Medısına • 30 Qyrkúıek, 2020

Orfandyq aýrýǵa shaldyqqan balalar emi baqylaýda

6 ret kórsetildi

Densaýlyq saqtaý mınıstri Alekseı Soı azamattyq qoǵam jáne óńirlik densaýlyq saqtaý basqarmalarynyń ókilderimen orfandyq aýrýǵa shaldyqqan balalardy dári-dármekpen qamtamasyz etýdegi máselelerdi talqylady.

«Biz búgin óte mańyzdy máseleni qaraý­damyz. Bul kóptegen faktorǵa baılanys­ty jyldar boıy iske asyrylmaı kelgen prob­lema. Osy máselege erekshe kóńil aýdarǵymyz keldi, ony júıeli sheshý úshin kemshilikterdi nemese normatıvtik prob­lemalardy qaraýymyz tıis», dedi A.Soı.

Orfandyq aýrýlardyń tizimine 59 nozologııa kiredi. Biryńǵaı dıstrıbıýtordyń 2020 jylǵa arnalǵan tiziminde sırek kezdesetin aýrýlardy emdeýge arnalǵan dárilik zattar men medısınalyq buıym­dardyń 1 415 ataýy bar. Onyń ishinde stasıonarlyq kómekke – 1 177 ataý, ambý­latorııalyq dári-dármekpen qamtamasyz etý­ge 649 ataý arnalǵan.

Qazaqstanda dıspanserlik naýqastyń elektrondy tirkeliminiń derekteri boıynsha 2020 jylǵy 25 qyrkúıekte orfandyq aýrýlary bar 13 863 bala esepte tur.

Elimizde orfandyq aýrýǵa shaldyqqan balalarǵa arnalǵan dári-dármekke qatysty birqatar problema bar. Keıbir preparat tirkeýden ótpegen, dárilik zattardy satyp alý úshin shekti baǵa belgilenbegen, dárini jetkizý jolyndaǵy kedergiler, densaýlyq saqtaý basqarmalarynyń salǵyrttyǵy taǵy bar.

Máselen, mýkovıssıdozben aýyratyn 121 bala dınamıkalyq baqylaýda. Bul dıag­noz, ásirese Shyǵys Qazaqstan, Túr­kistan jáne Almaty oblystarynda, Almaty, Nur-Sultan jáne Shymkent qala­larynda kóp tirkelgen. Mundaı balalar respýblıkalyq bıýdjet esebinen dornaza – alfa (pýlmozım), kreon, ýrzodezoksıhol qyshqylymen qamtamasyz etilýi tıis.

«Kreon preparaty ýaqtyly jetkizil­megen. Jyl basynan beri barlyq óńirde balalar Kolıstımetat natrıı (kolıs­tın) jáne Tobramısın preparattarymen qamtamasyz etilmegen. Tobramısın eritindisi joq», dedi Densaýlyq saqtaý mınıstrliginiń Ana men bala densaýlyǵyn qorǵaý departamentiniń dırektory M.Ember­genova.

Epılepsııamen aýyratyn 26 036 bala dıspanserlik esepte tur. Densaýlyq saqtaý mınıstriniń 2017 jylǵy 29 tamyzdaǵy №666 buıryǵyna sáıkes ambýlatorııalyq dári-dármekpen qamtamasyz etýge 6 preparat kiredi: Karbamazepın, valproı qyshqyly, Okskarbazepın, Lamotrıdjın, Topıramat, Levetırasetam.

Medısınalyq uıymdar 1,7 mlrd teńgege epılepsııa nozologııasy bo­ıyn­sha reseptermen qamtamasyz etildi. Bi­ryńǵaı dıstrıbıýtor stasıonarlarǵa 59 mln teńgege dárilik zattar jóneltti. Mýkovıssıdoz nozologııasy boıynsha medısınalyq uıymdarǵa 0,7 mlrd teńgege 7 ataý satyp alyndy (28 mg kapsýladaǵy ıngalıasııaǵa arnalǵan Tobramısın untaǵy usynys bolmaǵandyqtan satyp alynǵan joq). Stasıonarlarǵa 185,4 mln teńge somasyna dárilik zattar jóneltildi.

Búgingi tańda oryn alyp otyrǵan taǵy bir problema – sırek kezdesetin aýrýlary bar pasıentterge qajetti kóptegen preparat Qazaqstanda tirkelmegen.

«Bul máseleni biz jyldar boıy sheshe almaı kelemiz. Ákimderge talaı ret hat ta jazdyq. Endi Densaýlyq saqtaý mınıstrligi jergilikti ákimdikterge naqty usynys berse, óıtkeni aýrý balalardy dári-dármekpen qamtamasyz etýge jaýaptylar jumysyna salǵyrt qaraǵany úshin jazalanýy tıis. Ata-analardan, qoǵamdyq qorlardan kelgen shaǵym, ótinishke nemquraıdy qaraýǵa bol­maıdy. Sonymen qatar saıası sheshim qabyl­daýdy jáne bul dári-dármekti máj­búrli túrde tirkeýdi suraımyn», dedi bala quqyqtary jónindegi ýákil Arýjan Saın.

Densaýlyq saqtaý mınıstri bul máseleni, ásirese óńirlerde erekshe ba­qylaýǵa alý qajet ekenin eskerdi.

«Bir rettik tasymal, tirkeýge qa­tysty problemalar bar – bul taza bıý­rokratııalyq rásimder. Sondaı-aq logıstıka máselesi de bar. Sondyqtan bizdiń mindetimiz – durys josparlaý jáne aldyn ala boljam jasaý. Birinshi kezekte dári-dármekti jetkizý, bir rettik tasymal boıynsha máseleni sheshý kerek. Biz bul preparattardy erekshe baqylaýǵa alamyz. Qazaqstanǵa kelgen dári-dármektiń múmkindiginshe tirkeýden tez ótýin qadaǵalaımyz», dedi mınıstr.

Sondaı-aq A.Soı balalardy dári-dármekpen qamtý máselesine qatysty osyndaı kezdesýler aldaǵy ýaqytta da turaqty ótkiziletinin aıtty.

 

Sońǵy jańalyqtar

Almatyda jer silkindi

Qazaqstan • Búgin, 16:48

Bıyl Qazaqstanda qys qandaı bolady?

Aýa raıy • Búgin, 16:37

Medeý men Shymbulaq qashan ashylady?

Aımaqtar • Búgin, 15:58

Elengen erlik

Aımaqtar • Búgin, 13:22

Qarashada kún sýytady

Aýa raıy • Búgin, 11:59

Shyǵys Qazaqstanda qus tumaýy tirkeldi

Aımaqtar • Búgin, 11:36

Dollardyń búgingi baǵamy belgili boldy

Ekonomıka • Búgin, 11:22

Uqsas jańalyqtar