Qarjy pıramıdasynyń basshylary ınternet jelilerinde veb-saıttar quryp, oıdan shyǵarylǵan túrli ınvestısııalyq portfelder satqan. Alaıaqtar portfeldiń merzimi aıaqtalǵanda 300%-ǵa deıin paıda tabasyz dep jalǵan ýádeler bergen.
El aýmaǵynda alaıaqtardan myńdaǵan qazaqstandyq zardap shekti, olarǵa kelgen shyǵyn 1 mlrd teńgeden asyp túsken.
Tamyz aıynda qarjy pıramıdasy basshylarynyń biri, Reseı azamaty Olga Kleınard Belarýs elinen ekstradısııalandy jáne sotqa deıingi tergeý qaıta bastaldy.
Osyǵan baılanysty tergeý organy «Questra Holding ins», «Questra World», «Atlantic Global Asset Management», «five Winds Asset Managent» kompanııalar tobynyń alaıaqtyq qyzmetinen zardap shekkenderdiń barlyǵyn Ishki ister mınıstrligine (Nur-sultan qalasy, Táýelsizdik dańǵyly, 1) nemese turǵylyqty jeri boıynsha polısııa departamentterine habarlasýdy suraıdy.
Ishki ister mınıstrligi azamattardy sergek bolýǵa jáne ońaı, tez paıda tabý týraly ýádelerge senbeýge jáne osyndaı jaǵdaılardyń barlyǵyn dereý polısııa organdaryna habarlaýǵa shaqyrady.
