Messa di Gloria – Djakomo Pýchchınıdiń eń áıgili týyndylarynyń biri, buǵan qosa ol uly kompozıtordyń sırek oryndalatyn shyǵarmasy sanalady.
– Messanyń árbir nómirinde aıryqsha sulýlyq bar, bul – beıneli, mánerli mýzyka. Katolıktik shirkeýdegi messa – saltanatty ǵıbadat etý. Atalǵan shyǵarmanyń aıqyn mýzykalyq taqyryptarynda Táńirdi madaqtaý anyq estiledi. Dinı mýzykasy bar bul týyndyǵa Pýchchını shyǵarmashylyǵyn biregeı ári oǵan deıingilerdiń jumystarynan ózgeshe etetin barlyq belgiler tán. Bul degenimiz – bizdiń «Toska», «Týrandot», «Bogema», «Madam Batterflıaı» nemese «Manon Lesko» syndy operalardan kórip-tyńdap úırengen nárselerdiń bári – názik áýendilik, orkestrge keremet laıyqtaý, ádetten tys úılesimdi qadamdar. Hor shirkeýde án aıtqanda, minájat jasaýǵa kedergi keltirmeý úshin emosııasyz aıtýy tıis dep esepteledi. Biraq biz shirkeýde emes, sahnada oryndaıtyn bolǵandyqtan, maqsatymyz da basqa: tyńdarman qaýym bizben birge kompozıtordyń partıtýraǵa engizgen sezimderin túısinýi úshin mýzykanyń bar ásemdigin, kemeńger Pýchchınıdiń tereńdigin kórsetýge tyrystyq, – dedi ǵalamat mýzyka keshi jaıynda teatrdyń bas hormeısteri Erjan Dáýitov.
Týyndydaǵy jeke partııalardy teatr solısteri Ramzat Balakıshıev (tenor) pen Talǵat Ǵaleev (barıton) oryndady.
Eske salar bolsaq, 2018 jyldyń jeltoqsan aıynda «Astana Opera» hory osy shyǵarmamen Reseıdiń úsh tanymal konservatorııalarynyń biri ornalasqan jáne kóptegen tanymal mýzykalyq ujym jumys isteıtin Sibirdiń iri mádenı ortalyǵy Novosibirde óner kórsetti. Novosibir memlekettik akademııalyq opera jáne balet teatrynyń sahnasynda Dj.Pýchchınıdiń Messa di Gloria shyǵarmasy da alǵash ret shyrqaldy. Klassıkalyq mýzykadan habary bar qalanyń talǵampaz kórermenderi qazaqstandyq ártisterdiń oryndaýyn úlken qoshemetpen qabyl alǵan bolatyn.
