Avtomobıl joldary salasynda materıaldardyń jumsalýy men jol qurylymdarynyń ózindik qunyn edáýir qysqartýǵa, sondaı-aq jóndeýaralyq merzimdi arttyra otyryp, jol jamylǵysynyń beriktigin jaqsartýǵa múmkindik beretin ınnovasııalyq tehnologııalardy engizý sharalary jalǵasýda.
Osylaısha, «QazAvtoJol» UK» AQ, «UneedUs» JShS jáne «Jol aktıvteri sapasynyń ulttyq ortalyǵy» ShJQ RMK birlesip, sement-beton jabyndysyna arnalǵan Contite sińirme quramyn synaý jumystaryn júrgizdi. Jańa tehnologııany Kókshetaý qalasy arqyly ótetin Nur-Sultan – Petropavl avtomobıl jolynyń 69 shaqyrymynda qoldaný uıǵaryldy.
«UneedUs» kompanııasynyń málimetinshe, Contite sińirme quramy – gıdrofıldik, gıdrofobtyq jáne gıdroskopııalyq sııaqty 3 qasıetke ıe biregeı ónim. Tehnologııa joldyń qyzmet etý merzimin ulǵaıtyp, sement-beton jabyndysyn hımııalyq reagentterden, tuzdan, qatý jáne erý sıklderinen, basqa da faktorlardan qorǵaýy tıis. Sińirme quram beton jabyndysyna bir ret shashylady. Mehanızm betondaǵy bos arada krıstalldardyń qalyptasýynyń negizinde áser etedi.
Tájirıbelik sharalar júrgizilip jatqan jol ýchaskesinde jańa tehnologııanyń áseri zerttelip, baıqalatyn bolady. Tehnologııa oń nátıjelerdi kórsetken jaǵdaıda, sement-beton jabyndysynyń sý men reagentterdi sińirýi 1,8 esege azaıyp, beriktigi 15-18%, sondaı-aq, aıazǵa tózimdiligi 2,5 esege kóteriledi dep kútilýde.
