Saıasat • 30 Qyrkúıek, 2020

Búgin "Birlik" saıası partııasynyń kezekten tys V sezi ótti

17 ret kórsetildi

Bıylǵy jyldyń 30 qyrkúıeginde ótken "Birlik" partııasynyń kezekten tys V sezine 100 den astam delegat qatysty, onyń 85-i onlaın rejımde vıdeobaılanys arqyly qosyldy, dep habarlaıdy Egemen.kz

Sezde jarǵyǵa engizilgen ózgerister talqylanyp, qoldaý kórsetildi, sondaı-aq partııanyń ıdeologııalyq tuǵyrnamasynyń damý basymdyqtary men baǵyttary egjeı-tegjeıli talqylanyp, bekitildi.

Jarǵyǵa engiziletin ózgerister partııa sezi otyrystaryn beınekonferensııa rejıminde ótkizýge, sondaı-aq konsýltatıvtik-keńesshi organyn partııanyń Saıası keńesi túrinde engizýge múmkindik beredi.

"Másele tek qana májiliske ótip, depýtat bolý emes. Eń bastysy – sheshim qabyldaýshylarǵa usynystar men ıdeıalardy jetkize bilý qajet. Memleket basshysynyń bastamasy boıynsha "estýshi memleket" tujyrymdamasy iske qosyldy, ózara tyǵyz qarym-qatynas júrip jatyr. Bizge birigý kerek, bul tek qana saıası birlestikter sheginde emes, jalpy qoǵam týraly.Biz burynnan kele jatqan partııa retinde, kúsh jıǵanymyzdy sezemiz jáne barlyq saıası sharalarǵa qatysýǵa daıynbyz. Biraq taǵy da aıta keteıin, partııanyń prınsıpi – negizsiz ýáde berý emes, saılaýshylardyń kóz aldynda, halyqtyń kóz aldynda qur sózdi bolmaý. Mysaly, biz bir aýylǵa sý qubyryn tartaıyq, mine, bul naqty jumys bolady. Kishkentaı bolsa da, jumys. Eger siz ben biz qandaı da bir kópbalaly otbasyǵa azyq-túlik alyp bersek, qarjylaı kómektessek, bul naqty jumys sanalady", dep túsindirdi "Birlik" saıası partııasynyń tóraǵasy Serik Sultanǵalı.

Delegattar Jarǵydaǵy usynylǵan ózgeristerdi maquldady, olardy sezd hatshysy Murat Qojamqulov jarııalaǵan bolatyn. Sondaı-aq, partııanyń jańartylǵan baǵdarlamasynyń negizgi tásilderi men Sezdiń úsh qatysýshy delegattarynyń baıandamalaryn qoldady. Baıandamalar kóshi-qon; ekologııalyq qaýipsizdik máseleleri; ultaralyq kelisimdi nyǵaıtý máseleleri taqyrybynda boldy.

"Biz, bizdiń partııa basqa ulttardyń ózindik ereksheligi, mádenıeti saqtalýyn qoldaımyz, biraq ult ókilderi barlyq áleýmettik-ekonomıkalyq prosesterge, bilim berý salasyna, kásipkerlikke, memlekettik organdarǵa tyǵyz ıntegrasııalanýy kerek. Ultaralyq qatynastar salasyndaǵy kez kelgen qylmystar, teńsizdikke, ulttyq nemese dinı qaǵıdat boıynsha qysym jasaýǵa shaqyrý qatań jazalanýy tıis. Bul berik qaǵıdat", dedi sezd delegaty, "Birlik" partııasynyń Mańǵystaý oblystyq fılıalynyń basshysy Tımýr Ábdikárimov

"О́nerkásipti, kásipkerlikti damytýǵa baǵyttalǵan qarajat naqty jumys oryndaryn qurýǵa baǵyttalýy tıis desem, jańalyq ashpaıtynym túsinikti. Jergilikti ákimder tıimdiliginiń negizgi ındıkatory jumys oryndaryn qurý bolýy kerek. Memlekettik baǵdarlama boıynsha usynylǵan, jalaqy deńgeıi eńbek naryǵy boıynsha ortasha kórsetkishten eki, tipti úsh ese tómen bolatyn jumys emes, mamandardyń suranysyn  qanaǵattandyratyn naqty jumys oryndary", dep túsindirdi sezd delegaty, "Birlik" partııasynyń Soltústik Qazaqstan oblystyq fılıalynyń basshysy Qýanysh Zeınelov.

Atalǵan bastamalyq baıandamalar partııanyń jańartylǵan baǵdarlamasyn ázirleý kezinde eskeriletin bolady.

"Aýyl" partııasymen birigý máselesi boıynsha talqylaýlar boldy. Osy partııadaǵy áriptesterimiz ózderiniń sezinde sońǵy sheshimderin jarııalady. Meniń pikirim de BAQ-ta resmı túrde aıtyldy. Birlestik bizge artyqshylyq bermeıdi degen pikirimdi qaıta aıtqym keledi jáne osy máseleni jabýdy usynamyn”, dedi Partııa tóraǵasy Serık Sultanǵalı.

Sońǵy jańalyqtar

Namysyn tý etken

Rýhanııat • Keshe

Uqsas jańalyqtar