Konferensııa ozyq tehnologııanyń tez damyǵan jahandaný úderisinde ártúrli mádenıetterdiń ókilderiniń arasyndaǵy úılesimdi qarym-qatynas jáne ózara qundylyqtaryna tózimdilik pen qurmet kórsetýdi dáripteıdi. Is-shara aıasynda Gonkong, Qyrǵyzstan, Pákistan, Portýgalııa, Saýd Arabııasy, Shvesııa, Ulybrıtanııa jáne AQSh memleketterinen bilim salasynyń beldi sarapshylary bilim berýdegi jahandyq trender jáne qundylyqtar baǵytyndaǵy ǵylymı-zertteý jumystarynyń nátıjelerimen bólisip, zaman aǵymynyń saldarynan týyndaǵan ózekti máselelerdi ortaǵa salady.
Negizgi maqsat – otandyq jáne halyqaralyq ǵalymdarmen ǵylymı jáne kásibı baılanys ornatyp, bilim salasyndaǵy jańa syn-qaterlerge ońtaıly sheshim tabý. SDÝ rektory Qýanysh Erǵalıev onlaın konferensııanyń ashylýynda dúnıejúzilik ǵalymdar qaýymdastyǵynyń ókilderi eńbekterine jemis tiledi.
– Konferensııanyń aıasynda qashyqtan bilim berýge qatysty, pandemııa kezinde bilim berý erekshelikteri boıynsha mańyzdy baıandamalar tyńdalady. Nátıjesinde qazirgi tańda týyndap turǵan syn qaterli jahandyq máselerge ońtaıly sheshimder tabylyp, olar tájirıbe júzinde qoldanysqa alynýy múmkin, – degen boljam bildirdi SDÝ akademııalyq ister jáne ǵylymı-zertteýler jónindegi prorektory Davronjon Gaıpov.
Jalpy, konferensııanyń baǵyty jahandaný dáýirinde jahandyq trendter jáne bilim berýdegi qundylyqtar taqyryby bolǵandyqtan, osy saladaǵy kásibı orta ókilderi, ǵalymdar, pedagog mamandar, zertteýshiler jáne bilim salasyndaǵy ındýstrııa ókilderi de bar. Aıta ketsek, qazaqstandyq «Ustaz» kásibı sheberlikti jetildirý ortalyǵynyń jetekshisi, Halyqaralyq Gonkong pedagogıkalyq ýnıversıtetinen qashyqtan bilim berý nemese aqparattyq kommýnıkasııa tehnologııalar salasynyń sarapshysy plenarlyq baıandamashy retinde qatysady.
Sarapshylar birqatar ózekti máseleni qamtýda, onyń ishinde: «Bilim berý baǵdarlamalary jáne pedagogıka», «Bilim berý salasyndaǵy ǵylymı-zertteýler», «Qundylyqqa negizdelgen bilim berý», «Bilim berýdegi aqparattyq-kommýnıkasııalyq tehnologııalardy qoldaný», «Tildik bilim berý», «Bilim berýdegi kóshbasshylyq», matematıka, ınjenerııa, óner jáne bıyl Qazaqstanda atalyp jatqan «Ál-Farabı men Abaı muralary álemdik rýhanııat keńistiginde» baǵyttary boıynsha oılaryn ortaǵa salady.
– Áýel basta konferensııany SDÝ kampýsynda ótkizý josparlanǵan bolatyn. Alaıda pandemııaǵa baılanysty is-shara onlaın ótkizilýge májbúr boldy. Osyǵan baılanysty kolloborasııa men netvork jetkiliksiz bolýy múmkin. Biraq soǵan qaramastan, 9 memlekettiń ǵalymdary bir platformada óz oı-pikirlerimen bólisý, talqylaý arqyly bir-birimen tanysý jáne ártúrli deńgeıde ǵylymı jobalarǵa qatysý, usynystar sekildi ortaq yntymaqtastyqtar jasaı alady, – dedi D.Gaıpov.
