Aımaqtar • 29 Qyrkúıek, 2020

Balalarǵa bazarlyq kóbeıdi

29 ret kórsetildi

Indettiń taralýyna oraı elimizde jasalǵan shekteý sharalaryna baılanysty jyl saıynǵy «Mektepke jol» qaıyrymdylyq sharasy bıyl jańa formatta ótip jatqany belgili. Iаǵnı qashyqtan oqýǵa arnalǵan arnaıy qajetti tehnıkalyq quraldary joq oqýshylarǵa kómek berilmek. Mysaly, Ekibastuzda ótken is-shara barysynda qala jáne qala aýmaǵyna qarasty 28 aýylda turatyn áleýmettik turǵydan az qamtamasyz etilgen 1 686 otbasynyń tizimi jasalyp, balalaryna kómek kórsetildi.

Qalalyq oqý bóliminiń basshysy Jazıra Hamzabaevanyń málimetinshe, osy maqsatta barlyq kásiporyn basshylaryna, jeke kásipkerlerge, bankterge, basqa da uıymdarǵa «Mektepke jol» sharasyna qatysýǵa shaqyrǵan hattar joldandy. Aldymen MAES-1 kásiporny shaqyrýǵa ún qosyp, qaladaǵy №11, №9 mektepterdiń 100 oqýshysyna sabaqqa qajetti dápterler, basqa da qajetti zattar men sómkeler syılady. Mektepterge ınternet jelisin qosyp berdi. Ekibastuzdyń ekinshi stansasy MAES-2 de shaqyrýǵa ún qosyp, №28 mekteptiń 15 oqýshysyn oqý jylyna kerekti zattarmen qamtamasyz etti.

Al «Halyq banki» AQ qalalyq bólimshesi qalaǵa qarasty aýyl mektepteriniń 1-synybyna barǵan 25 oqýshyǵa keńse taýarlary, sómkeler tabys etti.

О́ńirdegi alyp óndirister orna­lasqan Aqsý qalasy men qa­laǵa qarasty 32-aýylǵa da qaıyrymdylyq sharasynyń sharapaty jetti. Qalalyq bilim bóliminiń málimetinshe, byltyr osy ýaqytta áleýmettik turmys deńgeıi tómen otbasylardyń 2 531 balasy «Mektepke jol» qaıyrymdylyq sharasy barysynda kómek alsa, bıyl da qala men qala aýmaǵynda turatyn 2 myń oqýshyǵa demeýshilik kómek kórsetý jalǵasýda. Bul shaqyrýǵa qaladaǵy «Aqsý ferroqorytpa zaýyty» AQ, «Eýrazııalyq ener­getıkalyq korporasııasy» AQ sııaqty alyp kásiporyndar jyl­daǵydaı úles qosýda.

Sonymen birge Maıqaıyń kentinde ornalasqan «Maıqaıyń altyn» AQ kásiporny da kenttegi №2 mekteptiń oqýshylaryna 10 noýtbýk alyp berdi. Mektep basshylyǵy kásiporyn kómegine júginip, taǵy 19 planshetke ótinish beripti.

Oblys ortalyǵyna qarasty Kenjekól aýlyndaǵy «Otba­sylyq úlgidegi balalar aý­ly­nyń» tárbıelenýshilerine «Úmit úzbeý» qoǵamdyq qorynyń músheleri «Jetekshi» jobasy aıasynda 10 noýtbýk, 6 smartfon alyp berdi. Telefon nómirlerin, ınternettik aılyq tarıfin balalar aýlyndaǵy jetekshiler tóleıdi.

