Senat depýtattary tartylǵan tikeleı ınvestısııalardyń jalpy kóleminiń jartysynan kóbi munaı-gaz sektoryna tıesili ekenin aıtty. Bizdiń eldiń birqatar aımaǵynda munaı-gaz salasynyń uıymdary áleýmettik-ekonomıkalyq turaqtylyqqa, jumyspen qamtýǵa jáne halyqtyń kiristerin qalyptastyrýǵa aıtarlyqtaı eleýli qoldaý kórsetetini aıqyn. Sonymen qatar munaı sektory uıymdarynan alynatyn tikeleı salyqtar – Qazaqstan Respýblıkasynyń Ulttyq qoryn qalyptastyrý kózderiniń biri. Osylaısha, munaı-gaz sektorynyń barlyq aspektilerin retteýdiń ashyqtyǵy, atap aıtqanda, jer qoınaýyn paıdalaný quqyǵyn berý máseleleriniń ózektiligi joǵary bolyp otyr.
Depýtat N.Beknazarovtyń aıtýynsha Energetıka mınıstriniń m.a. buıryǵy boıynsha jer qoınaýyn paıdalaný quqyǵyn berýge arnalǵan elektrondyq aýksıondar ótkizý qaǵıdalary bekitilgen.
«Kodeks qabyldaǵannan bergi 2,5 jyldan astam ýaqyt ishinde Energetıka mınıstrligi ony iske asyrý úshin qajetti normatıvtik quqyqtyq aktilerdi daıyndady jáne osy kezeńde kómirsýtekter salasynda birde bir konkýrs ótken joq. Osylaısha, konkýrs úshin jer ýchaskeleriniń jasandy jetispeýshiligi qalyptasyp, nátıjesinde el aımaqtaryna tartylatyn ınvestısııa kólemi aıtarlyqtaı tómendedi», - dedi N.Beknazarov.
Senat depýtattary sarapshylardyń pikirinshe, Mınıstrlik qabyldaǵan erejelerde is júzinde qatysýshylarǵa ashyq emes jáne teń emes jaǵdaılar jasaı otyryp, kásipkerler úshin zańnamada kózdelmegen shekteýler ornatýǵa tyrysýda. Qabyldanǵan erejeler Prezıdenttiń ashyq Úkimet týraly, halyqtyń aqparatqa qol jetimdiligi, sybaılas jemqorlyqty joıý maqsatynda memlekettik resýrstardy qoǵamdyq baqylaý týraly tapsyrmalaryna qaıshy keledi. Sonymen birge, Erejede kelesi máseleler ashylmaǵan nemese olar óte qysqa jáne túsiniksiz, ásirese reıderlik problemalaryn boldyrmaýǵa nemese azaıtýǵa baǵyttalǵan erejelerdiń joqtyǵy baıqalady. Tehnıkalyq aqaýlar máseleleri jetkilikti túrde rettelmegen, ishki qaıshylyqtary de jetkilikti.
«Elektrondyq aýksıondardyń operatory retinde jarǵylyq kapıtalynda memlekettiń qatysýy bar kommersııalyq uıym tańdaldy jáne oǵan memlekettik fýnksııalardyń bir bóligi senip tapsyryldy, ony berý zańmen qarastyrylmaǵan. Sonymen birge, operator aldyn-ala satylarda (ótinimderdi qaraý jáne tirkeý jáne t.b.), sondaı-aq aýksıon kezinde bolýy múmkin teris is-áreketteri úshin jaýapkershilik tartpaıdy. Operatordy sybaılas jemqorlyq quqyq buzýshylyq quramy úshin jaýapkershilikke tartý da kúmán týdyrady», - dedi Senat depýtaty.
Senatorlar memlekettik organdardyń basqarý sheshimderindegi jáne kómirsýtekter boıynsha elektrondy aýksıondar ótkizý týraly sheshim qabyldaýdaǵy kemshilikter potensıaldy jáne shynaı ınvestorlarmen spekýlıatıvti kelisimsharttar uıymdastyratyn túrli deldaldyq jáne reıderlik kompanııalardyń jandanýyna sebepshi bolǵanyn aıtyp otyr.
Depýtattar qaǵıdalardy qabyldanǵan nusqada qaldyrý memleket úshin mıllıondaǵan dollar kiris almaý, ashyq bloktardy deldaldardyń qolyna berý jáne sonyń saldarynan sheteldik kompanııalardyń bizdiń eldiń ekonomıkasyna ınvestısııa salýǵa degen qyzyǵýshylyqtaryn joǵaltý múmkindigin týdyrady dep esepteıdi.
Osyǵan oraı senatorlar Nurlan Beknazarov, Qanatbek Safınov jáne Lázzat Súleımen Úkimet basshysyna joldaǵan saýalynda eń mańyzdy tabıǵı resýrstardy berý boıynsha elektrondyq aýksıondar kezinde qoǵamdyq baqylaýdy uıymdastyrý maqsatynda sarapshylar men qoǵamdy tartý qajet ekenin aıtty.
