Prezıdent • 30 Qyrkúıek, 2020

Prezıdent qaıyrymdylyq, volonterlik uıymdardyń ókilderimen kezdesti

50 ret kórsetildi

Qazaqstan Prezıdenti qaıyrymdylyq, volonterlik uıymdardyń jáne bıznes-sektordyń ókilderimen onlaın formatta kezdesý ótkizdi, dep habarlaıdy Egemen.kz Aqordanyń baspasóz qyzmetine silteme jasap.

Memleket basshysy óz sózinde qaıyrymdylyq pen volonterliktiń pandemııa kezinde jalpyulttyq sıpat alǵanyn atap ótip, onyń áleýmettik normaǵa aınalǵanyn jáne halyqtyń durys qabyldaǵanyn aıtty. Qasym-Jomart Toqaev osyndaı qıyn-qystaý kezde syrt qalmaı, otandastaryna kómek qolyn sozǵan, meıirimdilik, izgilik tanytqan ár azamatqa rızashylyq bildirdi.

– Asar degen ata dástúrimizdi saqtap kele jatqanymyz qýantady. Pandemııa kezinde de eriktiler aıanbaı eńbek etip, eren erliktiń úlgisin kórsetti. Olar kúndiz-túni dárigerlermen jáne tártip saqshylarymen birlesip, indetpen kúresti. Qaıyrymdy jandar ortaq iske jan-jaqty qoldaý bildirdi.  Elbasynyń bastamasymen qurylǵan «Biz birgemiz» qorynyń jumysyn erekshe atap ótkim keledi. Bul ıgi bastamaǵa myńnan astam azamat qarjylaı úles qosty. Biz osyndaı uıymshyldyqtyń jáne jaýapkershiliktiń arqasynda ahýaldy turaqtandyra aldyq. Munyń bári – eldiktiń jáne bereke-birliktiń jarqyn kórinisi, – dedi Prezıdent.

B

Qasym-Jomart Toqaev volonterlik qyzmetti damytý, qaıyrymdylyq pen mesenattyqqa qoldaý kórsetý memleketimizdiń uzaq merzimdi basymdyǵy dep sanaıdy. Volonterlik ispen aınalysý – patrıotızmniń jarqyn kórinisteriniń biri. Memleket basshysy jarııalaǵan Volonter jyly azamattarymyzdyń kópshiligin qaıyrymdy is qozǵalysy tóńiregine toptastyrdy. Qazaqstandyqtardyń usynysy boıynsha jasalǵan kóptegen qaıyrymdylyq jáne volonterlik jobalar – sonyń dáleli.

– Qaıyrymdylyqqa tikeleı jáne janama túrde atsalysatyn adamdardyń sany turaqty artyp kele jatqanyn kórip otyrmyz. Qyzmetkerlerdiń volonterlik jumysyn eńbek kitapshasyna mindetti túrde tirkeý týraly sheshim qabyldandy. Budan bólek volonterlikpen aınalysqan jastarǵa ýnıversıtetke, kolledjge túsý kezinde birqatar basymdyq beriledi. Qazirgi tańda bul jaqsy nátıje dep esepteımin. Barshańyzdyń buǵan eleýli úles qosqandaryńyz sózsiz, – dedi Qasym-Jomart Toqaev.

Memleket basshysy eriktilerdiń, qaıyrymdylyq qorlardyń pandemııaǵa qarsy kúres kezinde úlken ról atqarǵanyn eskere otyryp, BUU Bas Assambleıasy 75-sessııasynyń jalpysaıası debattarynda Volonterlerdi jumyldyrýdyń halyqaralyq kúnin jarııalaý týraly usynǵan bastamasy qoldaý taýyp, júzege asatynyna senim bildirdi. Onyń pikirinshe, Qazaqstan volonterlik pen qaıyrymdylyqty damytý isinde ozyq halyqaralyq úrdisterden qalyp qoımaıdy. Volonter jyly osy baǵytqa tyń serpin berdi.

– Volonterlik qyzmet osy jylmen toqtap qalmaıdy, aldaǵy ýaqytta da jalǵasa beredi. О́ıtkeni volonterlik qyzmet memlekettiń aldyna qoıyp otyrǵan maqsattarymen úndesetin bolǵandyqtan, bul – rýhty kóteretin, halyqtyń muń-muqtajyn bólisetin qozǵalys, – dedi Prezıdent.

Qazirgi ýaqytta Qasym-Jomart Toqaevtyń tapsyrmasy boıynsha túsinikti ári tıimdi quqyqtyq mehanızmderdi qamtıtyn Qaıyrymdylyq týraly zań ázirlenýde.

