Qoǵam • 29 Qyrkúıek, 2020

Volonter jyly halyqaralyq sharaǵa ulasa ma?

10 ret kórsetildi

Meıirimdi jandardyń ıgi isteri adamzatqa asa aýyr syn túsken sátte de tolas­tamady. Áleýmettik araqashyqty saqtaý, meılinshe úıde otyrý sekildi qatań talaptarǵa qaramastan, erikti azamattar qolynan kelgen kómekten aıanyp qalǵan joq.

Qoǵamdaǵy sońǵy oqıǵalar dúnıe júzindegi volonterlik qozǵalysqa jańa serpin bergendeı. Oǵan at­qarylǵan tola­ǵaı eńbek dálel bola alady. Memleket basshylary­nan bastap barlyq sarap­shylar ara­myzdaǵy meıirimdi jandar­dyń pan­demııa kezinde atqarǵan ju­my­sy men kúreske qosqan úlesin jo­ǵary baǵalap, alǵysyn jaýdyrdy. Rasymen, qoǵam qyspaqta qalǵanda azamat­tyq ustanymy nyq, moraldyq qundylyqtary joǵary azamattardyń rııasyz áreketi súısindiredi.

Jaqynda Qazaqstan Prezıdenti Qasym-Jomart Toqaev halyqaralyq beldi minberlerdiń birinen volonter­lerdiń eren eńbegin BUU sheńberinde eskerýdi, atap aıtqanda volonterlerdi jumyl­dyrýdyń halyqaralyq jylyn jarııalaýdy usyndy. Jalpy, mundaı bastamanyń logıkalyq sıpaty bar ekenin ańǵarý qıyn emes. О́ıtkeni BUU  «Volonterler jylyn» osyǵan deıin de atap ótken edi. Al dál kelesi 2021 jyldyń osy maqsatqa arnalýy nege qısynǵa keletinin qarap kórelik.

Uıym alǵash ret 2001 jyldy «Halyq­aralyq volonterler jyly» dep jarııa­lap, qozǵalystyń qoǵamdaǵy ornyn bekitýge jáne odan ári damytýǵa sep­tigin tıgizgen-di. Bul bastama búkil álem­de óz ýaqytyn basqalarǵa qyzmet etýge arnaǵan mıllıondaǵan jannyń jetis­tigin atap ótýge, ózgelerdi volonter bo­lý­ǵa shaqyrýǵa, mártebesin bekitýge, ózara qarym-qatynasyn or­natýǵa jáne yn­talandyrýǵa ba­ǵyt­talǵan.

Bir jyldyq jumystyń nátıjesinde uıym­dastyrýshylar volonterlik qozǵa­lysty jahandyq deńgeıde jańǵyrtý múmkin bolǵanyn atap aıtty. «О́zgelerge kómektesemin degen rııasyz tilekti júıeleı bilsek, beıbit álem quramyz. Birikken Ulttar Uıymy murattary osy volonterliktiń negizinde qalanǵan» delingen uıymnyń málimdemesinde. Bul halyqaralyq bedeldi uıymnyń qun­dylyqtary qarapaıym adamı qa­sıetterden qu­rylatynyn baıqatady. Al kez kelgen qoǵamdy izgi nıet alǵa jeteleıtini sózsiz. Osy ustanymdy tý etken mem­lekettiń de tasy órge domalamaq.

2001 jyly 120-dan astam ulttyq komıtet álemniń 200 qalasynda volon­terlikti ilgeriletetin aýqymdy jobalardy júzege asyrdy. Bul qozǵa­lys­ty adam tirshiliginiń bir bóligi re­tinde qalyptastyrýǵa dál osy jyl úlken serpin berdi. BUU qaıyrymdy isti qoǵamdaǵy kedeılikti, áleýmettik teńsizdikti joıýǵa baǵyttalǵan kez kelgen strategııanyń ajyramas bóligi dep baǵalaıdy. Bul rette elimizde bıylǵy jyldyń «Volonter jyly» dep jarııalanyp, osy baǵyttaǵy jumystardyń artýy úlken mánge ıe.

Sondaı-aq 2001 jyldyń qazan aıynda Fransııa, Germanııa, Ispanııa jáne Ulybrıtanııada eriktilerdi qol­daý úshin zańnama qabyldanǵan. Al Argentına, Kolýmbııa, Ekvador, Mada­gaskar, Mozambık, Nepal, Senegal jáne Tanzanııada jańa zań jobalary usy­nylǵan. Volonterliktiń ekono­mıkalyq úlesin zerdeleýge arnalǵan «Volon­terlik ólshemi: praktıkalyq qural­dar jınaǵy» zertteý nusqaýlyǵy ázir­lengen. Bul qujat Botsvana, Qytaı, Laos, Qazaqstan jáne Mońǵolııada qol­danýǵa beıimdelip jasalǵan eken. Kambodja, Madagaskar, Namıbııa, Shrı-Lanka jáne Tanzanııada eriktilik boıynsha zertteýler júrgizile basta­ǵan. Baıqaǵanymyzdaı, 2001 jyl vo­lon­terlik qozǵalysty zańnamalyq tur­ǵydan negizdep, qoǵamdaǵy bedelin arttyrýǵa kóp kómektesken.

Týra on jyldan keıin volonterler úshin taǵy erekshe kezeń bastaldy. Eýropalyq komıssııa 2011 jyldy aımaqtaǵy «Volonterler jyly» dep jarııalap, Eýropa elderindegi qozǵalysty qaıta jańǵyrtty. So­nymen qatar BUU «Halyqaralyq volonterler jyly +10» degen jalaýmen on jyl burynǵy bastamany qaıta qolǵa aldy. Bul joly 2001 jylǵy qabyldanǵan jobalar pysyqtalyp, aldaǵy josparlar anyqtaldy. Osylaısha kelesi 2021 jyl BUU bas­tamasy úshin taǵy bir mereıtoılyq meje bolyp tur.

Memleket basshysynyń kelesi jyldy «Halyqaralyq volonterler jyly» dep jarııalaý týraly usynysy qaı jaqtan qarasaq ta oıǵa qonymdy. Al Qazaqstan bul máselede damyǵan eldermen terezesin teńestirip, ha­lyqaralyq qaýymdastyqtyń bel­sendi múshesine aınalyp keledi.

 

Sońǵy jańalyqtar

Atyraýda 9 balany ıt talady

Aımaqtar • Keshe

Taraz qalasynda gaz qubyry jaryldy

Aımaqtar • 23 Qazan, 2020

Syrda kúrishten rekordtyq ónim jınaldy

Aımaqtar • 23 Qazan, 2020

Qazaqstanda sýdıalardyń jalaqysy qansha?

Qazaqstan • 23 Qazan, 2020

Elimizde jańbyr jaýyp, sońy qarǵa ulasady

Aýa raıy • 23 Qazan, 2020

Shyǵysta eki azamat zańsyz balyq aýlaǵan

Aımaqtar • 23 Qazan, 2020

Uqsas jańalyqtar