Jalpy aýdany 45 000 sharshy metrdi alatyn jańa jataqhana bes qabatty úsh bloktan turady jáne A. Baıtursynov pen K. Ázirbaev kósheleriniń qıylysynda ornalasady.
Qazaqstan Respýblıkasynyń Tuńǵysh Prezıdenti N.Nazarbaevtyń "Bes áleýmettik bastamasy" negizinde jeke ınvestısııalar esebinen salynatyn Stýdentter úıi ýnıversıtet tarıhyndaǵy eń aýqymdy joba jáne stýdentter arasynda jataqhanalardaǵy oryn jetispeýshiligi máselesin tolyǵymen sheshedi.
Sharaǵa Bilim jáne ǵylym vıse-mınıstri Mıras Dáýlenov, "Qarjy ortalyǵy" AQ prezıdenti Asqar Ibraımov, Aqparat jáne qoǵamdyq damý vıse-mınıstri Ashat Oralov, Eýrazııa ulttyq ýnıversıtetiniń rektory Erlan Sydyqov, "MegaStroıServıs" jaýapkershiligi shekteýli seriktestiginiń ınnovasııalyq damý jónindegi dırektory Balsheker Muhamedqyzy jáne professor-oqytýyshalar men stýdent jastar qatysty.
Stýdentter úılerinde stýdentterdiń jaıly turýy, oqýy, demalýy úshin barlyq jaǵdaılar jasalady jáne aýmaqta tamaqtaný men bos ýaqytty tıimdi ótkizý ortalyqtary, jattyǵý zaldary, sport alańdary men ómir súrý úshin basqa da qolaıly jaǵdaılar qarastyrylǵan.
"Men L.N.Gýmılev atyndaǵy Eýrazııa ulttyq ýnıversıtetine alǵash jumysqa kelgende stýdentterge zamanaýı úlgidegi baspana salýdy oılaǵan edim. О́ıtkeni qalamyz elimizdiń astanasy, shetelden qonaqtar kóp keledi. Kelgen meımandar elimizdegi birden bir jetekshi oqý ordasy – Eýrazııa ulttyq ýnıversıtetine soqpaı turmaıdy. Sonda olar bizdiń stýdentterdiń qandaı jerde turatynyn kórse degen oı bolǵan. Arada biraz jyldar ótse de, sol kezdegi alǵa qoıǵan maqsatym oryndaldy, Endi mine, Nur-Sultan qalasynyń tórinen jańa Stýdentter qalashyǵynyń qazyǵy qaǵylyp otyr. Investorlar eki jyldan keıin paıdalanýǵa beremiz dedi. Shynymdy aıtsam, bilim alýshy stýdenttermen birge ózim de qatty qýanyp otyrmyn. О́ıtkeni ol jataqhana degen aty bolmasa, zamanaýı úlgidegi kádimgi seksııalyq úı bolmaq. О́te qýanyshtymyn", - dedi Eltańba avtory, osydan eki jyl buryn paıdalanýǵa berilgen "Stýdentter úıiniń" jobasyn jasaýshy, Eýrazııa ulttyq ýnıversıtetiniń professory Jandarbek Málibekov.
Sondaı-aq L.N.Gýmılev atyndaǵy Eýrazııa ulttyq ýnıversıtetiniń rektory Erlan Sydyqov Stýdentter qalashyǵynyń irgetasyn qalaý – Eýrazııa ulttyq ýnıversıteti úshin tarıhı sát ekenin atap ótti.
"Bul Tuńǵysh Prezıdent N.Á. Nazarbaevtyń bes áleýmettik baǵdarlamasynyń úshinshi bastamasy: «Joǵary bilim alýdyń qoljetimdiligi men sapasyn arttyryp, stýdent jastardyń jataqhanadaǵy jaǵdaıyn jaqsartý» tapsyrmasyna oraı atqarylyp jatqan ister. Bilim jáne ǵylym mınıstrligi bul tapsyrmalardy oıdaǵydaı oryndap keledi, óıtkeni elimizdegi JOO-nyń aldy ózderiniń jataqhana qurylysyn bastap ta ketti, keıbireýleri ony paıdalanýǵa berip te úlgerdi.
EUÝ stýdentter qalashyǵynyń ereksheligi, ınvestorlar óz qarajatyna salyp beredi, qalashyqta jastarǵa ne kerek, bári qamtylǵan. Sondyqtan «MegaStroıServıs» jaýapkershiligi shekteýli seriktestigi ujymyna rızashylyǵymdy bildiremin.
Qazaqstan Respýblıkasynyń Prezıdenti Qasym-Jomart Toqaev óziniń halyqqa arnaǵan Joldaýynda áleýmettik máselelerge, ásirese eldiń jaǵdaıyn qamtamasyz etýge, onyń ishinde jastarǵa, erekshe kóńil bóldi. Búgingi shara sol Joldaýda berilgen tapsyrmalardyń oryndalýy dep bilemin", - dedi ol.
«MegaStroıServıs» jaýapkershiligi shekteýli seriktestiginiń ınnovasııalyq damý jónindegi dırektory Balsheker Muhamedqyzynyń aıtýynsha, «MegaStroıServıs» jaýapkershiligi shekteýli seriktestigi 2005 jyly Mańǵystaý oblysy Aqtaý qalasynda tirkelgen. Bul kompanııanyń ınfrastýktýra jáne turǵyn úı salýdaǵy tájirıbesi mol. Eýrazııa ulttyq ýnıversıtetiniń jataqhana qurylysy boıynsha jarııalaǵan konkýrsqa qatysyp, jeńip alǵan.
Qurylys úsh bloktan turady jáne 2 361 tósek-orynǵa arnalǵan. Stýdenttik úıler ǵımaraty bes qabatty bolsa, jobanyń quny 7 mlrd teńgeni quraıdy.
"Eýrazııa ulttyq ýnıversıtetiniń rektory Erlan Báttashuly aǵamyzǵa elimizdiń túkpir-túkpirinen oqıtyn qazaq jastaryna jaǵdaı jasap, qamqor bolyp júrýdegi jáne osyndaı úlken jobany iske asyrýyna atsalysyp jatqany úshin alǵysymyzdy bildiremiz. Eldiń bolashaǵy úshin atqaryp jatqan qyzmeti tarıh aldynda elenýine tilektespiz. Qurylys jumysy negizi 2020 jyly kóktem aıynda bastalýy kerek edi, biraq álemdi jaılaǵan indettiń saldarynan jumysymyz jarty jylǵa keshikti. Alla sátin salsa, Stýdenttik úıler keshenin 2022 jyly 30 tamyzǵa deıin tolyqtaı bitirip, Qazaqstan Respýblıkasynyń Konstıtýsııa kúni paıdalanýǵa beremiz", - dedi Balsheker Muhamedqyzy.
Is-shara sońy bolashaq urpaqqa arnalǵan tarıhı jazba qaldyrý rásimimen aıaqtaldy. Onda 2045 jylǵy stýdentterge arnalǵan úndeýler, tilekter, nusqaýlar salynǵan.
