Parlament • 30 Qyrkúıek, 2020

Senatorlar aýyl ákimdikteri bıýdjetiniń qalyptasýyn zerdeleýde

15 ret kórsetildi

Keıingi kezde aýyl ákimdikteri óz bıýdjetterin qalyptastyrý men basqarýǵa múmkindik alyp otyr. Senattyń Qarjy jáne bıýdjet komıtetinde aýyl ákimdikteriniń bıýdjetin qalyptastyrý men basqarý tetikterin jetildirý qajet etetini aıtylǵan bolatyn. Is júzinde bul salada birqatar qıyndyqtar kórinis tabýda. Senatorlar osyǵan baılanysty jergilikti jerlerde aýyldyq okrýgter bıýdjetiniń qalyptasýyn kórý jáne onyń kúrdeli problemalardy sheshýge jetkilikti bolýyn zerdeleý úshin aýdandarda saparda boldy, dep habarlaıdy Egemen.kz.

Qarjy jáne bıýdjet komıtetiniń tóraǵasy Olga Perepechına Aqmola oblysyndaǵy Arshaly aýdany basshylyǵymen kezdesýde Qazaqstannyń Tuńǵysh Prezıdenti – Elbasy Nursultan Nazarbaev aýyldyq bıýdjetterdi paıdalanýdyń jańa sıpatyn 2012 jyly bekitkenin aıtty.

"2012 jyly bekitilgen Jergilikti ózin-ózi basqarý tujyrymdamasynyń negizgi mindetteriniń biri – aýyl ákimdikteriniń bıýdjetti ózderi qalyptastyrýy men oǵan ıelik etýdegi qarjylyq jáne ekonomıkalyq derbestigin keńeıtý boldy. Memleket basshysy 2020 jylǵy 1 qyrkúıektegi Joldaýynda da jergilikti bılik organdaryna bıýdjettik derbestik berý týraly aıtty", dep atap ótti Olga Perepechına.

Tórtinshi deńgeıdegi bıýdjet aýyl ákimdikterine ortalyq organdardan táýelsiz bolýǵa, aýyl problemalaryn ózderi sheshetindeı bıýdjetti derbes qalyptastyrýǵa jáne bólýge múmkindik beredi. Osynyń bári aýyl turǵyndarynyń qajettilikterin eskerýge, sol arqyly aýyldaǵy ómir súrý sapasyn jaqsartýǵa yqpal etedi.

Degenmen, senator Olga Perepechınanyń aıtýynsha, tájirıbe kórsetip otyrǵandaı, jergilikti jerlerde tórtinshi deńgeıdegi bıýdjetti engizý kezinde suraqtar men problemalar týyndap otyr. Olardyń ishinde jergilikti ózin-ózi basqarý bıýdjetteriniń teńsizdigi, bilikti kadrlardyń jetispeýshiligi, memlekettik organdardyń aqparattyq bazalarynyń oqshaýlyǵy jáne basqa da máseleler bar.

Bıýdjettiń teńsizdiginiń negizgi sebebi – aýyl bıýdjetteriniń óz kiristerimen qamtamasyz etilýdiń tómendigi jáne ol jappaı oryn alyp otyr. Osylaısha, aýyldyq okrýgterdiń shyǵystaryn qarjylandyrýdyń negizgi kózi joǵarǵy bıýdjetterden beriletin sýbvensııalar men nysanaly transfertter bolyp qala beredi.

Senatorlardyń pikirinshe, osy saladaǵy problemalardy egjeı-tegjeıli zerdelep, olardy joıý úshin tıisti sharalar qabyldaý qajet.

Sońǵy jańalyqtar

Atyraýda 9 balany ıt talady

Aımaqtar • Keshe

Uqsas jańalyqtar