Aımaqtar • 30 Qyrkúıek, 2020

Bıyl Jambyl oblysyndaǵy 11 aýyl keń jolaqty ınternetpen qamtylady

16 ret kórsetildi

Kún tártibindegi másele boıynsha jobalyq basqarý jáne sıfrlandyrý ortalyǵynyń dırektory Damır Egizbaev baıandama jasady, dep habarlaıdy Egemen.kz oblys ákiminiń baspasóz qyzmetine silteme jasap.

Bıylǵy jyly Prezıdent Qasym-Jomart Toqaev halyq sany 250-den asatyn ár aýylǵa ınternet tartýdy tapsyrdy.

Búginde 250-den astam turǵyny bar oblystaǵy 308 aýyldyń 166-sy ınternet jelisine keń jolaqty kabeldik qoljetimdilikpen qosylǵan desek, aǵymdaǵy jyldyń sońyna deıin qosymsha taǵy 11 eldi meken qamtamasyz etiletin bolady.

308 eldi mekenniń 234-i joǵary jyldamdyqty mobıldi ınternetpen (3G jáne 4G) qamtamasyz etilgen. 23 aýylda uıaly baılanys operatorlary mobıldi ınternettiń jyldamdyǵyn arttyrý boıynsha jumystar júrgizýde. 50 aýyldyq eldi mekende onyń jyldamdyǵy tutynýshylardy qanaǵattandyrmaıdy.

Halyq sany 250 adamnan az 63 aýyldyń 20-sy joǵary jyldamdyqty mobıldi ınternetpen qamtamasyz etilgen. Jyl sońyna deıin taǵy bir aýyl ınternet baılanysqa qosylady.

Talas, Jambyl, Qordaı aýdandarynda uıaly baılanys operatorlary uıaly baılanys antennalaryn ornatýda qıyndyqtarǵa tap bolýda. Beınekonferensbaılanys rejıminde qatysqan aýdan ákimderine máselelerdi sheshý tapsyryldy.

"Memleket basshysy sıfrlyq teńsizdikti joıýdy, ınternetke barynsha qoljetimdilikti jáne barlyq azamattardyń sapaly baılanysyn qamtamasyz etýdi tapsyrdy. Qazirgi ýaqytta qashyqtan bilim berý sapasy men elektrondy saýdanyń damýy osyǵan baılanysty bolyp otyr", - dep atap ótti oblys ákimi Berdibek Saparbaev.

Aımaq basshysy ár aýyldaǵy jaǵdaıdy taldap, qaı eldi mekenderde ınternet joq ekenin anyqtaý kerektigin eskertti. Tómen jyldamdyqpen turǵyndar beınejazbalardy bylaı qoıǵanda, áleýmettik jeliler arqyly habarlama jibere almaıdy. Sonymen birge uıaly baılanysta da kedergiler týyndaıdy. Jergilikti jerlerdegi naqty jaǵdaıdy túsiný mańyzdy. Oblys ákiminiń sheshimimen ınternetke qol jetimdilik máseleleri boıynsha jumys toby qurylatyn boldy. Onyń quramyna uıaly baılanys operatorlarynyń ókilderi de enedi.

"Jahandyq jeli shalǵaı aımaqtarǵa da jetýi tıis", - dedi oblys ákimi.

Jaqyn kúnderi jumys toby shalǵaı aýyldarda ınternet jyldamdyǵyn arttyrý jáne kórshi memlekettiń uıaly baılanys operatorlarynyń baılanysyn paıdalanatyn shekara mańyndaǵy aýyldyq okrýg turǵyndarynyń  máselelerin sheshý jóninde usynystar ázirleýi tıis.

Sońǵy jańalyqtar

Namysyn tý etken

Rýhanııat • Keshe

Uqsas jańalyqtar