– Qaıyrymdylyq jáne volonterlik uıymdar ózderiniń eńbek etýine, sonyń ishinde memleketpen jáne bıznespen birlese jumys isteýine qajetti jaǵdaı jasaıtyn zań júzinde shynaıy mártebege ıe bolýy tıis. Úkimetke bul máseleni pysyqtaý tapsyryldy. Memlekettik qyzmet kórsetýdiń, ınfraqurylymdy paıdalanýdyń, aqparattyq qoldaý kezinde jeńildikter berýdiń naqty tetikterin ázirleýdiń máni zor. Sonymen qatar salyqtyq jeńildikter máselesi de mańyzdy, – dedi Prezıdent.

Búginde qaıyrymdylyq jobalarǵa baǵyttalǵan iri bıznes tabysyn 3% jáne shaǵyn jáne orta bıznes tabysyn 4% kólemde salyqtan bosatý zańnamalyq turǵyda qarastyrylǵan. Biraq shaǵyn jáne orta bıznes bul jeńildikterdi paıdalanbaı otyr. Qasym-Jomart Toqaev atalǵan jaǵdaıǵa taldaý jasap, osy baǵytta tıisti jumys júrgizýge tapsyrma berdi. Bıznestiń qaıyrymdylyqqa qarjy aýdarýy  yńǵaıly ári tıimdi  bolýǵa tıis.

– Qaıyrymdylyq qorlarǵa qarjy túsýiniń jáne onyń ári qaraı jumsalýynyń  ashyq bolýyn qamtamasyz etý qajet. Bul baǵytta kúńgirttikke jol bermeý kerek. Qazir qaıyrymdylyq jasaıtyn azamattar men kómek alýshylardyń reestrin qurý bastamasy iske asyrylýda. Bul mindettiń barynsha naqty oryndalýyna múmkindik jasaǵan jón. Qaıyrymdylyq jobalar arqyly ótetin barlyq qarjynyń jumsalýyna aqparattyq jáne qoǵamdyq baqylaýdy qamtamasyz etý qajet, – dedi Memleket basshysy. 

Prezıdent jeke qaıyrymdylyqtyń barlyq túri damýy kerek dep sanaıdy. Ár adamnyń bastama kóterip, óz qarjysyn qaıyrymdylyq maqsatqa bóle alatyn júıe qurylýǵa tıis.   

О́kinishke qaraı, tıisti aqparattyq jumystar talapqa saı jolǵa qoıylmaǵan, adamǵa senim uıalatatyn tetikter jasalmaǵan. Keıde buqaralyq aqparat quraldarynan azamattarymyz kimge jáne qalaı kómektesýge bolatynyn bilmeıdi degen aqparatty estip qalamyz. Al eger azamattarymyz mundaı jumyspen aınalysatyn bolsa, olardyń qaıyrymdylyq qarjysy qaı maqsatqa paıdalanylatynyn naqty bilý kerek, – dedi Qasym-Jomart Toqaev.

Onlaın formatta ótken kezdesýde «Birgemiz» qoǵamdyq qorynyń basqarma tóraǵasy, «Qazaqstandyq «Ýaqyp» qory» korporatıvtik qaıyrymdylyq qorynyń prezıdenti Rýslan Saqıev, «Kaspi Bank»  AQ basqarma tóraǵasy Mıhaıl Lomtadze, «BTS Digital» JShS-niń basshysy Nurtaı Ábilǵalıev, «Dara» jeke qorynyń atqarýshy dırektory Aınur Aımurzına, «Men almatylyqpyn» qoǵamdyq birlestiginiń jetekshisi Konstantın Avershın, Qazaqstan halqy Assambleıasynyń múshesi, volonter Nargızam Mahmýdova sóz sóıledi.

Olar bıznestiń áleýmettik jaýapkershiligi, qaıyrymdylyq salasyn damytýǵa yntalandyrý, qaıyrymdylyq qyzmettiń ashyqtyǵyn, volonterlerdiń rólin arttyrý jáne volonterlikti damytý máselelerine baılanysty oılaryn ortaǵa saldy.

Memleket basshysy Úkimet janyndaǵy Qaıyrymdylyqty damytý máseleleri jónindegi keńeste aıtylǵan barlyq máseleni, bastamalardy pysyqtaýǵa, sondaı-aq, Qazaqstan zańnamasyna tıisti ózgerister engizýdi keshiktirmeýge tapsyrma berdi.

Kezdesý sońynda birqatar azamat pandemııa kezindegi qajyrly eńbegi úshin «Halyq Alǵysy» medalimen marapattaldy.

 

Sońǵy jańalyqtar

Atyraýda 9 balany ıt talady

Aımaqtar • Keshe

Taraz qalasynda gaz qubyry jaryldy

Aımaqtar • 23 Qazan, 2020

Syrda kúrishten rekordtyq ónim jınaldy

Aımaqtar • 23 Qazan, 2020

Qazaqstanda sýdıalardyń jalaqysy qansha?

Qazaqstan • 23 Qazan, 2020

Elimizde jańbyr jaýyp, sońy qarǵa ulasady

Aýa raıy • 23 Qazan, 2020

Shyǵysta eki azamat zańsyz balyq aýlaǵan

Aımaqtar • 23 Qazan, 2020

Uqsas jańalyqtar