Taǵaıyndaý • 28 Qyrkúıek, 2020

Qazaqstan Jazýshylar Odaǵy BQO fılıalynyń tóraǵasy taǵaıyndaldy

347 ret kórsetildi

Qazaqstan Jazýshylar odaǵy men Qazaqstan Jýrnalıster odaǵynyń múshesi, "Eren eńbegi úshin" medaliniń ıegeri, belgili aqyn, Qadyr Myrza Álı atyndaǵy mádenıet jáne óner ortalyǵynyń dırektory Baýyrjan Halıolla Qazaqstan Jazýshylar odaǵy Batys Qazaqstan oblystyq fılıalynyń tóraǵasy bolyp taǵaıyndaldy dep habarlaıdy Egemen.kz.

Oral qalasynda Qazaqstan Jazýshylar odaǵy Batys Qazaqstan oblystyq fılıalynyń otyrysy ótip, oǵan Qazaqstan Jazýshylar odaǵynyń basqarma tóraǵasy Ulyqbek Esdáýlet jáne tóraǵanyń orynbasary Mereke Qulkenov qatysty.

Ulyqbek Esdáýlet bıyl 80 jasqa kelgen aqyn Aıtqalı Nárikov pen jergilikti fılıaldy osy kezge deıin basqaryp kelgen Aqushtap Baqtygereevaǵa jemisti eńbegi úshin alǵys aıtyp, shapan men kamzol japty.

Budan keıin Qazaqstan Jazýshylar odaǵynyń basqarma tóraǵasynyń orynbasary Mereke Qulkenov sóz alyp, qalamgerler uıymynyń jergilikti bólimshesin birneshe adamnyń kandıdaty túskenin, odaq sekretarıatynyń biraýyzdan sheshimimen fılıal dırektory bolyp aqyn Baýyrjan Halıolla taǵaıyndalǵanyn jetkizdi.

Otyrysta oraldyq qalamgerler de sóz alyp, fılıal aldynda turǵan mindetter men sheshimin kútken máselelerdi ortaǵa saldy. Aqyn Ǵaısaǵalı Seıtaq Jazýshylar odaǵy sekretarıatynyń sheshimimen kelisetinin aıtyp, jańa basshynyń jumysyna sáttilik tiledi.

Osy kúni Qazaqstan Jazýshylar odaǵy músheleriniń qatary qos jas aqynmen tolyqty. Olar – respýblıkalyq resmı músháıralarda bas júlde alǵan talantty jas aqyndar Aıbol Islamǵalı men Talǵat Myqı.

Baýyrjan Halıolla bizben áńgimesinde taıaý bolashaqta júzege asyrǵaly otyrǵan jospar-jobalary bar ekenin jetkizdi. Sonyń biri – Oral qalasynda aqyn Qasym Amanjolov turǵan tarıhı úıdi «Qasym men Abdolla atyndaǵy Ádebıet úıine» aınaldyryp, mýzeı retinde ashý. Bul jóninde bolashaqta keńirek toqtalatyn bolamyz.

 Batys Qazaqstan oblysy

Sońǵy jańalyqtar

Elordada 1700-den astam jumys orny quryldy

Aımaqtar • Búgin, 17:30

Aralda adasqan ańshy tabyldy

Aımaqtar • Búgin, 14:10

Nur-Sultanda kottedj órtenip jatyr

Oqıǵa • Búgin, 12:27

Uqsas jańalyqtar