Aımaqtar • 28 Qyrkúıek, 2020

Adam ómiri úshin arashashy boldy

428 ret kórsetildi

О́ńirde koronavırýs ınfeksııasy kóp tirkelgen aýdandardyń aldyńǵy legin Jylyoı bastaǵan edi. О́ıtkeni munda álemdik ınvestorlardyń ańsary aýǵan «Teńiz» kenishi bar. Osy ken ornynda jumys isteıtinderdiń arasynan qaýipti indetti juqtyrǵandar az bolmady. Al aýdannyń ózinde 1078 adamnan koronavırýstyń belgisi tabyldy.

Sol sátte shaǵyn qala ári aýdan ortalyǵy – Qulsarydaǵy aýdandyq aýrýhana janynan 40 oryndyq ınfeksııalyq stasıonar, 60 tósekke arnalǵan provızorlyq ortalyq ashyldy. Bul – naýqastardy qaýipti indetten qutqarý úshin jasalǵan qadam. Aýdandyq ortalyq aýrýhananyń bas dárigeri Nurbek Úkibaevtyń aıtýyna qaraǵanda, munda dárigerler migir tappaı, shybyn janyn shúberekke túıgen jandardy arty ólimge soqtyrýy múmkin qaýipti indetten arashalaýǵa bel sheshe kiristi.

Bul aýdanda da aq halattylarǵa úmit artyp, janyna shıpa izdegender qınalǵany daýsyz. О́ıtkeni aýa jetpeı, semip bara jatqan qos ókpege dem berer ottegi konsentratorlary jetispedi. Biraq naýqastarǵa qanatymen sý sepken qarlyǵashtaı qol ushyn sozýǵa umtylǵan qaıyrymdy jandar kómekke keldi. Solardyń qatarynan notarıýs­tar da tabyldy. Olar arnaıy qarjy jınap, demeýshilik kómek kórsetýdi bas­ty paryzynyń birine balady. Sóıtip, olar ózderi jınaǵan qarjyǵa «ARMED 7F-5L» markaly ottegi konsentratoryn satyp alyp, Jylyoı aýdandyq aýrýhanasynyń ujymyna tapsyrdy. Jurt qınalyp jatqanda judyryqtaı jumylǵan notarıýstardyń bul qadamy jylyoılyqtardy qýantqany daýsyz. Ásirese ómir men ólim ortasynda jatqan naýqastardyń jarqyn kúnderge degen senimin oıatty.

– Jomarttyq – qazaqtyń qanynda bar qasıet. Qınalǵan janǵa qaıyrymdylyq tanytatyn jomart jandardyń bar eke­ni keıingi urpaqqa úlgi bolary daý­­syz. Tutqıyldan qaýip tóndirgen koro­na­vırýsqa shaldyqqan naýqastardy aman alyp qalý úshin qol ushyn sozyp, demeýshilik bildirgen Atyraý oblystyq Notarıattyq palatasynyń tóraıymy Gúlnar Masatovaǵa, sondaı-aq barlyq jeke notarıýsqa dán rızamyz. О́ıtkeni olar syılaǵan ottegi konsentratorynyń naýqastardyń tezirek saýyǵyp, otbasyna aman-esen oralýyna septigin tıgizdi, – deıdi Jylyoı aýdandyq ortalyq aýrýhananyń dırektory N.Úkibaev.

Qazir Jylyoı aýdanynda qaýipti indettiń taralýy toqtady. Aýrýhana janynan ashylǵan ınfeksııalyq stasıo­narda da, provızorlyq ortalyqta da em alyp jatqan naýqastar joq. О́ıtkeni dárigerlerdiń shıpaly eminen boıyna qýat jınaǵan naýqastar koronavırýs ınfeksııasynan saýyǵyp, otbasyna aman-esen oraldy.

– Jaqynda ǵana koronavırýsqa shal­dyq­qan sońǵy eki pasıent hattamaǵa sáıkes tolyqtaı emdelip shyqty. Bul – biz úshin qýanyshty jaıt. Qazir aýdanda qaýipti indetti juqtyrǵan naýqastar joq. Soǵan qaramastan biz áli daıyndyq sharalaryn toqtatpaı, kún saıyn pysyqtap otyrmyz. Aýrýhanamyz qorǵanysh kıimderimen qamtylyp, dári-dármekterdiń eki aılyq qory jasaqtalyp otyr, – deıdi N.Úkibaev.

Al oblystyq kardıologııalyq ortalyq dırektorynyń orynbasary Sandýǵash Jumaǵalıevanyń málimetinshe, qaýipti indet órshigen kezde munda 12 oryndyq provızorlyq stasıonar jumys istedi. Dárigerlerlik mindetin oryndaýǵa bilek túre kirisken aq halatty abzal jandar otbasyna barýdy oılaǵan joq. Kúni-túni koronavırýs belgisi anyqtalǵan naýqastardyń ómirin saqtap qalý úshin arpalysty.

– Koronavırýs ınfeksııasyn juq­ty­rý­shy­lardyń qatary kóbeıgen maýsym aıynda jumysymyzdy epıdemııalyq jaǵdaıǵa beıimdeýge májbúr boldyq. Budan basqa amalymyz qalmady. О́ıtkeni bizdiń bas­ty mindetimiz – adamdardyń ómirin saqtaý. Sol sebepten dárigerler quramy qaýipti indetpen kúreske túgeldeı jumyldyryldy. Bizdiń áriptesterimiz el-jurt qınalyp jatqanda Gıppokrat antyna adaldyq tanytty. Olar aryna, aq halatyna da qylaýdaı daq túsirgen joq. Sonyń nátıjesinde búginge deıin kardıologııalyq ortalyqta koronavırýs ınfeksııasyn juqtyrǵan 600-den astam naýqasty emdep shyǵardyq, – deıdi oblystyq kardıologııalyq ortalyq dırektorynyń orynbasary Sandýǵash Jumaǵalıeva.

Endi ajalmen betpe-bet keltirgen, úreıge toly qıyn kúnder artta qaldy. Alaıda Jylyoı aýdandyq ortalyq aýrýhanasynda da, oblystyq kardıologııalyq ortalyqta da dárigerler arqany keńge salyp otyrǵan joq. О́ıtkeni olar josparly emdeý isine kirisip, ózge syrqattardy qabyldaı beredi.

 

Atyraý oblysy

 

Sońǵy jańalyqtar

Elordada 1700-den astam jumys orny quryldy

Aımaqtar • Búgin, 17:30

Aralda adasqan ańshy tabyldy

Aımaqtar • Búgin, 14:10

Nur-Sultanda kottedj órtenip jatyr

Oqıǵa • Búgin, 12:27

Uqsas jańalyqtar