Senatorlar densaýlyq saqtaý salasyndaǵy ózekti máselelerdi talqylady. Onyń ishinde aýrýhanalardyń apattyq jaǵdaıy, medısınalyq pýnktterdiń jetispeýshiligi jáne dári-dármekterdi jetkizýdegi kidirister týraly da aıtyldy.
Otyrysta Senat Tóraǵasynyń orynbasary Nurlan Ábdirov: «Aımaqtarǵa barǵan kezde jergilikti turǵyndar úsh aýylda bir-birden ambýlatorııa bar ekenin, emdelý úshin 400 shaqyrymǵa barmaý úshin bir aýrýhana salyp berýdi suraıdy. Degenmen, bizdegi standarttar boıynsha 4-5 myń halqy bar eldi mekende ǵana aýrýhana bolýy múmkin. Sonymen qatar, Prezıdent dárigerlik qyzmetterdiń qoljetimdi bolýy týraly mindet qoıdy. Árıne, salalyq mamandar qajet bolǵan jaǵdaıda oblys ortalyǵyna aparý qajet. Al negizgi medısınalyq qyzmetter qadam basar jerde bolýy tıis", - dedi.
Senator Aqmaral Álnazarova alǵashqy medısınalyq-sanıtarlyq kómek qyzmetiniń tarıfterine nazar aýdardy, olar uıymdardyń naqty shyǵyndaryn jabýǵa múmkindik bermeıdi, al jeke sektordy qyzyqtyryp otyrǵan joq. Senatorlardyń qorytyndysy boıynsha MSAK densaýlyq saqtaý salasynyń basqa baǵyttarymen salystyrǵanda tolyq qarjylandyrylmaı keledi.
Depýtattar densaýlyq saqtaý júıesin sıfrlandyrýdaǵy ózekti máselelerdi de aıtty.
"Búgingi kúnge deıin sıfrlandyrýdyń biryńǵaı platformasy joq, ıaǵnı medısına qyzmetkeri naýqas adam týraly birdeı derekterdi ártúrli baǵdarlamalarǵa birneshe ret engizýge májbúr. Bul kúıbeńi kóp jumys dárigerge óz betinshe bilim alýǵa kóbirek ýaqyt bólýge nemese sol naýqasqa ýaqyt bólýge múmkindik bermeıdi", - dedi Aqmaral Álnazarova.
Otyrys qorytyndysy boıynsha depýtattar dárigerlerdiń mártebesin odan ári arttyrý maqsatynda "Medısına qyzmetkeriniń mártebesi týraly" QR zań jobasyn ázirleý qajettigin qarastyrýdy, psıhoemosıonaldyq júktemeler men zııandy eńbek jaǵdaılary úshin qosymsha aqynyń mólsherin qaıta qaraý, ómirlik mańyzy bar dárilik preparattardy satyp alýǵa arnalǵan kópjylǵy sharttardyń qoldanylýyn ózgertýdi usyndy.
Senattyń Áleýmettik-mádenı damý jáne ǵylym komıtetiniń otyrysyna Densaýlyq saqtaý mınıstri Alekseı Soı, mınıstrdiń orynbasary – bas sanıtarlyq dáriger Erlan Qııasov, medısınalyq saqtandyrý qorynyń basqarma tóraǵasy Bolat Tókejanov jáne kópsalaly medısınalyq ortalyqtyń basshysy Shynar Málik qatysty.
