Temen – tiliniń azdaǵan múkistigine qaramastan, bylaıǵy jurtpen shúıirkelese áńgimelesip ketetin aqjarqyn jigit aǵasy. Jasynan eńbekpen shırap ósken azamat. Kezinde qoı da baqqan. Keńestik sharýashylyqtar taraǵan tusta da tekke qarap otyrmaı, jeke kásipkerlerge jaldanyp, olardyń malyn baqty, eginin qorydy.
Sońǵy jyldary aýylda jumyssyzdyqtyń beleń alýy oǵan ońaı tımedi. Jasyratyny joq, otbasy men balalaryn asyrap baǵý úshin bireýlerdiń otynyn jaryp, monshasyn jaǵyp, malyn baǵyp berý sekildi jumystardy atqarýyna da týra keldi. Temenniń qaladaǵy qaınaǵan bazarlardyń birine baryp, arba súıreýine de bolar edi. Alaıda aýylda da mundaı is atkópir. Ol osylaı otbasy men balalary úshin qandaı isten bolsyn tartynbaı-aq, adal eńbegimen azdy-kópti nápaqa aıyryp júr.
Jubaıy Aıjamal ekeýi bir ul, eki qyz tárbıelep, ósirip, qatarǵa qosty. Úlken uly tehnıkýmda oqıdy. Bul otbasy osyǵan deıin aýyldaǵy bos turǵan úılerdiń birinen ekinshisine kóship-qonýmen júripti. Endi óziniń shańyraǵy bar.
– Barlyq qıyndyq artta qaldy. Endi óz baspanam bar, bul úshin aýyldastaryma aıtar alǵysym sheksiz, – deıdi Temen.
Jeke turǵyn úıdi irgetasynan bastap qalap, qabyrǵasyn da ózderi quıǵan kirpishten órip, shatyryn jaýyp, dap-daıyn kúıinde paıdalanýǵa bergen aýyldaǵy qurylysshy azamattar eken.
– «Asar» qaıyrymdylyq aksııasy aýyldyq jerlerde de qanatyn keńge jaıa bastady. Bul bastamany da oıyqtyqtar birden ilip alyp ketti. Elden jınalǵan qarajat esebinen Temen Ábdenbaıulynyń otbasy úshin salynǵan úıdiń jalpy aýmaǵy – 9x9 metr, tórt bólmeli. Aýlasy keń, qorshalǵan sharbaǵy da bar, – deıdi Oıyq aýyldyq okrýginiń ákimi Medet Úristenov.
«Baspana – baqyt shamy» ǵoı qashanda. Al sáni men sáýleti kelisken úı aýyldastarynyń Ábdenbaevtar áýletine shyn nıetterimen usynǵan tamasha tartýy da sekildi.
Baımahanbet AHMET,
jýrnalıst
Jambyl oblysy,
Talas aýdany
