Zań «Qazaqstan Respýblıkasynyń azamaty basqa memlekettiń azamattyǵyn alsa, onda sol sátten bastap ol Qazaqstan Respýblıkasynyń azamattyǵyn joǵaltady», deıdi. Biraq bir barmaǵyn ishine búkken qý túrli aıla-sharǵymen Qazaqstan azamaty da bolyp qala beredi eken. Sóıtip, zańsyz áreket jasaıdy. Máselen, Reseıdiń azamattyǵyn alǵan sátten bastap adamǵa Qazaqstan azamattarynyń quqyqtary men bostandyqtaryn paıdalanýǵa, sonyń ishinde zeınetaqy jáne basqa da áleýmettik tólemder alýǵa, Qazaqstan Respýblıkasynyń kásiporyndarynda tirkelmeı jumys isteýge, aqysyz bilim alýǵa, medısınalyq qyzmetter alýǵa, atys qarýyn saqtaýǵa jáne alyp júrýge jáne t.b. ruqsat etilmeıdi. Osyny bilse de eki eldiń de azamattyǵyn alyp, eki jaqtyń da jeńildikterin alyp júre beredi.
Qos azamattyq alyp júrgeni úshin tartatyn jaýapkershilik tek elden shyǵarylý nemese aıyppul tóleýmen shekteledi. Al aıyppuldyń kólemi ÁQtK 496-babyna sáıkes bar bolǵany 100-den 300 AEK (2778 teńge) mólsherinde ǵana. Oblystyq PD-nyń Kóshi-qon qyzmetiniń derekterine qaraǵanda jerimizde turǵanymen Qazaqstan azamattyǵynan shyǵýshylar sany jyl saıyn artyp keledi. Máselen, byltyr ondaılardyń sany 463 bolsa, bıylǵy segiz aıdyń ishinde ǵana 303 adam bolypty. Bulardyń bári de negizinen Reseı Federasııasynyń azamattyǵyn qabyldaǵandar. Qazaqstan Respýblıkasy azamattyǵynan shyǵyp, biraq pasporty men jeke kýáligin paıdalanǵan 24 adam jaýapqa tartylǵan. Sonyń ishinde bıyl 5-ýi elden tys jerge shyǵarylǵan, al 2019 jyly ondaılardyń barlyǵy 19 bolyp, sonyń 4-eýi el aýmaǵynan shyǵarylǵan.
Bir qyzyǵy, Polısııa departamenti ondaı adamdardyń aty-jónderin de kórsete almaıdy. Zańdy buzǵany belgili, biraq olardyń esimderi zańmen qorǵalyp, jeke derekteri aıtylmaıtyny qyzyq emes dep kór. Eger Qazaqstanda turyp, Qazaqstan azamattyǵynan shyqqan adamdardyń aty-jónderi jarııalanyp tursa jáne olardyń sońǵy qyzmet etken oryndaryna qatynas qaǵazy jiberiletin bolsa, Prezıdentimizdiń óziniń nazaryn aýdarǵan mundaı buzýshylyqtar bolmas edi.
Qazaqstan azamattyǵynan shyqpaǵan adamdardyń ózderinde zeınetaqy alyp júretini Reseı Federasııasynyń organdaryn da alańdata bastaǵan sııaqty. О́ıtkeni, ekijaqty kelisim boıynsha eki eldiń biriniń zańyn buzǵan adam ekinshi eldiń aýmaǵynda tursa, ol týraly habarlanady nemese qajet bolǵan jaǵdaıda ustalyp beriledi emes pe? Sondaılardyń biri «A» (joǵaryda aıtqanymyzdaı aty-jónin tolyq aıtpaıdy) «degen azamatqa qatysty ákimshilik sıpattaǵy sharalar qoldanyldy, Qazaqstannyń qujattary alyndy, osy fakti týraly aqparat Soltústik Qazaqstan oblysy Memlekettik zeınetaqy tóleý ortalyǵyna jiberildi» dep jazady PD-niń Kóshi-qon qyzmeti basqarmasy. Odan ári osy qyzmettiń anyqtamasynda mynadaı derek jazylǵan: «Osyndaı jaǵdaı azamat «Z»-dan da anyqtaldy, osy ýaqytqa deıin Petropavl qalasyndaǵy Ońtústik Oral temir joly qyzmetkerleriniń arasynda da qos azamattyq faktileri anyqtalýda, mysaly, azamat «N» anyqtalǵan jaǵdaı boıynsha ákimshilik jaýapkershilikke tartyldy, oǵan 200 AEK mólsherinde aıyppul salyndy».
Sóıtip, buzýshylardyń kim ekenin de atap, tústep bile almaı «A», «B» dep otyrdyq. Bári de zańdarymyzdyń solqyldaqtyǵynan ekeni daýsyz.
Soltústik Qazaqstan oblysy
