Elimizde tótenshe jaǵdaı jarııalanǵan alǵashqy kúnnen bastap qylmystyq-atqarý júıesi departamenti sottalǵandar arasynda COVID-19 indetin taratpaý boıynsha aldyn alý sharalaryn qabyldady. Mekemelerde sanıtarlyq-dezınfeksııalyq rejim saqtalyp, birinshi kezekte sottalǵandardyń ómiri men densaýlyǵyn qorǵaý úshin barlyq aldyn alý sharalary algorıtmge sáıkes qatań túrde júzege asyryldy.
«Qazirgi tańda indettiń ekinshi kezeńi kútilýine baılanysty oblystaǵy tıisti organdarmen sottalǵandar arasynda jedel respıratorly vırýsty ınfeksııalar men koronavırýstyq ınfeksııalardyń taralýyn boldyrmaýǵa jáne aldyn alýǵa baǵyttalǵan birlesken is-sharalar jospary bekitildi. Osy jospar negizinde qazirgi tańda tıisti birqatar jumys atqaryldy. Nátıjesinde, oblystyq Qoǵamdyq densaýlyq saqtaý basqarmasynan sottalǵandardyń ımmýnıtetterin nyǵaıtý men COVID-19 indetiniń aldyn alý maqsatynda qyzýdy, qaqyryqty túsirýge arnalǵan dáriler, ınfeksııanyń aldyn alýǵa arnalǵan antıbıotıkter men ımmýnıtetti kóterýge arnalǵan dárýmender berildi», deıdi QAJ departamentiniń sanıtar-dárigeri Aıdana Melsqyzy.
Buǵan deıin de Túrkistan oblysy ákimdiginiń qoldaýymen sottalǵandarǵa bir rettik 1 myń dana qolǵap pen 2 myń dana betperde berildi.
