Ustaz taýdan arqyraı aqqan taý ózeni sekildi, aınalasyna qýat berip, jolynda kezdeskenderdi sýymen nárlendirip, taýdaı qıyndyqtardy tastaı domalatyp, bilimniń sar dalasynda tynyshtyq taýyp, damyldaıdy. Ustaz – Jer degen álemniń betin kórkeıtken, shákirtterine shýaq tókken Kún-ana tárizdi. Ustaz – aqyldyń tozbaıtuǵyn asyly. Jylda jańa oqý jylymen qatarlas keletin Ustazdar kúni de kúzdiń úlesine tıedi. Elimizde qazan aıynyń birinshi jeksenbisi ustazdar kúni retinde merekelenip keledi. Jas urpaqtyń sanasyna synalaı engizetin tálim-tárbıe, úlgi-ónege ólsheýsiz.
Syrttaı qarapaıym bolǵanymen, tarıhtaǵy uly isti atqaryp júrgen jumys – ustazdyki. Bilimmen baýlyp, bıikke ushyratyn oqýshylarynyń oqýda ozat, ómirde patrıot bolýy ustazdyń ustanymyna baılanysty. Mamandyq kóp. Biraq mamandyqtyń túrli bolǵany mańyzdy emes, qansha mamandyq bolsa da sizdi maman qylatyn taǵy da ustaz. Meıli siz ǵalym bolyńyz, juldyz, tipti bedeldi azamat, prezıdent bolyp ketseńiz de sizdi osy ómirge jetelegen, osy shyńǵa jetýge sebepshi bolǵan ustazdy umytýǵa qaqyńyz joq. Onyń eńbegin syılaý, oǵan qurmet kórsetý – sol adamǵa degen syı-sııapat emes, sizdiń tárbıeli, tálimdi tulǵa bolǵanyńyz. «Adamnyń adamshyldyǵy jaqsy ustazdan» dep Abaı hakim aıtpaqshy, árbir isińiz jeńiske jetip jatsa, onyń artynda ustazdyń bir tamshy bolsa da eńbegi baryn este saqtańyz.
Anar SOLTANOVA,
Kóktóbe jalpy orta bilim beretin mekteptiń muǵalimi
Pavlodar oblysy,
Maı aýdany
