Aımaqtar • 29 Qyrkúıek, 2020

Shý aýdanyndaǵy gaz máselesi bir aptada sheshiledi

25 ret kórsetildi

Shý aýdanyndaǵy gaz máselesi bir aptada sheshiledi, dep habarlaıdy Egemen.kz

Jambyl oblysynyń Shý aýdany, Tóle bı aýylyna gaz tartý talaı jyldan beri ózekti másele bolyp keledi. Jergilikti turǵyndar bul jumysqa jaýapty "Parıev" jaýapkershiligi shekteýli seriktestiginiń baǵany sharyqtatyp otyrǵanyn aıtyp, shaǵymdanǵan bolatyn. Atalǵan másele jýyrda jalpyulttyq "Egemen Qazaqstan" gazetiniń betinde de kóterildi. Tóle bı aýylyna gaz tartý máselesi boıynsha Jambyl oblysynyń ákimi Berdibek Saparbaev jıyn ótkizdi. Aýylǵa gaz qubyry osydan birneshe jyl buryn tartylǵan. Biraq, keıbir úıler áli kúnge deıin kógildir otynsyz otyr.

Oblystyq energetıka jáne turǵyn úı-kommýnaldyq sharýashylyq basqarmasynyń basshysy Qudaıbergen Qorǵanbaevtyń aıtýynsha, úılerge gaz jetkizýge jaýapty merdiger "Parıev" JShS. Bastapqyda, ıaǵnı 2016 jyly atalǵan seriktestiktiń baǵasy 420 myń teńge bolsa, keıinnen ol 570 myń teńgege deıin ósken. Merdiger kompanııa ókilderi bul rette qurylys materıaldarynyń qymbattaǵanyn aıtqan. Endi bul jaǵdaı turǵyndardyń narazylyǵyn týdyryp otyr. Qarapaıym halyq mundaı qarajatty taýyp berýge báriniń birdeı shamasy kelmeıtinin aıtady.

Shý qalasynan aýdan ortalyǵy Tóle bı aýylyna deıin uzyndyǵy 8,7 shaqyrym magıstraldy qubyrdy satyp alýǵa jáne memleket balansyna qoıýǵa oblystyq bıýdjetten 251,1 mıllıon teńge bólingen. Bul sheshim "Parıev" kompanııasy qyzmetiniń baǵasyn 475 myń teńgege deıin tómendetýge múmkindik bergen. Bul kúnde Tóle bı aýylynda 4200 úı bar bolsa, olardyń 35,2 paıyzy ǵana gazben qamtylǵan. Qalǵan úıler baǵanyń qymbattyǵyna baılanysty gazǵa qosyla almaı otyr. Máseleni anyqtaý úshin oblystyq tabıǵı monopolııalardy retteý jáne básekelestikti qorǵaý jónindegi departament "Parıev" seriktestigine qatysty tergeý júrgizgen. Is Merki aýdandyq sotyna jiberilgenimen, ákimshilik-quqyqbuzýshylyq quramynyń bolmaýyna baılanysty toqtatylǵan. Degenmen, Qudaıbergen Qorǵanbaev "Parıev" óz mindettemelerin tolyq oryndamaǵanyn málimdedi. Atalǵan kompanııa tehnıkalyq qyzmet kórsetýdi júrgizýge múmkindik beretin shart jasaspaǵan. Bul jaǵdaıdyń saldarynan aǵymdaǵy jylǵy qyrkúıek aıynda Tóle bı aýylynda gaz óshirilgen.

"Parıev" kompanııasy qyzmet kórsetetin aýmaqta turatyn Shý qalasynyń turǵyndary da osyndaı máseleni bastan keshirgen. Osy oraıda, Berdibek Saparbaev másele bir apta ishinde sheshimin tabýy kerektigin jetkizdi.

"Kompanııanyń qyzmetteri basqa aýdandarǵa qaraǵanda nege qymbat ekenin saralańyzdar. Qordaı aýdanynda osy sekildi qyzmet quny 350 myń, al Shý aýdanynda jarty mıllıonnan asady. Olardyń gazy altyn emes shyǵar? Nelikten turǵyndar eki apta boıy gazsyz qalady? Turǵyndar qyzmetterge úzdiksiz aqy tóleıdi, sondyqtan gaz da turaqty berilýi tıis. Olardyń narazylyǵy oryndy. Barlyq kináliler ádil jazaǵa tartylýy kerek. Eshkimge halyqty aldaýǵa jol berilmeıdi", dedi ol.

Sondaı-aq ákim bul másele óziniń jeke baqylaýynda bolatynyn aıtty.

Sońǵy jańalyqtar

Atyraýda 9 balany ıt talady

Aımaqtar • Keshe

Uqsas jańalyqtar