Vaksına egý júrip jatyr. Barlyǵy 510 myń doza dári bólingen. Shoıyndykólde aýrý qustardy joıý aıaqtaldy. Oblystyń 20 eldi mekeninde indettiń saldarynan qustardyń ólý oqıǵasy tirkeldi. Bes aýyl karantınge jabyldy. Oblys ortalyǵynyń irgesindegi Qarlykól aýylynda 400-den astam qus qyrylyp qaldy. Aýyl turǵyndary úshin úlken shyǵyn. Bul eldi meken karantınge jabyldy. Aýyl turǵyndary men mamandar kezdesý ótkizip, jumys tártibin túsindirdi. Aýyldaǵy aǵaıyn ótemaqy máselesine alańdap otyr.
– Meniń aýlamda 39 qaz ben 35 taýyq ólip qaldy. Qazir ár qusqa qansha ótemaqy tóleıtinin bile almaı otyrmyz. Naryqtyq baǵaǵa saı bolsa jaqsy bolar edi, – deıdi Qarlykól aýylynyń turǵyny Alma Ahmetova.
Bulaq aýyldyq okrýginiń ákimi Oralbek Bekishevtiń aıtýyna qaraǵanda, qustary qyrylyp qalǵan adamdardyń barlyǵyna arnaıy esepshot ashylǵan. Ortasha baǵamen ótemaqy tólenetindigi túsindirilgen. Boljam boıynsha, karantın kem degende 21 kúnge sozylmaq. Indet jaılaǵan ólkeden qustyń etin, jumyrtqasyn shyǵarýǵa bolmaıdy. Aýyldardyń kire beristerine beketter qoıylǵan. Mańaıy jyrtylyp jatyr. Bul kólik qozǵalysyn shekteý úshin jasalyp jatqan qadam. Karantın jarııalanǵan aýyldardyń adamdary bir jol arqyly ǵana kirip-shyǵa alady, barlyq kólik esepke alynady, tekseriledi.
Búgingi tańda oblystyń 15 eldi mekeninde qus tumaýy rastalyp otyr. Indet jaılaǵan aýyldardy karantınge jabý jumystary qolǵa alynǵan. Bir aptada 2 210 úı qusyna ekpe jasaldy. Áıtse de jabaıy qustyń qanatyna jarmasqan indettiń izin shalyp, tosqaýyl bolý qıyn bolyp tur.
Aqmola oblysy