Demeýshiler, jeke kásipkerler, basqa da qaıyrymdylyq jasaýshy jandar qadaǵalaýshy oryndardan balalarǵa beriletin noýtbýkter, smartfondar, planshetter, dápter, qalam, sómke, basqa da quraldar toly ózderi syılaǵan bazarlyqtyń jol ortada joǵalyp ketpeı, arnaıy tizim boıynsha áleýmettik az qamtamasyz etilgen otbasylardyń ul-qyzdaryna, jetim balalarǵa ǵana berilýin suraıdy. О́ıtkeni oblystyq bilim basqarmasynyń málimetinshe, bıyl qashyqtan oqytý formatyn uıymdastyrý úshin demeýshilerden basqa, respýblıkalyq bıýdjetten 15 923 kompıýterlik tehnıka (kompıýter – 1 657, noýtbýk – 12 119, planshet – 2 147) satyp alýǵa 2,4 mlrd teńge qarajat bólindi. Sondyqtan qaptaǵan noýt­býk, kompıýterlik tehnıka, planshetterdiń saıda sany, qumda izi joǵalyp ketpesin degen kúdik de mazalamaı qoımaıdy. Bul rette tehnıkalardy satyp alýdyń ashyqtyǵyn qamtamasyz etý úshin basqarma «Adaldyq alańy» jobalyq keńsesiniń basshysy R.Isabekovtiń basshylyǵymen monı­torıngtik jumys tobyn qurdy.

Kompıýterlik jabdyq ónim berýshilerin tańdaý osy ju­mys tobynyń usynystaryna sáıkes júzege asyrylyp, óńirge
1 657 birlik derbes kompıýter jetkizildi. Buǵan deıin óńirde turatyn 12 304 oqýshynyń úıinde kompıýterlik tehnıka bolmaǵany anyqtaldy. Endi 10 qazanǵa deıin taǵy 14 266 tehnıka (12 119 noýtbýk, 2 147 planshet) jetkizilmek. Barlyq satyp alynatyn kompıýterlik tehnıka muqtaj otbasylarǵa tek ýaqytsha paıdalanýǵa beriledi.

Árıne, kelgen bazarlyqtyń barlyǵy oryn-ornymen ıgi­lik­ke jumsalsa qýanysh. Bári de balalardyń bolashaǵy, qýa­nyshy úshin ǵoı. Taǵy da bir jaǵymdy jańalyq: Ekibastuzda ANSA SILICON kompanııasynyń ókilderi oqýshylarǵa oqý úshin qajetti baǵdarlamalyq qamtamasyz etilgen noýtbýkterdi tabys etti. Qaıyrymdylyq sharasy №26 mektep-gımnazııasynda, №25 qazaq qyzdar gımnazııasynda, №24 mektep-gımnazııasynda ótti. Noýtbýkter materıaldyq jaǵdaıyna baılanysty qymbat kompıýterlik tehnıkany satyp alýǵa múmkindigi joq otbasylarǵa berildi. Balalar qa­shyqtan oqıtyn kezeńde syı­lyqtar óte paıdaly boldy.

– Mundaı syılyq týraly armandaǵan joqpyz, – dedi Aıdana Smaǵulova. – Bizdiń otbasymyz úshin bul úlken kómek. Noýtbýk arqyly balalarǵa sabaq oqý ońaıyraq bolady.

Noýtbýk alǵan 8-synyp oqý­shysy Aslan Kereıbek IT ma­many bolýdy armandaıdy. Bolashaq baǵdarlamashy apasy men atasynyń qamqorlyǵynda.

– Men zeınetkermin. Zeı­netaqym az, eki balany tárbıelep otyrǵandyqtan, osyndaı qymbat zatty satyp alý qıynǵa soǵady. Biz syılyqty rızashylyqpen qabyldaımyz. Nemerelerimniń qashyqtan oqýyna múmkindik týdy, – dedi demeýshilerge Aslannyń atasy.

 

Pavlodar oblysy

 

Sońǵy jańalyqtar

Vırýs mýtasııaǵa ushyrady

Koronavırýs • Búgin, 17:27

Málik Ǵabdýllın: Zaman, tulǵa, jad

Rýhanııat • Búgin, 12:00

Atyraýdan 100 jigit áskerge attandy

Aımaqtar • Búgin, 10:35

Elimizde koronavırýstan 123 adam aıyqty

Qazaqstan • Búgin, 09:51

Uqsas jańalyqtar