onsyz da júdep-jadap jatqan mekenge tóngen ekologııalyq  apat dep otyr. Sózden bólek olar iske de kirisken syńaıly. Bul máselege baılanysty komıssııa shaqyrtqan eken. Biraq arnaıy ókilder kelerden bir kún buryn ózendi bógegender bógetti buzyp úlgergen.

- Munyń bári janymyzda ornalasqan AKTEP mal sharýashylyǵy kompanııasynyń istep otyrǵany. Bul ózen Muǵaljar taýynan bastaý alyp, Hromtaý aýdanynan ótip, Reseıdiń Orsk qalasynyń tusynda Jaıyq ózenine quıylady. Bul ózenge quıylatyn Shákitaý, Kúngirlek, Bylqyldaq, Tamdy, Dámdi taýlarynan keletin sý alaptary da bógelgen. Eń soraqysy, sý alaptaryna bóget qoıylǵanyn eki jyldan beri Qopa aýylynyń ákimi bilip kelgen.  Sóıte tura eshqandaı shara qoldanylmaǵan.  Eki ortada Qopa, Bógetsaı, Kóktaý sekildi aýyl turǵyndary men tabıǵat zardap shekkeli tur. Budan bólek kezinde tabıǵaty tamyljyp jatatyn ólkeniń búginde surqy qashyp barady, - deıdi Damır Iskakov.

Osy oqıǵadan soń bıylǵy jyldyń 11 qyrkúıegi kúni oblystan aýylǵa taǵy da komıssııa kelgen. Quramynda salalyq oblys basqarmasynyń ókili men Hromtaý aýdany ákiminiń orynbasary sekildi basshylar da bolǵan. 23 qyrkúıek kúni Hromtaý aýdany ákimi qorytyndy jaýapty jetkizgen kórinedi.

- Jınalysta Or ózenin ortasynan bógegenderge aıyppyl salynǵany aıtyldy. Al salalaryndaǵy túrli bógetterdiń qujaty ázirlenip jatyr degendeıge keltirdi. Sonda ol buǵan deıin zańsyz salynǵan ǵoı , - deıdi Damır Iskakov.

Máseleni Jaıyq – Kaspıı basseındik ınspeksııasy baqylaýǵa alǵan kórinedi. Bul týraly osy jaǵdaıdy áleýmettik jelide jazyp júrgen sol ólkeniń týmasy Baqytjan Qurmanov aıtyp berdi.

- Jaǵdaıdyń qalaı qaraı ózgeretinin bilmeımin. Jaıyq – Kaspıı basseındik ınspeksııasyna barǵanymda basshylyǵyn prokýratýra shaqyryp alypty. Oblys ákimine de habarlasyp kórdim. Kómekshisi Nur-Sultan qalasynda jınalysta júrgenin, kelgen soń jaýap beretinin jetkizdi, - deıdi B. Qurmanov.

Osylaısha Or ózeni salalaryn bógep tastaǵandar men tabıǵat janashyrlary arasyndaǵy másele bir sheshimin tappaı tur.

Sońǵy jańalyqtar

Namysyn tý etken

Rýhanııat • Keshe

Uqsas jańalyqtar